《想當年，我係跑Online入面搵到初戀》: 【10】

「快啦！我想食啊。」牛奶糖少有地扭計。

「好啦好啦！我要個蘋果批啦。」

「好啦，竟然你請我啦，我就幫你去買啦！我唔會咁衰嘅，哈哈。」

事關我頭先係網吧同牛奶糖賭，賭輸咗就要請，玩咩？緊係跑online啦！

MK仔嗰場四人同心，當然係我帶住佢哋邁向勝利啦！



跟住佢哋就無再過嚟，我見佢哋換咗其他game係度玩，勁舞團。

擺明輸俾我唔甘心要走去玩其他game發洩下啦哈哈哈！總之就係爽啦！

但我輸俾牛奶糖就唔甘心啦，係臨尾衝線關頭，佢竟然跳落我個頭度，暈撚咗我，爬我頭.......我真係勁大聲咁屌咗出嚟。
 
「嗱！俾你架。」牛奶糖佢遞咗個蘋果派過嚟。

「做咩咁嘅表情啊？輸咗唔開心？定唔甘心啊？」牛奶糖係度哈哈大笑，感覺佢平時係學校嘅樣返嚟啦。



「真係好唔鋸啊嘛，有乜可能咁樣輸返轉頭先得架！」

「哎啊......係架啦，輸咗就無得食麥旋風架啦！」

牛奶糖用匙羹整起咗一大舊雪糕，然後擺係我面前，搖兩搖。

「係咪好想食啊？」佢嗰種嬲屌嘅表情。

其實我係想食你多啲。



「走開啊！」我扮嬲。

「嗯。」牛奶糖忽然間換咗個好認真嘅表情，「食啦！」

咁好死？

我張開個嘴，準備一嘢咬落去，但我錯了。

係我正要食到嘅時候，牛奶糖極快速咁縮手，將嗰啖雪糕放入佢自己口入面。

我又屌出聲。

「你以為我唔知你扮嬲啊？哈哈哈！」佢即刻食完就講，嘴邊仲有雪糕嘅痕跡。

唉我頂...心中既無奈又覺得幾....甜蜜。係開心嘅....



「啊...你呢......」我只好默默咁開我個蘋果派嚟食。
 
「講笑姐，嚟啦！」牛奶糖溫柔咁講，臉上仲要掛住一記微笑。

此刻，我發現到牛奶糖嘅甜。

佢又真係將舊雪糕擺係我面前，但我唔撚信！啱先已經柒咗，唔想再柒多次！

「乖啦屌你，今次真係唔玩你啦，信我啦。」牛奶糖那雙動人嘅眼鏡，好似老母咁，乖乖地咁聽佢話。

我一啖食咗佢，又真係俾我食到！

「乖啦！Good dog.....good boy啊，哈哈哈。」最後都係俾佢當狗咁撚。



睇嚟我真係俾佢食住啦......

「汪汪汪！」我扮狗咬佢。

「喂啊！打你架我。」牛奶糖笑笑口咁講。

「不過呢，頭先多謝你啊......幫我出頭，嘻嘻！」牛奶糖撥一撥佢額前嘅斜陰，然後撓一撓頭髮，露出迷人兼誘人嘅頸同埋鎖骨。

佢靦腆一笑，感覺怕怕地醜，成個畫面係靚到呆咗係度，深刻到直到依家，都會記得一清二楚。

應該係我咁大個仔，見過最靚嘅畫面啦。

「做咩姐你！人哋多謝你都無反應嘅，一碌木咁！」佢臉頗鼓起嚟，成塊面圓碌碌，更添可愛。
 
「無..無...只係諗緊嘢姐。」



「諗咩啊？諗緊頭先自己幾型？」牛奶糖食雪糕食得好爽，不過偶爾都會餵俾我食下。

少不更事嘅我，根本唔知咩叫曖昧，淨係單純地覺得好開心，有點甜。同埋好想要多啲。

「痴線啦你！我淨係諗....頭先點解我咁夠薑，明明驚都仆街。」

「我都估唔到架，我仲以為你會唔講嘢添，你平時都淆底咁款嘅，哈哈哈！」

「不過真心感動嘅，多謝你。」喱句係真心嘅，我聽到。因為真心話係心傳心嘅。

「客咩..氣啊，應份嘅......哈..哈哈...」搞到我都有啲怕醜添！

「係呢，點解你今日會無啦啦打俾我話要嚟網吧嘅？」我食完個蘋果派問道。



「嗯....無啊，只係...今日發生太多事姐。」牛奶糖又勾起唔開心嘅事，佢睇落好唔開心咁。

「做咩事啊？」我真心關心佢，我都想佢可以開心返。