《想當年，我係跑Online入面搵到初戀》: 【8】

『有咩事可以同我講喎xddddd
我哋可以同甘共苦架嘛;)
嚟啦嚟啦!!!!! 』

成段訊息都好有牛奶糖風格，表情符號都鐘意疊勁多。有人會唔鐘意，覺得MK、5P，但我就係鐘意咁樣嘅牛奶糖。

依家......喱啲符號經已變得稀有，甚至會懷念。

MK先係贏家，輝煌嘅年代溝女無數，轉個撚頭畢業後洗走陣MK味，換個韓look，有邊個會知？有邊個理你以前係點樣嘅人？



我望住牛奶糖個小馬尾，個訊息同個背影，第一次產生一種......牛奶糖唔係屬於我嘅感覺。

明明早排我哋好似拉近咗，依家又好似拉返遠咁......

如 實 在 認 真 喜 歡 我 
或 是 有 心 敷 衍 我 
......
 
直至放學，我同暴牙佢哋去網吧打機，係網吧大戰唔知幾多回合。



cs、left 4 dead咩都玩一餐。

係我最忘我嘅時候，牛奶糖打俾我。第一次打俾我。

我小心翼翼咁拎起手機，輕輕推一推。

「喂？」

「你係邊啊？MSN又唔on，陪我打機啦！」牛奶糖把聲聽起嚟有啲震震地咁。



「我係網吧打緊機啊，無on MSN啊，一陣陪你打啦。」我依家好矛盾，唔想再接觸落去，但又唔捨得佢難得咁樣搵我。

「你係網吧？邊間啊？我又過嚟打得唔得啊？」我覺得佢今日有啲唔尋常。

「下？但我同緊啲fd打緊喎。」

「唔緊要啦！一齊囉，怕咩姐！」

「我問下先啦。」我hold住個電話，問隔離嘅暴龍，「喂！我有個fd過嚟打機喎，得唔得啊？」

「屌！點會唔得啊，想過嚟咪過嚟囉，怕條撚啊？」

啊暴龍哥一嚟到網吧就粗口上身咁，講個不停。

「OK啊，你過嚟啦，我哋係I-one度。」



喱度附近係得一間I-one，牛奶糖應該知道係邊，應該係話，正常都知係邊度。
 
收咗線之後，我繼續打機。

打咗一陣，又收到牛奶糖電話。

「喂，腸仔，我係門口啦。」我暗暗奇怪。

「係門口做咩唔入嚟啊？」

「er......無..我第一次嚟網吧...門口有啲黑，我...唔係幾敢入去啊.....」

牛奶糖平時把口串過馬撚，依家竟然有嘢會驚，我真係哭笑不得啊。



「你可唔可以出嚟接我啊？」第一次覺得佢語氣咁柔弱。

「好啦好啦，我出嚟接你啦！」怕咗佢，不過咁樣又真係展現佢可愛嘅一面。

我出到去，見到佢傻下傻下嘅樣，就忍唔住串佢，之前嘅唔開心，彷彿一掃而空。

「邊有人未嚟過網吧架？」

「我又唔似你！我乖學生嚟架...」

「乖喎，我真係唔知啦屌你！」我哋邊行邊傾，同埋要幫牛奶糖開位。

我側邊又坐咗人，牛奶糖又第一次嚟，我決定轉機陪佢坐兩人位，一嚟可以有二人時間，二嚟無班蛋散嘈住，一舉兩得！
 
俾完錢，掟個靚彎行入去，牛奶糖好似未見過世面嘅大鄉里咁。



「哇！好大啊。」牛奶糖驚嘆，「原來網吧咁嘅樣架？」

「乖啦，你再係咁我就唔帶你嚟架啦！」我一路行去搵暴龍佢哋。

「屌！你好衰囉！」然後佢一嘢打落嚟，勁撚痛。

「難得你串到我，當係俾個獎勵啦，嘻嘻。」

雖然痛，但我覺得係甜蜜嘅痛，痛得嚟係開心嘅！

「暴龍，我fd嚟咗啦，喱頭無位，我同佢坐第二度啊。」

本來打緊機嘅佢哋，一見到我身後嘅牛奶糖，「WOW」



『司華力帶女嚟啊！』
『頂世界變啦！』
『啊嫂！』

「咪玩啦你班仆街！」

「哇，牛奶糖，乜你都會嚟網吧架？」暴牙同我同班，佢當然知道牛奶糖啦，佢都有同牛奶糖打聲呼。

我就係打鬧聲中順利咁走佬。

由於依家喱個位去我同牛奶糖個位，都有一段隔離，沿路我見到係網吧嘅男仔視線都停留係牛奶糖身上。

雖然牛奶糖相貌平平，但有一個傲人嘅身材，令佢整體觀感大大加分。
 
成班MK仔都望到牛奶糖實一實，到依家我先知，原來牛奶糖嘅魅力係咁大。

見到牛奶糖俾人視姦，就好鬼炆，我都唔知點解，就好似有道火係心口咁。

我懷住喱道火去打機，一坐低，我熟練地打開部電腦，等緊load入去。

而牛奶糖就坐係度，四周圍望望望，而部電腦仲係黑屏緊。

頂......唔撚係怪？

「你唔會......唔識開電腦掛？」見住牛奶糖出醜個樣，頓時覺得佢好可愛，喱一面係我平時好少見到。

對佢嘅喜歡，又增添咗幾分。

「我...哈哈，點會呢？我點會唔識開電腦啊？你戇鳩架？」