「無啦啦多左幾個家姐同細妹 Season 2」: 逃避
呢次之後，我都無再見過二家姐。
明明我地同一屋簷下，但真係完全見唔到佢。
佢好似一直都將自己鎖係房入面，好似匿左入山洞咁。
屋入面唯一可以同佢接觸既就只有大家姐一個，連二家姐佢最錫既Sarah都唔比入佢間房。
大家都想從大家姐口中得知二家姐到底咩事，但係大家姐一句都唔肯講。
咁樣既情況，已經持續左兩星期有多。
今日Anna佢地幾個久違咁一齊黎左我屋企玩大富翁。
Anna：「喂你踩到我個黃大仙！快D比錢！
」Ellen：「比幾多呀…哇你幾時起左酒店架！
」Anna：「嘻嘻，失禮失禮。
」Ellen：「痴線架邊個會係黃大仙起酒店架！Ellie呀借D錢比我啦好唔好？
」Ellie：「唔得，遊戲要認真玩先有趣。
」Ellen：「咁我唯有投降lu~」
Ellen舉手投降，之後走埋黎我旁邊坐低。
係，其實我一早就輸左，坐埋一邊睇佢地玩。
玩大富翁我真係唔夠佢地黎。
我：「終於有人黎陪我喇哈哈。
」Ellen：「唔好嘈！我而家輸左好唔高興！
」嘩，發脾氣呀？好囉。
我照住佢既吩咐，唔嘈，自己一個玩電話。
Ellen：「喂你真係唔理我架？安慰下我都好吖。
」哈哈，都估到你架喇，女人。
我：「唔好唔開心啦，下鋪再黎咪得，Game黎咋嘛。
」Ellen：「下鋪我做banker算lu~心很累~~
」我：「玩大富翁玩到心好累？會唔會呀？
」Ellen：「唔係大富翁啦，學校個邊好忙吖。」
我：「學生會？好忙咩你以前都係咁做架啦。」
Ellen：「嘩你唔好話呀，真係好忙架，忙過以前一百倍添。
」「日日都要處理好多野，賣水賣文具既數要日日埋，仲要黎緊學校旅行，又要準備定D燒烤用品賣，好多野要做呀~~~
」佢講講下就成個挨左落黎我大脾度，係度踢腳，好似練游水咁。
我：「但係你做得開唔開心？」
Ellen：「咁你咁講一講，我又真係覺得雖然好攰，但係好開心喎哈哈。
」佢露出一個天真爛漫既笑容，一個我地呢個年紀應該有既笑容。
啊係喎講起旅行…
我：「你地班旅行去邊度？」
Ellen：「我個班就去西貢，係黃大仙起酒店個個就去清水灣，Ellie同Yui就去石澳囉~」
我：「點解你會知道哂架？」
Ellen：「你係咪傻架，我係學生會主席呀，要幫手統籌架點會唔知。
」佢講完就拎左塊曲奇食，無錯，係我條褲上面食。
我：「喂食好d啦，我成褲都係餅碎啦。」
Ellen：「你話咩話？」
嘩屌！噴哂D餅碎出黎都有既你！
Ellen：「哈哈低能仔！
」Ellen捧腹大笑，仲走左過去叫佢地四個睇，不過多得咁我對腳先重獲自由。
嘩呢條友漏口架，咁多餅碎既。
我拍拍條褲，想話整走D餅碎。
之後我索性走去廁所，抹下塊臉。
去完廁所出返黎，就俾我見到蘭姨。
蘭姨：「少爺你係度就岩喇，老爺想見你，叫你去書房搵佢。」
Uncle終於返左黎香港？
幾乎每次Uncle叫我去見佢都無乜好事，我估今次都唔例外。Uncle：「黎左嗱阿明？坐喇。」
Uncle係書檯度睇緊一疊疊文件，望都無望過我一眼，但又知道係我黎左。
我一步一驚心咁走到去書檯前面坐低，點知我一坐低佢就好大力咁合埋其中一個文件夾，嚇到我鳩都縮埋。
Uncle：「啊，嚇親你？唔洗咁拘謹喎阿明，我地傾下偈啫。」
你次次都係咁講架啦…
我：「咁…你想傾乜啊Uncle…」
Uncle：「咁啊…傾下個萬聖節Party好無？」
嗱我都話左你架喇..我都知道你係想搵我講呢件事架。
我：「睇黎Uncle你都知道哂喇，我承認自己係太衝動，差D又累左大家。」
