之後,我乖乖咁按照二家姐既說話去做,好似平時咁過日子,同佢地一齊溫書,應付考試。

當然,我都有特別注意周圍啦,睇下自己附近有無咩人用D奇怪既眼光望住自己。

因為二家姐話過針對我既人應該長期觀察住我,留意住我既一舉一動嘛。

但係又無乜奇怪既人喎,個個都正正常常,無人有可疑。

Ellen又同我查過一次學生名單,全校既人背景都同唔到件事扯上關係。





咁都正常既,學校既大家都係一直係度讀書,應該唔關事先係。

如果唔係學校的話,即係個個人平時係係外面stalk我?

唔…睇黎出入要特別小心先得啦。

好彩我醒目,叫左Anna呢排安排阿標同其他保鏢黎接哂佢地五個返去啫。

又欠左Anna老豆一個人情喇,搵日要去拜訪佢先得。





不過要等一切都解決左先得。

阿希:「喂阿明搞乜呀,面色咁差既?尋晚同班女女大戰左三百回合黎呀? 」

屌你阿希,成日都係我諗緊野既時候走埋黎既。

我:「你真係滿腦子都係呢D野架喎,點呀岩岩數學考試識唔識? 」

阿希:「痴線梗係唔識啦咁鬼難。喂係喎一陣放學有無時間?同我出旺角吖我有盒模型想買。」





我:「但係聽日要考bio,我想返去溫書喎,你叫黑仔陪你啦。」

阿希:「屌咪撚提佢,條友仔去完個旅行就奇奇怪怪,食左炸藥咁款。」

我:「吓咩…」

Cody:「喂咪阻住條路啦,人地唔洗行架?」

我:「啊Sor。」

屌,唔識行旁邊架咩,係都要係我地中間行。咦咪住先…

我:「喂唔通黑仔係因為旅行威唔到比Cody睇所以…」

阿希:「屌,唔知吖我都,喂講左陸運會單野先,你有無報乜野?」





我:「有呀報左100米囉,做乜呀?」

阿希:「岩啦你報得100米即係你都係跑得之人啦,同我跑多個4x100吖。」

吓,班接唔係已經決定好人選喇咩做乜仲叫我跑4x100?

阿希:「屌你唔知學生會搞左個學會接力賽咩?贏左既學會有場地優先權架。 」

我:「我地動漫soc要場地優先權黎做乜,你想係籃球場跳lovelive? 」

阿希:「你都傻,你肯跳我都唔同你癲呀,個場地優先權可以用黎賣架嘛。 」

我:「吖你個衰仔又幾好諗頭,不過考完個試先諗人選好似好d,遞左form先啦。」





又好似幾有趣咁喎,同埋如果贏到的話我可以叫Ellen大肆宣傳,俾個條友睇…
經過呢場小小既討論之後,我同大家又再度投向數學考試既懷抱。

都唔明點解要另外考一次數學MC,麻鬼煩。 

所以我全部都亂填,嘻嘻,由運氣作主。

一個鐘話都無咁快就過,咁又考完一科喇,差聽日科BIO同中文說話就考哂所有試,爽。

去接埋佢地五個就返去溫Bio啦…一於咁話。

阿希:「喂阿明,出面有人等緊你咁喎。 」

等緊我?嘩搞乜佢地幾個咁快就黎到架,我呢邊都係岩岩收完卷咋喎。 





五個大美人企係班房門口,自自然然就引黎大家既目光啦。

呢排多得阿希把死人口,幾乎全班人都知道哂我同Sarah佢地既關係。

不過大家都好好,無講D乜,只係間唔中講下其他班既事既時候會問下我知唔知,借D依笑下我咁囉。

咁樣幾好吖,又唔洗專登同人講話「嗱佢地係我女朋友,唔好打佢地主意呀。 」,咁講好鬼奇怪又尷尬,仲可能會乞人憎。 

所以某程度上阿希係幫左我既,但我又唔想多謝呢個衰仔喎哈哈。

數好卷,阿sir話走得之後我就第一時間衝出班房,走既時候我仲聽到諾賢笑我。

隨便你點笑,嘻嘻。

我:「喂點解你地可以咁早放既?早走咗啊? 」





Anna:「唔係吖,邊有得早走架你係咪傻架。 」

Ellen:「係你個班個阿伯收卷收得慢咋嘛,唉呀唔好講咁多啦快D行吧啦~~ 」

行?佢地有地方想去啊?但我想返屋企溫書喎。  

我:「你地想去邊?我仲想返屋企溫bio啊。」

Sarah:「唔係阿明你話想返去搵阿惠佢地食lunch傾下計架咩? 」

係,我係有咁講過,但我無諗過你地會揀今日喎…你地咁識揀日子既。 

算啦,去見下阿惠都好既,睇下個衰仔而家做學生會主席做成點,或者可以笑下佢。就係咁,我地六個人,另外加一車保鏢就一齊向聖所羅王出發喇。

啊唔記得講,D保鏢其實唔係企定定係學校門口等我地既,Anna安排佢地係學校對面等我地,仲要係車上面。

點解要咁做?因為我地唔想嚇親人囉,你知啦,阿標佢個樣咁得人驚,如果佢日日企係學校門口等Anna的話肯定會招人話柄啦。

一路上,佢地一直高談闊論頭先既數學考試,係咁話邊題邊題要點做,就連今年先去學校讀書既Yui都對答自如!!

