【奇幻/異世界/冒險】我在這世界會不會強了一點: 第二章 初到異世界(二)
(唔知佢所謂既調整係點樣計架呢，仲有呢張卡，要咩能力好呢，最好係呢個世界冇既野。)
阿新已經不斷思考緊點生存黎去。不過點諗都好似唔係好岩咁。
依家阿新身上面只係好簡單既布製衣物，腰間掛住一個小布袋，除此之外就身無分文。
(當務之急係確認左我既戰力先，既然佢講有生命危險，姐係要戰鬥架啦，咁戰力就係一樣好重要既事，其次就係錢既問題。)
「唔該，我想問下呢，呢度附近有冇武館道場咁既地方架?」阿新求其就問一個坐係水果攤入面好似冇乜野做既老闆。
「下?你咁孱弱既身體都想去武館?我建議你就珍惜生命啦，細路。」身材健壯既老闆大笑住咁講。
「嗯?聽落老闆好似練過下咁喎。」阿新態度有少少轉變，帶有少少既挑釁。
「算係啦，起碼我呢身既肌肉都唔係白練既。」老闆似乎都好自滿於自己既肌肉。
「不如咁啦老闆，你缺唔缺人幫你呢?你同我切磋一下，如果你贏既我免費幫你打工一個月，你只要包我飲食住宿就得，如果我贏，你就答我小小問題。」阿新目光變我銳利，同佢打緊機既時候一樣咁專注、認真。
「哈哈，細路，你真係要咁做?我會將你用到不似人形架喎?」
「黎啦，打到直到一方投降。」
街上面既人開始圍觀，似乎呢場切磋都好吸引佢地。
「聽講有個細路要同阿健切磋喎。」
「咩話?果個『肌肉狂』阿健?個細路會唔會死架。」
「買定離手，賭阿健要用幾秒打低個細路。」
(呢個果攤老闆似乎係幾出名既人，既然有外號，姐係話佢既戰力都算出色啦，真係冇揀錯人。)
「開始啦喎。」老闆用雄厚既聲音講。
聽倒開始既阿新即刻跑上去前面，諗住先發制人。
(先唔講打唔打得贏，打佢一拳試下力水先，打唔痛先再決定投唔投降。)
阿新既想法好簡單，想睇下自己可唔可以打得痛眼前呢個肌肉發達既人，直接測試自己既戰力。
但係老闆好似冇乜反應咁，睇黎佢都想硬食阿新一拳。阿新毫不猶豫，直接全力打落老闆個肚度。老闆擺出一個扎馬既姿勢，直接硬食呢拳。
「喔?你個細路既力度都唔錯喎，不過唔夠好!」老闆睇落乜事都冇，並且好快咁用右手以直拳還擊。
阿新好清楚咁睇倒直擊既動作，呢個睇清楚就係好似打機咁，係極度專注既情況下，所有野都好似慢動作咁。面對睇得一清二楚既直拳，阿新好快咁向後跳避開左。
「喔?果然瘦削係敏捷D既，我最快既拳都避得開。」
(力度唔夠，睇黎我力度係平均或者更低，不過敏捷好似唔錯。)
「不過你淨係避，永遠都打我唔贏架!」老闆知道阿新既拳頭傷唔倒佢，就更加大膽咁進攻。
(既然係咁，唯有打D脆弱既位置，希望唔係出人命啦。)
雖然老闆不斷出拳，但都係打唔中阿新，老闆既拳頭就好似電影0.5倍速咁，阿新輕易就避倒。當老闆因為急於出拳而且又大意既時候，阿新用左手從內撥開老闆既右拳，並且全力咁用勾拳打擊老闆既左肋，直接命中!
「嗯......呢下就應啦細路......」老闆從容不逼既表情開始掛有一絲苦色。
阿新當然唔會放過呢個機會，直接就衝上前，諗住直接解決佢。當阿新衝到同老闆得一步之差果時，拳頭同老闆既耳只差少少距離果時，阿新好似有少少猶豫應唔應該打落去，老闆就好似受住痛咁，用出全力一拳打向阿新，猶豫既阿新錯失左敗擊老闆既機會，胸部直接受左老闆一拳。
(連......連抖氣都......好難，好似有野壓住咁。)
阿新應聲倒地，連抖氣都變得困難既阿新準備投降。
「飲左佢啦，會冇咁痛。放心，唔係毒藥黎，係治療藥水黎。」老闆拋左支紅色既藥水過黎。
「唉，真係虎落平陽，我竟然輸比個細路，真係老啦。」阿新飲緊呢支有少少甜味既藥水果時，老闆竟然搶先投降。
「咩話?明明係我輸架喎，我比你打到起身都有困難。」
「哼!係咩?如果你最後一拳打落黎，恐怕訓低既就係我，算啦，當然比你個細路開心下，呢次切磋當我輸。不過你遇倒真正既決鬥果時，你就會知道你既心軟會害你一生。」
(的確，如果係生死決鬥，岩岩果拳就係致命傷，以後唔可以猶豫咁多。)
「點阿，係咪有野問阿，快D問啦，我仲要做生意。」圍觀既人開始散開。
「係阿係阿，老闆你既戰鬥能力大概係呢度係咩水平架?仲有呢，我想問下如果想賺錢，有冇快D既方法阿?」
「你個細路問得咁直接，咩叫我既戰力阿?不過答你都冇妨，我以前係C級既冒險者，算係有稱號既冒險者啦，戰鬥能力黎講呢，係呢度都算係比較好既一班人。」
「冒險者?」阿新露出不解既表情。
「冒險者姐係接受公會委託既任務，幫助委託人解決各式各樣問題既人，一般分為D、C、B、A、S級，以戰鬥力同知識去劃分，極端咁講，即使你傻到好似豬咁，你有強大既戰力，你既等級都唔會高。而且冒險者都係搵大錢既職業黎，愈危險既委託，報酬就愈高，聽講S級任務既報酬足夠你買一個小鎮。」
(咁利害，睇黎呢個職業唔錯，好似D RPG咁，可以一面搵錢，一面拎經驗升Lv。)
「係呢?點樣去公會登記做冒險者架?」
「去前面啦，有個好大既公會紋章果度就係啦。」
阿新去到一個好多人著曬裝既地方，相信呢度就係公會。
公會既裝潢華麗，即使遠睇都會好吸引目光，加上放係兩邊既旗幟上面印住公會既紋章，比人一種威嚴、不失霸氣既感覺。