「無啦啦多左幾個家姐同細妹 Season 2」: 在乎
型，係有代價既。
件事好快就係學校傳開左去，仲上哂Serect。
班上既人都開始問我到底係咪真，我都好坦然咁承認左。
不過，我仲未同大家講其實我仲有四個女朋友…
唉都係煮到埋黎先食啦，以前聖所羅王個陣都係咁架啦。
講起學校，今日係派測驗成績單既日子。
之前個UT我全部科都不過不失，起碼全部都合格先。
妖，我不嬲都唔care成績架啦。
無期望就唔會有失望，果然當我拎到張成績單個陣，我泰然自若！哈哈！
屌，全班名次頭半，全級就全部都五十名左右，ok啦。
阿希：「哇屌你阿明幾好野喎，有咩計架醒兩招黎啦。」
阿希攤屍攤左兩日就已經復活，變返好似以前咁精神。
我：「計？無架我都無溫書。
」阿希：「所以咪問你有乜計囉。
」睇到佢個仆街仔個奸笑樣我先明佢所謂既計係咩意思。
我：「無呀食屎狗，我唔做呢D野。
」阿希：「車，咁無癮架。喂Cody，今次考成點呀。」
Cody：「咪又係咁，嗱。」
Cody佢一臉不在乎咁show左張成績單比我地睇，嘩科科都係全班頭三！？
我：「嘩乜你讀書咁勁架？
」Cody：「係咪太勁嚇親你？我唔同你，我唔會只係掛住拍拖。
」我：「咩啫，因為晨…」
我只係講左個晨字，佢已經啤到我實一實，好似警告我再講落去我會有事咁。
算囉，唔講。
派左成績單之後無耐，我地就到左週會既時間。
今日，就係「Eden」正式上任既日子。
尋晚我睇到Ellen同Yui skype到好夜，內容都係討論今日既事。
佢地準備左咁耐，終於都黎到呢一日。
週會既首部分係上屆學生會進行年度匯報，報告過去一年佢地做成點，財政盈餘有幾多，當初競選承諾兌現左幾多咁。
我聽到幾乎訓住咁濟，如果唔係我用意志力抵抗，想聽Ellen佢一陣演講，我諗我一早就訓著左。
不過，如果我當初無退學，留係聖所羅王同阿惠佢地搞學生會的話，我諗我都要好似台上面班人咁做present。
一諗到咁，就忍唔住打左個冷震。
「接下來係學生會既交接儀式，有請兩屆學生會既內閣成員上台。」
係一遍掌聲下，Ellen同Yui，仲有一眾Eden既內閣成員開始出現係大家面前。
上屆既學生會開始一個個咁將一個扣針咁既野扣係新一屆學生會既身上。
當所有扣針都交到去「Eden」既身上既時候，台下再一次傳出更熱烈既掌聲。
Ellen就係呢遍掌聲中，走到去講台，準備發表佢既演說。
Ellen：「咳咳，校長，各位老師，各位同學，早晨，我係新一屆學生會會長，5A班既陳海倫。」
「首先，我會向各位介紹我既內閣成員。」
Ellen做正經野既時候真係特別認真，好有台型，簡直天生一副領導者既材料。
Ellen：「以上既就係黎緊一年會同我一齊努力服務大家既成員。」
「其實我無諗過自己真係可以選到，當日點票個陣我甚至一個人匿埋左，好怕面對結果。」
「咁並唔係因為我覺得自己能力唔適任學生會一職既要求，而係因為我既身份。」
「相信在座唔少同學都知道我其實係今年九月先轉校黎到呢度讀書，有唔少人都會因此有個疑問。」
「一個岩岩轉校黎既人就話要選學生會，仲要做會長，會唔會太不切實際？」
「的確，就連我自己都曾經都有個呢個疑問。但係我身邊既人一直鼓勵我，叫我想做就去做，只要有信念一定可以感動到人。唔需要在乎人地點睇。」
「事實上，我起初籌組內閣既時候只係得兩個人，但不斷有人加入，佢地都話係被我既熱誠所感動到。」
「最後，我地仲得到咁多位同學既支持，成功當選，真係好多謝各位。」
佢講完呢句深深咁向台下鞠左個躬，得到好多掌聲。
Ellen：「我想講既係，一定要有信念同堅持下去既決心，只要有呢兩樣野，總會有人支持自己。」
「黎緊既一年，就等「Eden」陪大家一齊走啦。」
「真係好多謝大家支持「Eden」，當日無投比「Eden」既同學，我地會透過行動贏取你地既支持。」
「多謝各位。」
佢講完既一瞬間，掌聲猶如雷動，響遍成個禮堂。
佢終於做到學生會會長啦。
週會過後，「Eden」收到唔少好評，lunch time個陣Secret已經全部都係有關Eden既post。
Ellen睇到咁就興奮到攬住Yui係咁跳下跳下，係咁話得左啦得左啦咁。
無錯，Ellen終於同返我地食lunch。
今日我地六個人一齊去左食譚仔，引黎好多目光。
目光既來源，大部分都係我地學校既學生，仲要係集中係我身上。
咁錯愕既目光，我都已經明白發生咩事。
真係唔好意思呀咁多位。
Ellen：「阿明我食唔哂呀夾D比你吖。
」我：「哦..好啊。」
Sarah：「我都係吖，我都比D你吖。
」就係咁，我個碗已經食左一半既米線變到仲多過未食之前，好似有一碗半過橋米線既份量咁。
Anna：「唔好浪費食物呀傻仔明，食哂佢。
」痴線架咁樣食哂我嘔硬架喎，想收買人命咩。
當然，我並唔係穆先生，唔可以將不可能化成可能，最後碗米線食剩一半多D我就已經食唔落。
收碗既時候個阿姐仲用個不屑既眼神望住我，真係幾撚無辜，大佬呀我食左三碗份量喇。
Anna：「係喎，後日個萬聖節Party你地會唔會去架？」
萬聖節Party？咩黎架？
Ellen：「你講域天同聖殿搞果個？我屋企收到邀請信，會去呀。」
Anna：「係呀，咁一齊去？Sarah你地呢？」
哦，原來又係D有錢人party。
Sarah：「我唔知有無收到喎，Yui你知唔知？」
Yui：「最近D信唔係我處理，我都唔係好清楚…
」我：「咁返去問下大家姐或者二家姐囉，咩公司搞話？」
Ellie：「域天同聖殿呀阿明。」
我：「哦，咁我返去問下啦，今晚覆…」
咦咪住先…域天個名咁熟既…
咪就係之前撩二家姐個條mk仔既公司！？