但我居然愈聽愈驚,大佬我今次好似仆街了,應該炒硬。

好彩,係我仲未比「炒硬」呢個諗法拖落去谷底之前,我地就已經到左聖所羅王書院了。

又返左黎呢度喇。

都未入去,就已經透過聲音感受到入面既熱烈氣氛,因為入面真係好嘈。

Sarah:「嘩咩事咁嘈呀?」

Yui:「唔會係有人黎搞事吖嘛…?」

應該唔會既,如果係的話應該有好多警車係度啦。

我:「入去睇下咪知囉。」

一步接一步咁行入去,一入到去,我地六個人都嚇傻左。

嘩嘩嘩搞乜呀,咁多檔口既,仲要個個都係度搬緊野既?

Ellen:「哇搞乜呀?呢排有event咩?」

連出名情報收集能力超級強既Ellen都唔知?

Ellie:「有人行緊過黎喎,好似係搵我地。」

Ellie令我將視線轉返去前面,的確係有一對男女滿面笑容咁走緊埋黎。

男:「你地係咪黎搵惠哥?」

惠哥?邊個惠…哦!!佢係講緊阿惠!!條衰仔而家俾人叫做惠哥嗱哈哈! 

Sarah:「係吖我地係黎搵阿惠同Ash佢地食lunch架,你地又知既? 」

女:「你地幾位咁出名,基本上除左Form 1之外全校都知道你地,你地黎想點自然都容易估到既~ 」

「惠哥的話係學生會室啊,我地帶你地去? 」

Anna:「唔洗啦我地識路,你地返去做自己野啦,唔洗理我地。」 

男:「咁Anna姐我地就先告辭啦,你地自便~ 」

係呢對男女禮貌地向我地道別之後,我地就開始向學生會室進發。

一路上都有好多人用奇怪,定係驚訝?既眼望住同細聲討論我地,睇黎我地係度真係好出名咁喎,雖然唔知係好定壞既出名。 

啊,唔記得問頭先對男女呢度到底忙緊乜添。算啦,一陣直接問阿惠,呀惠哥咪得。 

好快,我地就入左去學生會室見到阿惠,仲有大堆雜物。

阿惠:「喂咩風吹你地幾位黎呀? 」 我:「掛住你條仆街所以咪黎囉阿惠哥~~  」

阿惠一聽我講「惠哥」兩個字之後即刻臉紅尷尬,仲開始傻笑起黎。

阿惠:「哈哈你地聽咗喇…人地要咁叫我我都無辦法哈哈… 」

屌你個衰仔明明就好享受呢個稱呼,扮乜野唔想要呢個朵啫。

Anna:「你就威啦惠哥,點呀而家係呢度做大佬呀?」

阿惠:「大咩佬吖,公僕就有我份,咩人有事都走黎搵我,當正我黃大仙咁,你睇下呢D,嗱。 」

阿惠一邊講一邊摷檯面既文件比我睇,嘩仲整冧左一棟添。

我:「係喎,出面咁熱鬧到底係咩事?有咩活動要搞?」

阿惠:「咪又一個開放日囉屌,班校董又唔知慶祝乜野要搞個開放日喎。」

我:「啊原來係咁,喂出去食飯?我都肚餓喇。」

阿惠:「喂唔洗出去食,去運動場啦,家長教師會安排左幾間餐廳去個邊擺檔。」

Ellen:「咁正?有乜食架?」

阿惠:「屌我唔記得咁多呀,好似有譚仔?我淨係記得今次又話要貼地D,應該會係D大眾化既野食。」

Sarah:「哇譚仔呀!正呀! 」

唉救命,放過我啦好嘛。 

不過肚餓都無辦法,有乜都要食架啦。

萬幸既係,學校唔只請左譚仔一間既,仲有其他野食,選擇仲唔少。真係救左我一命。

我同阿惠兩個好快就買左適合自己既野食,走左上看台坐低開餐。

至於班女?佢地咁鐘意獵食,梗係留係個邊掃蕩啦。

直至我同阿惠兩條友食完,佢地五個都仲未肯停口,真係食得。

阿惠:「上次件事解決左未?」

我:「啊,應該點講好呢,各方面都未解決掛我諗。」

雖然我都打算同阿惠傾呢件事,但無諗過阿惠會主動提起。

「知道用阿樂個名既人其實係佢個妹,但佢又失左蹤,而家又有一個我懷疑係佢背後既人用緊千方百計搞緊我。」

阿惠:「wow,大佬你一生真係充滿刺激咁喎,好似勇者係咁遭遇敵人,仲要每次都愈來愈高級既敵人。」

我:「屌咪係囉,我每次想安安樂樂過日子時候都會出事,真係屌你老母。」

阿惠:「笑,你都差唔多要習慣呢D生活啦,反正你遲早都要接手d生意,到時你都要應付呢d事。」

我:「我都知,但係我而家仲係一個學生咋,係咪應該值得有一d正常少少既生活先。」

阿惠:「係既,中學生活應該留既係一d美好既回憶而唔係呢D。」

「如果我地可以再揀一次,你會點揀?」

阿惠咁樣問我我真係有少少愕然,不過我好快就答到佢。

我:「大概都係一樣啦,我唔後悔。」

阿惠:「果然係我識既阿明,乾杯。」

我地未成年,所以係用可樂代替酒。

同阿惠食飯真係開心,真係懷念以前日日一齊食lunch既時光。

阿惠:「喂,個條友係邊個?我未見過既?」

我:「嗯?你都唔識既我又點會…」

講唔到落去,因為我真係知道阿惠講既人係邊個。

Kathy。

佢點解會出現係呢度?仲要成身都係傷同血既?