「所以阿明聽我講,唔好去做咩傻事,好似之前咁開開心心同Sarah佢地讀書就得喇。」

大家姐都講到咁,我仲可以講乜。

呢一刻我可以做既,就只係借個膊頭比大家姐挨住。

點解次次我都係除左等之外咩都做唔到架…

我真係…唉唔識講。





前幾分鐘我仲誓神劈願話要阻止呢件事發生,而家就…

我真係唔想大家姐同一個佢唔鐘意既人結婚…佢雖然唔係我親家姐,但佢對我真係同親家姐完全無分別…

我想佢都可以開開心心咁生活…

之後我地扮都咩事都無咁去接羽晨,係大家姐叫既,佢仲專登去一次洗手間補補妝,以免比羽晨睇得出佢喊過黎。

羽晨見到我地去接佢放學開心到不得了,彈下彈下咁跑過黎,同一個小天使無分別。





睇到羽晨,個心的確係幾溫暖,但係就係開心唔到,個心始終un住un住。

一個天真無邪既小朋友,無憂無慮,自然特別可愛。

我都想可以好似羽晨咁…唔係,我係想大家都可以好似羽晨咁,咁一定會少好多煩惱。

羽晨:「大家姐~!我想食雪糕!」

大家姐:「好~~羽晨你想食乜大家姐都買比你食~」





因為羽晨既撒嬌,大家姐就帶住我地去附近商場一間高級朱古力店度買左三杯雪糕,俾我地一人一杯咁邊行街邊食。

之後大家姐仲帶左羽晨去公園玩,兩姐妹係公園你追我逐,場面相當溫馨。

我有無野係可以做到架呢…

見到呢遍景象我就開始諗呢個問題,我應該點都有d野可以做到先係架。

「要解決問題,第一樣要做既就係先去了解成個問題,唔可以睇透成個問題係解唔開既。」

呢句說話係以前小學既數學老師同我地講既,真係講得好。

如果我可以了解到成件事既始末的話,或者我都可以搵到d位係可以幫到手。

想知道成件事既來龍去脈應該要去搵Uncle定係二家姐好呢…?





都係去搵二家姐喇。點解係二家姐唔係Uncle?因為我覺得我同二家姐岩傾D,只要我問到的話,二家姐應該會肯講既。

加上之前個埸Party之後我覺得Uncle對我好似有D奇怪,可以的話都係保持距離先好D。

Sarah:「阿明,大家姐!你地返黎嗱?」

我地三個一返到屋企就受到Sarah同Yui既歡迎,佢兩個仲即刻拉左我埋一邊。

睇怕佢地都係急住想知道大家姐到底發生乜事喇。

大家姐:「哈哈,唔好意思啊Sarah,Yui。我借走左阿明咁耐,而家還返比你地喇。 」

大家姐雖然笑得比出去之前自然,但始終都睇得出係扮出黎。





Sarah:「哈哈,唔該哂大家姐,咁我地就帶走佢喇~ 」

Sarah隨隨便便咁同大家姐講低一句之後就同Yui夾走左我,帶左我去Sarah間房。

Sarah:「點啊點啊,大家姐佢到底咩事? 」

Yui:「我好少見到大家姐咁樣…佢無事吖嘛…」

應該點講好呢…大家姐又叫我唔好講出去…

我:「無,大家姐佢只係有少少感情上既煩惱啫,我開解左佢架啦,而家就等佢自己靜下諗下吧喇。 」

咁講應該係最好喇,感情問題係最common架喇。

Sarah:「係啊…估唔到大家姐都會有呢d煩惱… 」





我:「嗯,好似係因為佢鐘意既人要同一個唔鐘意既人結婚,所以佢先咁唔開心囉。」

都係講到呢度好喇,再講落我怕自己會講漏口。

我:「無乜野的話我返房先喇,頭先同羽晨係公園玩流左唔少汗,想去沖個涼先。一陣再黎同你地溫書好無?」

Sarah:「咁我地一邊溫一邊等你喇~」

我:「嗯,一陣見喇。」

趁而家去搵二家姐…

我離開左Sarah間房之後就靜靜雞咁行左去二家姐間房門口。





我禮貌地敲左兩下門,但係同之前一樣,都係無人應門。

佢到而家都唔想見我地,定係只係唔想見我呢其實?

但事態嚴重,唔理得咁多喇,對唔住都要做一次!

「失禮啦!! 」

我講完呢句之後先推開度門,大步咁行左入去。

但我入到去之後,成個人傻左咁企係度。

間房入面所有二家姐既野都無左,衫都無一件。

「麗晨的話,一星期之前已經搬走左喇。」

就係我仲未適應到到底發生咗咩事既時候,Uncle把聲係我背後傳黎。

我:「你話…二家姐搬走左? 」

今日咩事,震撼彈一個接一個咁黎既?
Uncle:「係。」

喂唔係一個「係」字就可以過骨吓話?起碼你都解釋一下件事呀!

