「無啦啦多左幾個家姐同細妹 Season 2」: 偽裝
呢把聲…的確係阿樂…
唔通佢真係未死…
樂：「睇落你呢三年都好似過得好開心咁喎，一步一步咁踩住人上位，由一個普通學生做到去七星。」
「首先係阿偉，之後係阿傑，再之後就係你既好朋友阿威。」
「下個會係邊個？
」佢每一句說話都插中我既痛處，因為佢講既野句句都係事實。
雖然係有少少出入，但我無辦法否認，我的確係反左佢地。
我：「阿樂，聽我講…」
樂：「你地四個都有份害死我！！你地居然仲夠膽過得咁風流快活！！
」岩，其實我地四個真係有份害死阿樂…
如果我地當時無咁聽話，肯好似當日反阿偉咁企出黎，所有野可能會好唔同…
樂：「首先係你地！之後就係阿偉，最後就係班所謂七星！」
你想打我既話…我唔會避。
我合埋對眼，準備正面接已經衝左上黎既阿樂既一拳。
Ellie：「唔可以！
」聽到Ellie咁激動既聲線，我即刻開返眼，發現原來佢企左係我前面，擋住阿樂。
阿樂見到咁都停低左佢既拳，大大個拳頭放左係Ellie眼前。
樂：「走開，唔關你事。
」我：「係呀Ellie，快D行開啦…
」Ellie：「唔走！件事根本都唔關阿明你事！點解你要攬哂上身！」
Ellie居然會咁激動...
樂：「唔關佢事？如果當日唔係佢地四個冷眼旁觀！枉我阿..枉我仲當你係同一類人，咁照顧你，結果我得到既係咩！！」
咦..點解阿樂講野個樣好似有D奇怪…
樂：「唔好阻住我！我一定要報仇！」
阿樂好激動咁一手推開Ellie，再一次向我揮拳。
但係今次，我無再選擇乖乖地俾佢打，而係緊緊咁捉住左阿樂隻手。
我：「唔準掂佢。
」我開始有小小理解到當日Alex點解會咁嬲，原來發生係自己身上，自己都會有相同既感覺。
阿樂對於我咁接左佢一拳似乎都有點驚訝，佢好快咁掙脫，仲用另一隻手揉。
睇黎我頭先真係大力左小小。
但點解硬係覺得有D奇怪…
樂：「哼，把口講到自己幾咁大仁大義，但殺到埋身咪始終露出自己本性，你呢D咁既人諗住靠轉校就可以幫自己洗底？重新開始？唔好笑死人啦陳煒明！
」好似個日既阿偉…
樂：「就算我今日報唔到呢個仇都好，我都唔會俾你好過！我要你一世都生活係陰影之下！你親手害死左同一個人兩次！
」兩次？點樣兩次…喂！！
佢居然突然衝出馬路，當時仲要有一架車好快咁駛緊埋黎，只差小小就撞到佢。
點解係只差小小？因為有人拉左佢返黎。
拉佢返黎既人，係晨哥，無錯佢又係唔知邊度彈左出黎，仲緊緊咁箍住阿樂條頸。
晨：「玩夠喇，過左火位啦。條命唔係可以俾你咁玩。
」佢一邊講一邊扯住阿樂既頭髮，用力到好似想扯走佢D頭髮咁。
事實上，佢真係做到，仲要唔只頭髮，成塊臉都扯左出黎，我同Ellie都嚇到叫左出聲。
晨：「俾大家睇下你既真面目喇，張穎怡。」
晨哥叫呢個人做張穎怡，係一個我唔識既名，但係阿樂塊臉下既人居然係我一個識既人。
Kathy。
我：「點解會係你…？
」面對我TVB式既提答，Kathy並無直接咁回答，而且啤左我一下，之後就掙脫左晨哥既束縛，仲想搶返晨哥拎住既個塊臉。但晨哥當然唔會咁簡單就俾佢搶到，佢一手就掟走左塊臉，掟左去一個女仔既手上，而個個女仔…
就係愛麗絲。
點解呢兩個人都會係度既…
愛麗絲拎住塊臉，一步一步行埋黎我地呢邊，當佢行過我身邊既時候，佢件將塊臉交到我手上。
愛麗絲：「我地終於見面喇，張穎怡。」
Kathy：「你係邊個！我唔識你架喎。」
愛麗絲：「哦？口口聲聲話要向七星報仇，但連企係你面前既人係七星你都唔知？
」「果然，你只係比人利用左，真係可憐。」
Kathy：「咩比人利用，我唔明你講緊d乜，你地係幾時發現係我黎。」
晨：「嘛…好早就發現左喇其實，只係一直都無辦法引你現身啫。不過講開又講，塊臉既手工真係唔差，同你哥哥張相比有九成似。仲有個聲音模擬器，都係高科技野黎。」
「同埋你居然可以洗底洗得咁徹底，以你本身屋企既能力，我唔相信可以做到喎。
」Kathy：「係，的確係有位好心人幫我，呢個身份，面具仲有變聲器，全部都係佢提供比我，為既就係幫我向你地報仇！
」愛麗絲：「果然係咁呢，咁你個位所謂既好心人，又係點同你講你哥哥件事呢？」
Kathy：「佢將我哥哥既遺書交左比我，上面清清楚楚寫住我阿哥係聖所羅王書院入面受左幾多委屈，仲要係最無助既時候比最相信既朋友背叛！所以佢先會自殺！」
「一切都係因為你地！仲有班七星！」
晨：「先撇除阿明佢地唔講，點解你會覺得會關七星事？」
晨哥好似開始感到疲倦，打起喊露上黎。
Kathy：「因為一切都係因為阿偉同阿傑而起，唔係呢兩個七星睇中我阿哥出身低微而要玩佢，阿哥根本唔會走上呢條路！所有七星都係咁！所以我要對全部七星既人報復！」
晨：「所有七星都係咁…呢句野肯定都係你個位好心人同你講架啦？」
Kathy：「無錯，我阿哥就係呢班七星害死！」
晨：「唔…咁如果我話你個位好心人其實一直都呃緊你，你會點？」00