《有一晚，我喺學校操場遇到跌落凡間的天使》: 【2】
小瑤佢眨下眼功夫就食曬嗰幾隻雞翼。
「哇？有無咁快啊？」我第一時間就脫口而出。
「唔係……唔係，我…我問緊你點樣證明你係天使啊…醒起啦，差啲唔記得。」
「你信唔信我可以即刻移過去嗰邊再返嚟啊？」小瑤一臉認真，同頭先傻頭傻腦嘅佢好不一樣。
佢咁樣……我都唔知答唔答佢好。
答佢信又好戇鳩，唔信又一樣……
「姐係瞬間轉移？」我講出嚟都覺得有陣柒味。
如果隔離有人，俾佢哋聽到一啲都唔會覺得有幾型棍，只會心諗條友係咪傻架，成日睇埋曬TVB啲卡通。
聽落真係十足十啲卡通片入面啲招式名，到最後因為無人，又諗唔出有更加好嘅形容詞，所以都係講咗出嚟。
「係啊。」小瑤咬住薯條，個樣好似食緊花生咁。
「你試下囉。」我半信半疑。
我話口未完咋，一講完，條友仔就係我面前消失咗，無聲無息。
我正想開聲嗌佢嘅時候，條友係我遠方嘅位置出現，佢坐係近門口嘅位置。
「喂！小……」
「我屌！」小瑤又忽然間過返嚟，嚇到我爆粗。
喱種感覺似層相識，頭先一開波見到佢先經歷完。
我個腦好似有幅拼圖咁，將一幕一幕拼返起嚟，等成件有個完整嘅畫面。
「你依家信咩啊？」小瑤個樣好輕挑，好串。
同頭先俾我恰嘅時候若判二人，我信啦……我真係當佢神咁拜，即刻個感覺同埋地位唔撚同曬。
「信啊……點會………唔…信啊？」我開始有啲驚驚地，佢會唔會因為我頭先恰佢而懲罰我架？
「我都話咗我係天使嚟架啦。」佢返嚟咬薯條。
『專登落嚟睇住你條戇鳩仔架！哈哈哈。』我以為佢接落嚟講喱啲啦，點知無，反而好溫柔，好善良咁望住我。
「你信就得啦，頭先你一直都唔信我搞到我有啲驚架。」小瑤佢對於我頭先咁樣對佢完全無放係心上，仲好開心咁係度食薯條。
佢係我第一個遇到咁善良嘅女仔。
寧寧佢嘅善良都係流於表面，只係草草見過幾次面，但小瑤係我親身體驗過，最善良嘅女仔。
「係呢……我…可唔可以食多個雞翼啊？」小瑤瞄住我最後一隻雞翼。
「痴線！我剩返最後一隻咋！俾埋你我咪無囉？」我霸住自己隻雞翼。
「唔該你啊……我好想食啊……」小瑤嗰種可憐嘅眼神真係呢……乜天使咁識喱啲嘅咩？
我猶疑緊。
「唔該啊……」佢一邊講一邊伸手過嚟，見到佢咁可愛嘅動作，我笑咗出嚟。
真係無佢咁好氣。
我數一數身上嘅錢，身為一個學生哥，身上成日得返幾蚊雞係好平常嘅事。
我身上得返十零蚊，啱啱好夠買多盒脆香雞翼，但唔叫餐。
「嗱！我哋買多盒，一人兩件好無？公平啲。」
小瑤佢聽到之後瘋狂咁點頭，好傻……
我起身準備去買，起身嗰陣先發覺，小瑤仲著緊一件白色連身裙。
我買完返嚟之後，我係有好多嘢想問架！
我哋開開心心咁食完之後，我終於都忍唔住了。
「你點解會落嚟？」
「天使會唔會痾屎架？」
「你有無咩能力啊？除咗可以走嚟走去？」
「上面係咪有好多好似你咁嘅天使啊？」
我一輪嘴問咗好多嘢，但小瑤佢心平氣和咁一一解答我。
「上頭叫我落嚟體驗下人間嘅生活啊嘛，叫我收集資料，咁我咪要落嚟囉。」
「會啊，上面啲食物好少架咋，好清淡嘅。」
「Er……遲下你咪知囉，嘻嘻嘻！」
「有啊，其實有好多天使都遍佈世界各地，可能只係你唔知姐。」
哇……佢咁樣講，我好似自己遇到個哆啦A夢咁，身邊有個超能力嘅天使。
「係喎，一陣帶你返去換件衫先啦，我屋企人好似仲未返，可以上去換。」
佢咁樣著出去，嚇親人架，人哋會報警……拉我。
「點解要換衫嘅？」
「你係天堂上面係咪都唔用腦架？」小瑤真係呢……我開始習慣啦。
「係上面無煩惱架，根本唔洗煩咁多嘢。」一臉優閒咁嘅樣，動作都慢過人。
「唉……咁你落到嚟，都要跟返喱度嘅規則架嘛，入鄉隨俗啊。」
「哦……得啦，明啦，你再教我啦，哈哈。」
小瑤總掛住笑容，喱種感染力又唔小心咁感染埋我。
「行啦，帶你嚟我度先啦。」
我屋企就係學校附近，但我都快快手帶佢上去，廢事惹事啦。
經歷唔知幾多重難關，左避右避咁，終於帶到佢上嚟。
屋企人唔係度，我求其拎咗幾件男裝衫俾佢著住先。
「咁我之後係咪都住喱度啊？」小瑤係準備入去換衫嘅時候問我。
「下？你講咩話？」我本來諗住去廚房拎嘢飲，都嚇到即刻返出嚟。
我自己係小康之家，住緊居屋姐，話有錢唔係有錢，但未至於窮。
但失驚無神有條友話要住係度，我老豆老母應該會老懷安慰……嚇鬼死。
「咁我係人間都要有地方住架嘛，係咪？」小瑤仲要「嘻嘻」咁笑多兩樣，佢成日都係咁，令人嬲佢唔落。
「我點同屋企人講啊？」我真係拆唔掂喱個炸彈，我覺得我老母會報警囉。
「得架啦，我有方法搞掂架啦，你…唔好唔記得，我係天使嚟架。」
忽然間佢消失咗係我面前。
數秒之後我先識得反應，「喂！」
「我係度啊，係你房換緊衫。」
我先知道，佢又用佢嘅超能力。久而久之，我就習慣咗佢喱種神出鬼沒。
小瑤佢著好曬衫出嚟，我啲波衫令佢好似著裙咁樣，加一條好長嘅波褲，令小瑤顯露出不一樣嘅女人味。
「咁你諗住瞓邊啊？」我屋企個床位啱啱好架喎。
「瞓你度囉，唔係瞓邊啊？」佢一副「係咁架啦、好出奇啊」嘅理論樣。
「唔係掛？我哋男女授受不親喎。」
「無問題嘅，我信得過你嘅。」然後小瑤就走咗去廳睇電視。
但我唔信得過我自己啊嘛……
有時候，我對小瑤嘅感覺有啲奇怪，佢好似我個妹咁，但我又好似有啲……非份之想。
「哇喱個咩嚟架？」
我一返嚟已經開咗電視，咁由佢係度睇啦，我自己去換衫。
我換完衫出嚟，就見到小瑤坐係沙發上面喊。
我嚇傻咗，「做咩喊啊你？！」