《想當年，我係跑Online入面搵到初戀》: 【5】

我陷入咗一個惡夢，無止境。

係牛奶糖將我解救出嚟，令我可以逃離肥婆嘅魔爪。

肥婆就如同毒撚一樣恐怖，嗰種強大嘅自信美，真係非一般人所能做到。

我俾肥婆玲完美嘅自信震攝住，動彈不得。

「好啦喎你！成日借啲椅掂我隻手，想點姐？鐘意我啊！？」



我呆撚咗，然後一堆問號。

佢似乎係忍受咗好耐，但明明我先係最難受。

我暗罵，仆你個街啊......你隻手成撚日都過曬界咁想點姐？依家仲要賴返落我度？傻撚咗？

當然，身為一個君子嘅我，係唔會咁講啦。

「唔敢唔敢，邊敢鐘意你啊......」我驚講咗出嚟一陣連位都無得位。



毒撚同肥婆邊個恐怖啲？兩個真係不分上下。

我一直俾個肥婆霸凌！欺凌！

成日覺得我鐘意佢，偷睇佢！

好啦講返牛奶糖啦...唔想情劇暴走變咗肥婆之戀。但對住個肥婆真係成肚都係氣，唔知你哋明唔明啦......

以上句子，就算出自靚女把口我都想兜巴星埋去，更何況係一個肥婆？



唔係話討厭所有肥婆，我只係討厭喱一件肥嘢。

直至到有一個小息，有個女仔嚟我哋班房大嗌「牛奶糖！」
 
我聽到之後就好留心，牛奶糖？乜原來我哋班有人叫牛奶糖？定喱級有好幾個都叫牛奶糖？

然後坐我前面嗰個女仔，企咗起身，係我前面行過去，我可以好清楚咁睇到佢側面。

唔算話好靚女，但幾可愛。喱一眼，我深深俾佢吸住走......

仲記得第一次俾一個女仔吸走視線係幾時嗎？嗰個好自然嘅一瞬間，感覺世界好似停頓咗。

然後隨住牛奶糖嘅離開方向望去，一個均勻嘅身材，盡管普通，但只有我睇得出佢嘅不平凡。

然後繼續望......繼續望......肥婆玲嘅面孔將我打返落地獄。



放過我啦好嗎...？我好攰呀...我粗口都廢事講啦，仆街......

「做咩又成日偷睇我啊！依家越嚟越密啦喎！」

「頭先上堂眼瞓又趴係度偷望我！你已經張開咗隻眼啦，仲以為我唔知！」

「信唔信我話俾Miss知啊嗱！？」

我條導火線由腳板底開始一路燒燒燒，燒撚到頭殼頂，真係忍唔柒鳩住。

「係啦係啦！我最鐘意你啦！得未？」我火撚滾咁勁大聲屌柒肥婆玲，盡顯男人嘅霸氣。

下一秒我就後悔了，因為我感覺到全班都望住我..........



暴牙聽到之後爆笑，「哈哈哈哈，乜原來你鐘意肥…」佢知道肥婆不可得罪，立即改口，「鐘…意啊玲？幾登對啊！」
 
幾乎係班入面嘅人都聽到曬，我百口莫辦…
 
「係囉！我都覺啊，我同啊華幾登對㗎…」只見肥婆玲發曬姣咁，咁多年嚟我都無法忘記喱個惡夢。
 
嗰一日發生咗啲咩我已經唔記得咗，唔想勾起，我嗰陣頹咗一排，連機都無打。
 
當一個男仔，可以有一日唔打機，有兩個原因：1.拍拖太開心，成日都陪女朋友 2.太頹、唔開心。
 
可想而知我嗰陣有幾頹。
 
直至牛奶糖搵我。
 
自從嗰日之後我好少講嘢，更加唔想理肥婆玲。


 
小息，我如常趴係張枱度瞓教，跟住有人敲我張枱，「喂！」
 
把音聽起上嚟幾動人溫柔，唔似得個肥婆粗聲粗氣，於是乎我坐起身。
 
見到牛奶糖擰轉個頭，望住我。
 
佢帶住一副沉重嘅眼睛，文靜得嚟卻不失可愛，笑起上嚟有幾分頑皮。
 
同佢係MSN嘅感覺幾類似。
 
「做咩咁耐都唔on MSN啊？」牛奶糖語氣充滿著挑逗，百百厭厭。
 
反而咁樣我同佢一開始就無咗隔膜，一啲都唔會覺得尷尬，我哋嘅相處係幾咁自然。



「無啊…我…好攰啊…」我亂咁講。
 
牛奶糖佢瞄一瞄我隔離，唔係度…唔知條友去咗邊，可能去咗廁所掛，食到咁撚肥。
 
「係咪因為前幾日魯芬咁樣講搞到你唔開心啊？」
 
講起又講，條友又幾似魯芬，但一定無佢咁搞笑，係一個惡死嘅魯芬。
 
「唉…唔好提啦！」
 
「咪唔開心啦，返去玩返場跑Online就開心㗎啦！」
 
奇怪嘅係，牛奶糖又知道我係司華力腸？我哋其實無見過面，只係咁啱係網上識到咁解。
 
嗯……算啦！喱啲都唔重要。
 
「好啦好啦… 」其實我都想玩嘅，只係無動力姐，提不起勁。
 
「無你同我玩無癮啊！」牛奶糖笑住講。
 
「緊係啦！要同勁人玩先好玩囉。」對住牛奶糖，我啲笑容就莫名其妙咁出返嚟。
 
我仔細觀察牛奶糖，先發覺…原來牛奶糖個波好大！大到好似要撐爆件衫咁。
 
點解我之前無留意到？
 
一定係肥婆轉移曬我嘅注意力！
 
牛奶糖要改名啦，改做奶牛糖啦……佢可以將個波放係我張枱上面，好難唔注意到㗎喎？
 
「算吧啦你，無我同你一隊？你玩四人同心早就輸啦！」
 
「咩啊！明明就係同你差嗰少少！」我反駁，只不過係遲佢少少到終點。
 
我都唔知點解佢次次跳都可以快過我，佢唔會無氣咩？
 
「你會唔會運動會嗰陣同人跑，話同人差嗰幾秒啊？講出嚟都俾人笑啦係咪？」牛奶糖把口真係……
 
同人MSN一樣咁撚串。
 
「你串少我一陣洗死咩！？係MSN串到嚟學校。」
 
點解頭先我會有「覺得佢溫柔」嘅錯覺？