Ellen如願以償,選到佢既學生會,只係差左未上任。

Sarah開始有自己既朋友圈,阿希佢地仲封左佢做女神,全個Form 5都追捧緊佢。

而Anna,佢出眾既運動神經已經令佢名聲大噪,描述到佢好似十項全能,上天下海都難唔到佢咁。

至於Ellie同Yui,雖然佢兩個無好似Sarah佢地咁出名同出眾,但佢地都叫做過得開心。

我?我都唔知,我好似無乜目標咁,見到佢地五個係呢度過得開心,我就自自然然覺得開心。





可能我自己心入面就係想咁啦。

Ellen:「呀!!好煩呀!!!點解要做就職演說呀!!! 」

我:「咁我個陣都要啦,你乖乖地寫好份稿啦。 」

Ellen:「我唔寫喇!!嗚… 」

佢講到一半就撲左埋Yui度扮喊,Yui見到咁唯有摸摸佢個頭,苦笑兩下。





Anna:「唉,等我幫你寫吧啦,反正以前都係我寫既。」

Ellen:「真係既!?唔該你呀Anna!!錫啖先!! 」

Anna:「喂唔好啦..喂呀!成臉口水啦! 」

成班人,係我個細廳玩得咁高興。  

有D眼訓添…





Ellie:「阿明?」

我:「嗯…Ellie?做乜呀…?  」

Ellie:「呢句應該係我問先岩啊,你係度做乜?」

我:「有少少眼訓啫。」

Ellie:「我係指你最近好似好呆滯咁呀,好似做乜都無心機咁。」

我:「唔係吖,我最近係學校好開心呀,你唔覺咩?」

Ellie:「咁因乜而開心?」

哇咁既問題好難答喎,話說Ellie今日做乜咁古怪既係度問長問短既。





我:「咁我諗我係…」

大家姐:「喂你地係度玩咩呀~~試下我整既蛋糕啦~~我朋友教我整架~~  」

哇多謝大家姐,你又救左我一命。

佢地幾個一聽到有蛋糕食就即刻拋開手頭上既野唔理,就唯獨Ellie為所不動,繼續坐係我旁邊。

但佢對眼已經望住件蛋糕。

我:「過去食左先啦,有乜一陣再傾都得架嘛。 」

Ellie:「咁…」





我:「再唔過去就會俾佢地食哂架啦~」

Ellie無再應我,而係走左過去拎蛋糕,不過,佢拎左兩件返黎。

Ellie:「我地一邊食一邊講咪得。 」

佢始終都唔係放過我,我唯有舉手投降。 

我接過蛋糕,深深咁吸一啖氣。

我:「其實可以見到你地唔洗好似煩咁多野,可以開開心心咁係學校過日子,就已經係我開心既理由啦。」

屌,我講講下間房居然突然靜左落黎,當我講完既時候,佢地個個都眼甘甘咁望住我。

我都唔知點俾反應好,唯有拎起隻叉,一邊望住佢地一邊食啖蛋糕。





我同佢地幾個對望左一陣,直至Anna忍唔住笑左出聲,沉默先被打破。

Anna:「唔得,忍唔住喇我,傻仔明你d語氣成個阿伯咁。 」

我:「咩呀,都唔知你講乜。」

Anna:「你D語氣好似D爸爸見到D仔女有幸福咁呀哈哈。」

Ellen:「係呀係呀,真係超似!仲要係D就死既爸爸會講既野咁! 」

大家姐:「所以幾時都話阿明係最好既~~又溫柔又體貼又識關心人,我最鐘意阿明架啦。 」

大家姐一邊講一邊跑埋黎,仲係咁用塊臉磨我塊臉,搞到我成臉都係Cream。





最重要係咩?佢咁樣又迫我食波餅呀!!條褲好緊呀!! 

Sarah:「喂呀大家姐,快D放開阿明啦。 」

大家姐:「吓唔好啦,俾我攬多陣啦~ 」

大家姐…講還講,唔好再un得唔得…會嘈醒巨龍哥架…

於是者,又顛左一日。

直至夜晚,自己一個人既時候先諗返起Ellie講既野。

最近好似好呆滯咁呀,好似做乜都無心機呀…

其實佢咁講我先發現自己好似真係咁。

最近我係學校都係掛住留意Sarah佢地,睇下佢地過得開唔開心咁,但自己就好似無乜世藝咁。

可能自己真係咁犯賤,把口就話想過平凡生活,但到真係開始有呢d貼地既中學生活,自己就唔知點算。

我好似等緊下一件事發生咁。

講開又講,唔知Kathy點呢?

佢會唔會已經諗通左,定係仲係好憎我呢?

如果佢仲係想報仇的話,我又應該點做..唉屌,岩岩先講完,而家又走去諗呢D野,我係咪真係痴線架。

屌,都係去訓覺算。

到第二日,又係新既一日。

阿豪:「大家,Miss Leung尋日提左我,叫我地今日要決定好旅行地點喎,咁不如今日午讀時候投票決定? 」

一提起旅行,我就feel到班上既氣氛好似有D古怪。

好似有種殺氣彌漫緊咁,你知啦,我feel呢d野都幾準下架。

呀,阿豪係我地班既班會主席。

旅行…睇睇手冊係十二月尾搞,而家都差唔多十一月,都差唔多係時候決定啦。

阿希:「喂阿明,你有無咩心水地方?」

我:「咁學校旅行黎黎去去都係個d地方架啦,我就無乜所謂既。」

阿希:「喂咁得啦,我一陣就去收下風睇下A班會去邊度旅行,我地一於跟埋佢地一齊去! 」

我:「A班?點解要同A班既?」

阿希:「喂,你傻架,A班有新晉女神Sarah喎,緊係把握機會啦! 」

係喎屌!今次仆街喇!!