「好彩過到筆試渣。」塔斯係放榜表側邊摸住頭咁講。
  「你魔法成績好似都唔差喎。」阿新坐係塔斯側邊。
  軍校入面既課室同現代中學差唔多,唔同既只係冇高科技既產品。
  「算係咁啦,唔算太差,不過聽講今年有人筆試滿分,果個人一定好西利,今年既卷仲難過過往幾年好多架。」塔斯一面崇拜既神情咁講。
  「係......係咩?乜咁難架,係呢軍校大概係做咩架?聽講係學下魔法咁樣。」阿新想打聽一下學校既情報。
  「咩話?你唔知係咩就過左測試?你係各方面上都算係一個怪人,軍校主要係為王都培養精通魔法既士兵,因為近年魔法發展迅速,尤其係軍事方面既戰爭型魔法,所以各國都好重視新一代既魔法人才培養,聽講畢左業既軍校學生已經可以直接做軍隊分隊既副隊長架啦,所以軍校先咁難考。」塔斯解答。
  「哼,聽講今年學校收左好多蠢人,估唔到係真既。」後面一把女聲咁講。
  「請問你係?」阿新轉頭微笑問。
  「連我都唔識?我就係筆試第二,魔法測試第一既超新星,莉莉絲,好好記住啦,庸人。」莉莉絲口氣好大。
  「庸人?」阿新細聲重覆左一下,畢竟咁樣既鬧人既方式,係阿新非常少見。




  「聽講佢係王都軍官世家—威姆,既百年奇才,所以王都好多人都對佢抱以期望。」塔斯對一面呆滯既阿新咁講。
  「知道啦嗎?唔該你行遠D啦,我真係唔想同連軍校都唔知係咩既人坐咁近。」莉莉絲趕走阿新。
  阿新都唔想呢個鬧劇再繼續落去,所以就揀個冇人既位坐。
  「咁樣好咩?你遲早搞到自己都孤伶伶一個人架渣。」塔斯挖苦一早就自己一個人坐既莉莉絲。
  「我唔需要呢D野,我需要既係力量。」莉莉絲有D寂寞咁講。
  「好啦,首先恭喜大家通過測試,咁事不宜遲,黎下面空地,即刻開始我地既測驗啦。」睇落好似係老師既中年人急急腳咁行入黎講。
  「咩話?岩岩先測試完渣喎。」班上面傳黎一陣抱怨聲。
  「你地中意區分既,咁呢個叫考試啦,畢竟呢個測驗關乎你地軍校4年既舒適度。」老師講完就走左。
  一大班唔願意又焗住做既學生就唔情願咁行黎去。
  (睇黎過幾多年、係邊個世界,學生都係唔中意返學。)




  阿新卻一面笑意咁行,畢境離開美好既中學生活已經幾年,講唔懷念就假既。
  「你做咩笑咁口咁既,你好期待測試咩?」塔斯再次投以望住怪人既眼神。
  「算係啦,不過都唔太關個測試事,哈哈。」阿新笑住咁講。
  「哼,係就好阿,我都想睇下你有咩能耐。」莉莉絲好似特別睇阿新唔順眼咁。
  空地既人數好多,大概有4班,100人左右,學校結構都同現代學校大同小異。
  「我就叫法爾,你地可以叫我法爾老師,或者型仔老師,如果你想加分既話。相信大家都知道魔法呢樣野啦,岩岩大家通過既測試主要係睇你地對魔法既適性,岩岩既咒文係一種照明既魔法,係無屬性魔法入面比較低級既魔法,所以唔難學。接下落黎就係想試下大家對魔法既認知、運用同威力,用人話黎講,姐係想你地打交。」法爾老師咁講。
  「法爾老師,我反對。」莉莉絲舉手講。
  「哦?你咪威姆家既大小姐,有咩高見呢?」法爾皮笑肉不笑咁講。
  「我唔覺得呢個係一個公平既方法,交戰有好多因素可以左右結果,同魔法力唔一定有關,加上我唔認為咁樣可以測試出我真正既實力,所以我希望可以更改測試方法。」莉莉絲再一次爆炸性發言。
  「喔喔,原來莉莉絲大小姐係咁諗既。不過你有冇諗過,點解我係負責你地既老師,係因為我比你地每一個都勁好多,所以我比較希望,你地可以聽下我既指令,明唔明?」法爾眼神變得認真,佢既氣場同存在感馬上提升一個層次,隨至而黎既就係接近係殺意既威嚴感。




  「不過,你有意見,我都可以接受既,就比你同一個睇落唔差既人打下,等你發揮倒自己既實力啦。黑澤新?下話?,就你啦。」法爾點名阿新。
  (點解佢會知道我個名既?留意過我?定係知道我係魔法測試最弱而挖苦我呢?)
  「冇問題阿嘛?」法爾仲一面和善咁望住阿新。
  「可......可以既。」阿新為勢所逼。
  「哼,我會就住你黎,盡量唔打傷你啦。」莉莉絲講。
  莉莉絲既站姿同平時冇乜分別,睇落已經好習慣戰鬥,加上好似完全冇緊張感咁,令到原本好尷尬既阿新更加唔知點算好。
  「三聲之後開始,唔限用咩方法,只要令到對面投降,或者我判定取勝,就算係贏家。」法爾老師講明規則。 
  隨住法爾既倒數,阿新愈來愈緊張,唔單單係因為佢唔識任何一種魔法,更加係因為佢已經好耐冇做過測驗,仲要係突擊測驗。
  (既然佢對自己實力咁有自信,應該係想用一個完勝既方法黎贏我,咁應該係一擊想打低我掛?換句話,如果避開左,應該就有破綻反擊啦,希望唔係果D咩追擊型既煩人魔法。)