【奇幻/異世界/冒險】我在這世界會不會強了一點: 第九章 王都篇(四)
「嘛，呢D時候你係咪係度後悔緊呢?」阿新問訓係地下既蕾琳。
「估唔到，你從一開始就已經隱藏自己既能力，你係一開始就計算左我會咁?」蕾琳即使身陷險境，但依然都好淡定。
「當然唔係啦，你當我係先知咩?不過開戰之前盡量隱藏自己既王牌，兵家常識掛?貝克芬既箭係落曬麻醉藥既毒箭呢樣野你都唔知，咁多未知既情況下你都開戰，只怪你作為強者冇弱者既膽小。」阿新好滿意咁解釋。
「我真係愈來愈中意你，你真係唔考慮做我既手下咩?」蕾琳死心不惜。
「唔啦，我都係比較中意做光明既一方多D。」
「光明?哈哈，好一句光明，咁我就殺左你先。」蕾琳再次散發出濃烈既殺氣。
「本黎我都唔中意用呢個魔法，畢竟代價太高啦。黑魔法，『死聲』。」蕾琳淨係用口就可以施法。
地下出現左紫色魔法陣，而且魔法陣既範圍愈來愈大，不祥既顏色同氣氛令到阿新諗都唔多諗就想帶貝克芬走。
「拜拜啦，希望你唔會死無全屍等我復活你啦，哈哈。」蕾琳對住阿新講。
「『魔女』，我以王都之命前黎收拾你!」阿新後面傳黎陌生既聲音。
一把純白色既劍插係阿新既面前，劍身落地之後既聖光慢慢注入地面，聖光不斷蔓延開去，好似治療病患咁，將原本死氣滿滿既紫色魔法陣驅散。
「『斬魔使』?!」蕾琳動搖起黎。
「估唔到我咁出名，連『冒險殺手』旅團既『浴血魔女』都識我?」劍既持有者出現。
「多謝你地2個出手幫助，先令到傷亡冇擴大。我叫做迪恩，係隸屬王都騎士團既人」。一個棕色頭髮，五官好似畫出黎咁俊俏既青年咁講。
「你係特登黎幫我地既?」貝克芬問。
「唔係，我係比人安排係呢次篩選既人，算係呢場篩選既參加者啦。」迪恩回答。
(果然係有官方人員既存在，不過佢咁輕易就講出黎既?而且照佢咁講，姐係蕾琳既出現係王都預見倒既事?究竟個委託係咩，會出動咁多人力物力?)
「不過呢D都唔緊要，最緊要係捉左前面既『魔女』先。」迪恩拎出一條繩，將繩綁住蕾琳隻手果時，蕾琳就突然失去意識咁暈左。
「放心，即使佢殺人無數，我都唔會係佢未經判罪之前動私刑。」迪恩好似睇穿左阿新諗緊既野。
「再次多謝你地既幫忙，如果你有咩需要我幫手既，只要唔犯法，我一定盡我所能幫你地。」迪恩豪爽咁講。
「唔洗犯法啦，同『魔女』打完之後，我地最大既問題就係體力不足，精神不佳姐，咁樣對我地參加篩選好不利喎，你諗住點賠償比我地先?」阿新望住迪恩腰間掛住，好似係玻璃做既「玻璃種子」。
「呢層......」迪恩明顯進入左兩難既地步。
「拿，我地幫你搞掂左『魔女』呢個突發情況喎，呢樣野同我地參加篩選完全係兩樣野黎，姐係我地做左D我地義務外既野啦，咁有獎勵都好正常姐，加上我地勞心勞力，對我地之後既篩選有大大既不利，咁樣我地要求過關既獎勵，都好合情合理姐。」阿新滿嘴好似歪理又好似好合理咁說服迪恩。
「的確，打低『魔女』既冒險者，絕對有能力通過呢次既篩選，好，我一於將我持有既『玻璃種子』比你，希望你地可以為王都盡力。」迪恩直接拎「玻璃種子」出黎，遞比阿新。
「咁樣唔會為你帶黎咩麻煩下話?」阿新有小小為呢個好似好笨實既迪恩擔心。
「放心，王都既命令本黎就係將寶物交比實力唔錯既冒險者，雖然理論上係要你地打低我，然後拎走寶物既，不過呢D小小細節，唔洗太在意啦。」阿新既擔心顯得有小小多餘。
「好啦，多謝你既『玻璃種子』同埋救援，日後一定會再見。」阿新多謝完迪恩之後，就同貝克芬拎住「玻璃種子」去宮殿報到。
「阿新，你覺唔覺得我好冇用?」貝克芬突然咁問阿新。
「點解你會咁諗，如果冇你，我地一定打唔贏蕾琳架喎。」阿新實話實說。
「我唔係呢個意思，我既意思係......」貝克芬想講既時候，今日係宮殿宣佈既果個大臣行左出黎。
「恭喜你地，你地係最先完成篩選既人，我叫巴格達，係王都皇帝既親屬。今日所提及既A級委託，將會係3個月之後開始，當然，呢3個月我地會給予你地相當既生活費，有冇問題?」巴格達大臣咁講。
「好，冇問題既話，呢張委託紙你地可以拎去公會登記，作為你地接受A級委託既證明，對你地升級有幫助。」巴格達補充完就走左。
「3個月，應該夠。」貝克芬自言自語。
「阿新，我決定左啦，我希望返鄉下搵我爺爺訓練，我唔想連自己既仇人都要你既幫助先打得贏。」貝克芬決心滿滿咁講。
「傻啦，講咩幫唔幫，朋友係咁架啦，如果唔互相幫助，咁做咩朋友?」阿新有小小唔高興。
「我知道，我既意思係，我比較想親手了結返呢件事，畢竟呢個係我既心結黎，而且我都唔想係實力唔夠既情況下報仇，咁樣會令你同我都身陷險境。
「好啦，3個月後見，唔好返唔倒黎阿。」阿新伸出右手，想同貝克芬擊拳。
「知道啦，你永遠係我好朋友。」貝克芬心領神會，同阿新擊拳。
就係咁，阿新就同佢黎到異世界以來第一個隊友暫時分開左，2個人係3個月內，都會發生驚人既進化。