點解我開始愈來愈唔鐘意佢,明明係一家之主,但佢好似乜都做唔到咁,仲廢過我!

我:「係咩事,點解二家姐會…」

Uncle:「想知既話就跟我黎,呢度講可能會比曉晨同泳琦佢地聽到。」

好!就睇下你有乜想講!!

我嬲爆爆咁跟住佢去到書房,就係為左等佢既解釋。

但係面對我既怒火,佢居然仍然氣定神閒,好似對我視若無睹咁!

一諗到造成而家呢一切既人係佢,我就嬲到想拍檯。

Uncle:「你岩岩係問我點解麗晨會搬走吖可?」

我:「係,二家姐係度住得好地地,點解會無啦啦搬走?」

Uncle:「大概…係因為唔滿意我處理公司危機既方法掛。」

我:「你係話要大家姐結婚既事?」

Uncle:「嗯,睇黎家晨已經同你講左喇,咁我就可以慳番唔少時間喇。」

「我地公司係呢一兩個月內不斷俾人狙擊,除左生意被搶之外,仲有一部分股票開始被人收集,有唔少股東都開始收到神秘人既聯絡,話有興趣收購佢地手上既股票。」

「而家,事態已經去到一個非常嚴重既地步,行錯一步的話公司都可能會落入人地手中。」

我:「咁你就決定賣女去換錢?」

Uncle:「我都唔想咁做,但如果我地唔搶先一步將分散係出面既股票都收集返黎的話,公司就會落入人地手中。」

我:「到底係公司重要定係自己仔女重要?你犧牲個女既幸福去保住你份身家? 」

Uncle:「講到尾會變成咁都係因為你!對方係衝住你而黎架你知唔知! 」

Uncle一反常態,對我破口大罵,大聲到有回音。

我當堂嚇到傻左。

因為我…?衝住我而黎…? 「人地係因為你過去一年既事跡所以先狙擊你呀你知唔知?」

我…過去一年?

過去一年…我做過D乜…?

做左Sarah細佬,識左Ellen同Ellie,之後同佢地咁多個一齊咗…

係咁多喇應該…有乜值得人地去狙擊? 

「衰仔,你無事吖嘛,見你同阿曹傾完之後成個人就傻下傻下。 」

係老母?幾時入左黎架我完全發現唔到既。

我:「阿媽,我…」

「我無事」呢三個字係呢一刻真係講唔到出口。

如果Uncle講既係真,咁即係話搞成咁既人其實係我…

係我令到屋企公司比個痴線佬狙擊,令到大家姐要同一個佢唔鐘意既人結婚二家姐搬咗出去…

呢一切都係源於我…?係我搞到大家都咁唔開心..?

老母:「仔!」

老母突然係我耳邊大叫,嚇到我個心都離一離。

但係多得咁,我先可以擺脫我自己既無限沉思,返到黎現實。

我亦搵到自己搵緊既答案了。

我:「阿媽…我…其實唔應該出世?如果我而家死左,屋企所有問題係咪都會解決,大家都可以開心D?」

「啪!」

我得到既,係一下爽快既巴掌。

清脆既掌摑聲響徹成間房。

好痛,但我唔識比反應,連擰返塊臉返黎我都做唔到。

老母:「衰仔,我咁辛苦養大你,你走黎同我講呢D? 」

我:「但係如果無我…你一早就可以自由自在咁過你既生活,唔洗同我一齊捱,搞到以前成日比阿叔打… 」

老母:「但係如果無你,我可能連人都唔想做喇。 」

我係咪聽錯…?我老母居然會講呢D野?

驚訝令我不自覺咁擰過去望住老母。

我見到既,係一副慈祥既臉孔。

我記得自我中學以來,我都無再見過老母咁既樣了。

老母:「我唔知道大家呢排係咪因為你先咁唔開心,但我有樣野好清楚,就係如果而家無咗你的話,大家都會好唔開心。」

「大家都係因為想保護你,想你開開心心咁讀書先咁奔波勞碌。」

「如果你就咁死咗,阿曹,家晨同麗晨既努力咪白費左囉?係咪呀傻仔? 」

我:「但係我…我真係想做返D野,明明人地目標係我,無理由要Uncle佢地…」

「我一定有D野可以做到先係架…」

老母:「如果你真係咁諗的話,咁你就去搵佢喇。」

我:「佢? 」

老母:「呢個係你二家姐而家既地址,原本係留俾我係屋企有乜事既時候可以去搵佢返黎,比你喇。」

老母講完之後就俾左張紙我,上面有一個地址,係西貢黎。

老母:「阿媽我雖然唔知到底發生乜事,但你大個仔架啦,要學識變強,去保護身邊既人,知唔知?」

嗯,我的確實在太弱喇,明明每次我都察覺到呢個問題,但我每次係問題解決左之後就唔理。

結果就搞成而家咁。

唔可以再咁落去喇。