Uncle：「唔係唔係唔係，我唔係想責怪你，我反而係想多謝你救左麗晨就真。」
多謝我？我有無聽錯呀？
我：「但係我…」
Uncle：「其實呢個的確係當時唯一既方法，如果你唔咁做，麗晨就要繼續係咁多人面前出醜。」
「而且去到最後，你都無俾全世界知道你就係個蝙蝠俠，咁咪得囉。」
佢講完之後就係旁邊既櫃桶拎左當晚既蝙蝠俠面具出黎，搞到我好鬼尷尬。
肯定係大家姐俾佢。
我：「咁…我係咪走得喇？佢地仲係細廳度…
」我已經稍稍企左起身，想一等佢批准就即刻走人。
Uncle：「其實你覺唔覺得自己已經無可能做返普通人。
」此話一出，我即刻不由自主咁坐返低。
我：「Uncle…你咁係咩意思…我不嬲都係一個普通人…
」Uncle：「阿明，無可能逃避足一世架，你終有一日需要面對呢個事實。」
「就算係而家，我唔逼你，唔需要你去接觸呢個圈子，呢個圈子都會主動去搵你。」
「你有無發覺你兜兜轉轉最後都係會涉足入去呢個世界？」
佢到底想我點…
我：「你唔通打算要我…」
Uncle：「出去喇，我想睇埋D文件先。」
吖你而家先叫我走？當我係乜呀？
我想繼續問落去個陣，突然有人入左黎，係大家姐。
大家姐：「eh… Daddy，阿明，有兩個七星黎左…係張氏同游氏，佢地話想見阿明，係偏廳等緊。
」諾儀同阿雪？Uncle：「唔好要人等你，去喇。」
我都深明唔可以要客人久等呢個道理，所以我暫時收埋心入面既疑問，跟大家姐走。
不過係走既，我不經意咁回頭望左一眼。
Uncle居然雙手捂住自己塊臉，完全就係「他一直在玩命.jpg」咁。
奇奇怪怪咁，定係只係佢太攰？
之後我行到去偏廳，發現好嘈，原來佢地轉左game玩層層疊，阿雪都有份玩。
唔知係咪我行路行得太大力，我一黎到個層層疊就冧鬼左。
咁岩，係輪到Ellen，係，佢又輸左了。
Ellen：「呀明！！！
」佢好嬲咁拎其中一舊積木衝埋黎係咁打我，打到我心口幾乎凹落去咁濟佢先肯收手。
諾儀：「我地黎有無阻住你地吖阿明，我見你好似有野做緊。」
我：「哦，無，小事黎啫唔好介意。你地黎係咪有乜事？」
雪：「咩呀上次咪話會搵日黎拜訪你囉，只係最近有D事要處理埋先遲左啫，你咁就唔記得嗱？」
啊好似有件咁既事。
諾儀：「唔好意思吖…明明七星應承過你唔會騷擾你同你屋企人。但我地黎左…」
雪：「咩啫，我地係以朋友身份黎架。所以唔關事！
」我：「哈哈…我就無乜所謂既，係睇下我班大帝…」
我望一望我身後，想睇下有無殺氣。
結果係無，佢地幾個全部都一臉懵懂咁望住我。
Sarah：「做乜呀阿明。」
我：「無事喇，你地繼續啦。」
之後我地咁多個都逼哂係個偏廳度玩，大家都玩得好開心，快活不知時日過，要大家姐黎話我地知我地先知道原來已經天黑。
諾儀：「咁我諗我地都係時候要走喇，有機會再一齊傾下偈啦。」
Sarah：「你地唔一齊係度食飯？」
雪：「唔喇，我地仲要去一個地方，多謝你地呀我好耐無試過玩得咁開心。」
我：「咁我送你地出去喇。」
諾儀：「好，麻煩你喇。」
Ellen：「我地都一齊送喇。」
我：「唔洗喇，你地專心玩，等我送就得。咁多人行座野又會冧架喇。」
佢地五個一致望住座層層疊，即刻輕手輕腳坐返低。真係可愛。
就係咁，最後都係我一個人送阿雪同諾儀走。
去到門口個陣，諾儀突然遞左一張卡片比我。
諾儀：「有乜野要幫手的話，記得搵我地，上面有我地聯絡方法。」
雪：「唔洗怕唔好意思架，我地一定會幫你。
」我：「哦…好啊多謝你地先。」
諾儀：「保重。」
保重兩個字之後，佢地就離開左。
今日大家都好似奇奇怪怪咁嘅…