【奇幻/異世界/冒險】我在這世界會不會強了一點: 第一章 初到異世界(一)
「喂!阿新，同我做好份報告佢啦，做唔曬今日你唔好收工啦。」一個著住西裝既禿頭中年男人怒吼緊。被怒吼既果個男人就將文件拎起，慣常咁拎起，返到佢個位。
(憑咩......)
阿新心入面不斷抱怨，將抽屜拉開，裡面全部都係杯麵。
(唉，睇黎又唔洗返屋企。)
雖然阿新十分忙碌，但係仍然都忙裡偷閒，偷偷將一款MMORPG既遊戲打開黎玩。
(或者呢個世界先係屬於我既世界啦。)
呢一句不斷係阿新既腦海出現，唔止今日，阿新幾乎每日都想像遊戲入面既自己有咩作為，下至點樣生存，上至點樣統治國家。
(可惜......只係中二病......)
突然，阿新係遊戲入面收倒對戰邀請，雖然阿新唔係遊戲入面最強既玩家，但亦算係世界前十既高手，若唔係礙於上班族既身份，恐怕「世界第一」既名號亦係屬於阿新既。如今收倒一名等級唔錯，但係空裝玩家既對戰邀請。
(今日就算你運氣不好啦，我冇乜心情放水。)
阿新心入面自負咁諗，似乎想將自己滿肚子既不滿同怒火發洩係呢個挑戰者身上。
「五，四，三......」系統倒數，阿新係呢段時間已經諗出必勝戰略—一擊取勝，不單係對自身實力充滿信心，更加係睇唔起對手。
「開始!」阿新馬上用出施法最快而且必中既「空間斬」。
「系統導向技能—指定技能，冇任何防具既你係......」一個不可思議既畫面中斷左阿新既思考，果個無名挑戰者竟然將指定技能避開，而且立即發動攻擊，行雲流水既操作令阿新傻左咁企係度望。好似係呼應緊對手既實力，阿新既攻擊亦都愈黎愈快，但都一一比挑戰者避開，相反阿新受到既攻擊傷害雖然唔大，但不斷累積既傷害令阿新開始見倒自己落敗既畫面。
阿新知道對手實力強大，先以大範圍指向技能「焚燬」誘導對手狼狽咁避開，再以「快刀一閃」令對手係空中使用「二連跳」，確保對手動作有一瞬「切換懲罰」而停滯果時，馬上使用「玉石俱焚」以自爆既方法打敗對手。係PVP入面使用自爆既招式並唔常見，確保唔倒擊殺對手不得止，帶黎既「死亡懲罰」都十分巨大，但阿新別無選擇。
「贏左。」阿新疲態畢露但好滿意咁講。
「你真係好勁啵。」挑戰者發黎訊息。
「點樣講得上係勁，只要你著一件裝備，我都應該係你既手下敗將啦。」
「係咩?但除左你，遊戲前100既人，全部都輸左比我喎。」挑戰者輕鬆咁講出黎。阿新知道呢個人並唔係信口開河，而係真有其事。
「喂喂，你有冇興趣加入我既世界阿，生存係唔屬於你既世界，做個平凡既上班族唔覺得痛苦咩?」
(佢......點知我係上班族架......)
遊戲入面唔事事順意，但現實同樣有更多既挫敗。明明已經盡力做好自己既本份，好似永遠都唔夠咁，出色既工作能力，換黎既只係更多既工作。
「我想阿，但呢D都只係中二病。」阿新感慨咁回覆。
「中二病阿?哈哈，我再問一次，你有冇興趣加入我既世界，以你生命黎戰鬥、危險但刺激世界。」挑戰者以一秒不足既時間作出回覆。正當阿新感到奇怪既時候，更離奇既畫面進入阿新既眼簾，他周圍既人，停滯左。不單止係停低手上既工作，連倒緊入杯既咖啡都凝滯住。
「喂喂喂，集體偷懶會比老闆發現架喎。」阿新自言自語。
(唔係下話，佢究竟係咩黎?劉謙都做唔今呢D野啦。)
「哈哈，冇錯，劉謙都做唔倒架。」
(下?佢聽倒我諗緊咩?)
「係阿，點阿，諗成點。你係你既主場贏左我一次，想唔想係我既主場挑戰返我呢?」呢個挑戰者既聲音好似直接係腦入內出現，係一把聽落唔似大人，但都唔係稚嫩既聲。
「好啦，我知道啦，我要加入你既世界。」
「即使生命有危險?」
「反正係呢個世界都是悶死，悶死不如比你打死。」
「哈哈哈，好，歡迎你阿，上班族—黑澤新。」
阿新既身體開始不斷轉化成一堆代碼，然後雙眼一黑。
「歡迎來到『幻想大陸』，雖然我將你召喚黎呢度，但我絕唔會幫你架，我基本上係絕對旁觀主義既。」阿新恢復視力後聽到。
阿新睇倒既景色絕對唔好，只係見倒眼前既中坐係個純白既王座上面，除此之外，乜野都冇，眼前既黑色係阿新見倒最黑既黑色，甚至連光都感受唔倒。
「哼，呢個就係你自滿既世界?不過原來神都係鍾意旁觀架，真係惡趣味。而且你居然係個......正太?定係蘿莉阿?」
「哈哈，你真係好有趣。就當係你打敗我既獎勵，我將你既身體係『你既』世界入面徹底抹去，可話係消滅殆盡啦。」
「呢係乜鬼野獎勵阿，將沾滿人血既屠刀綁係我手上面，再送我去警局阿?」
「哈哈，你呢個諗法都不錯，不過我還都未講完，你身體換黎既係呢個世界入面強大，各方面既。」
「唔洗啦，咁樣開cheat有咩好玩，我最憎D game咁悶。」阿新好出奇咁拒絕左。
「哼哼，真係咁諗?唔好後悔喎。」呢個神帶有挑釁咁講。
「絕對唔後悔，不過你都同我簡介下你個世界啦，最少都講係咩類型掛。」
「OK，呢個世界叫『幻想大陸』。遊戲類型呢......um......用你既語言應該係電子角色扮演遊戲(CRPG)，不過入面既人全部都係有自己意識，唔係我控制既。」
「好，咁我點走阿，你既世界唔係呢個黑色既地方掛。」
「哈哈，咁急做咩，咁啦，隨便調整你既能力好似又唔係咁好，我就按照你係原本個世界既比例，再幫你調整下啦。」
「拿，呢度有一張卡，就當係你黎呢個世界既禮物，當你諗倒想要咩能力，你對住呢張卡講就得，能力會隨你成長而變強。但只可以用一次架渣。」神比左阿新一張純白既卡。
(咩能力都得?要咩好呢?)
「好啦，簡介完啦，拜拜~」神大力咁推左阿新一下。
阿新周圍既環境突然以好快既速度移動、變化。
轉眼間，阿新黎到左同岩岩暗如黑洞大相徑庭既地方，一個建築風格好簡樸，但唔係現代世界而係中世紀既設計。