『下一站係尖東,乘搭荃灣線各站,可在此站轉車……』

一道熟悉嘅廣播聲傳入我耳中,我驟然打開雙眼,映入眼中嘅係西鐵嘅車廂。

「原來唔小心瞓著咗……」

我望向路線圖屏幕,而家列車正往尖東站駛去……

尖東?





我揉一揉雙眼,確保自己無睇錯。屏幕上,的確係顯示尖東。

奇怪……我已經上咗車一段時間,重不知不覺瞓著咗,無理由重係去緊尖東站。

除非架車已經一早到咗總站然後折返,但方向對唔上。

如果係循環咗一個圈,時間上又對唔上,更何況我無理由會無啦啦喺車上瞓咁耐。

我拎電話出嚟睇下而家時間,電話顯示而家嘅時間係三點。





「咩話?三點……?」我驚訝到叫咗出聲。

我記得我離開學校嘅時侯,已經係晏晝四點半。

唔單止時間對唔上,而且我發現咗呢一件奇怪嘅事……

我身處嘅車廂內,除咗我之外,只係得一男一女——

列車突然埋站,尖東站月台映月眼前,然而月台上空無一人。





雖然而家唔係繁忙時段,但車廂同月台嘅人流情況都唔應該會少得咁誇張……

嘟嘟嘟嘟——

列車完全埋站,開門聲響起,不過……眼前嘅車門並無打開。

如果可以嘅話,我一定會去投訴港鐵服務係幾咁有問題,但係我唔會咁做,因為港鐵服務再差都唔會咁詭異。

直覺話畀我知……呢個係個唔好嘅預兆。

當我仍詫異地望向窗外時,兩抹黑影神不知鬼不覺出現喺我身旁。

「係邊個?」

我轉身一望,原來係同車廂嘅嗰對男女。男嘅著住中學校服,外貌睇落比較年幼,女嘅著白色緊身t-shirt牛仔短褲,孭住斜孭袋,年齡大概同我差唔多。





佢哋應該俾我呢下唔太友善嘅反應嚇到,停下來愣望我。

「你……唔知發生咗咩事?」白衣女皺起眉頭問。

「我都唔知,啱啱我瞓著咗,一醒返就係咁樣。」我望一望車門,再睇下電視屏幕有無通知,「我估係普通故障掛,港鐵年中都成日有呢啲情況出現。」

「我本身係喺學校上緊堂㗎,點解一醒咗就喺西鐵度㗎?」中學生神情慌張咁講。

「咩話……?你本身喺學校上緊堂?」我以為自己聽錯,再一次確認中學生嘅話。

「係呀……我啱啱上下堂唔小心恰著咗,醒返之後就嚟咗呢度。」

「吓?」我本來以為佢應該未瞓,但係佢嘅表情同反應好真心,講到好似真嘅一樣。





「佢講嘅係真,我同佢一樣,本身我應該搭緊火車,醒返之後就喺西鐵度。」白衣女卻對中學生嘅答案給予肯定。

簡直係莫名其妙。

假如佢哋本身唔喺呢間列車上面,瞓醒之後點會無啦啦出現呢間列車上呢?

只不過,佢哋嘅表情一啲都唔似講緊笑,再加埋眼前嘅怪異事情……

唔知點解,忽然覺得佢哋講嘅嘢並非不可信。

「你呢?你話你瞓著咗,咁你醒返之前本來做緊啲咩?」白衣女問。

「我啱啱放學,搭緊西鐵返屋企。」

「喔……」白衣女點頭。





「我無好似你哋咁嘅情況,但唯獨有一點我都覺得奇怪。」我姑且當佢哋講嘅嘢係真,然後拎出電話,「我記得上車嗰陣係四點半,但而家電話嘅時間係三點。」

「點解而家係三點嘅?」中學生望一望佢腕上嘅電子錶,「而家應該係朝早九點先啱㗎!」

白衣女從斜孭袋拎部電話出嚟,睇完之後同樣皺起眉頭,睇嚟佢出現一樣情況。

「晏晝時份一個車卡得三個人,諗諗落唔係好合理。」我望一望月台,「而且呢架車已經停咗喺度成分幾鐘,但係門又唔開,又唔駛走,乜嘢反應都無……就好似困住咗一樣。」

「咁、咁我哋點算……?」中學生問。

「我諗,我哋要搵方法離開呢度。」我講。

白衣女行去撳住緊急通話掣,對住mic講:「唔該,請問有無人呀?」





並無任何人回應,之後白衣女去扭動緊急開門掣。

「唔……扭唔郁嘅!」

「等我試下。」我嘗試扭動緊急開門掣,但無論點扭都扭唔郁。

「我哋……不如報警?」中學生提議。

「好主意。」白衣女將電話拎出嚟後,卻皺起眉頭,「……我部電話收唔到信號。」

白衣女將佢部電話遞畀我哋睇,真係連一格信號都收唔到,之後我拎自己部電話出嚟,都係一樣情況。

「我都係。」我望向中學生。

「學校唔畀帶電話,所以我無電話喺身……」作為提議者嘅中學生有點尷尬地講。

事情愈嚟愈懸疑,醒咗之後發現去咗第二度,被困於西鐵上,電話收唔到信號,無論點睇都係唔好嘅預兆。

「喂……你哋睇下……」

中學生指向窗外,我同白衣女沿住中學生指嘅方向望去。

「做咩?有咩特別?」白衣女不解咁望住月台。

一開始我都唔明中學生指緊啲咩,但我望多兩望,就發現詭異之處……

月台上方柱寫住嘅「尖東」字樣,唔係平時見到嘅整齊字樣,而係好似鬼畫符一樣,而英文字樣「East Tsim Sha Tsui」亦都寸錯。除此之外,本應在月台嘅指示牌、時鐘、顯示屏,乃至客戶服務中心一律不見。

但最令我驚訝嘅,月台上只有林林立立嘅方柱,並無通往上大堂嘅樓梯同電梯。

凝望方柱上「尖東」二字,心寒嘅感覺由然而生……

……呢度,並唔係我所認知嘅尖東站!

「呢個……真係尖東站月台嚟嘅?」白衣女不安咁問。

「咁我哋而家係去咗邊度?」中學生慌張咁講。

「呢個月台嘅的確十分詭異,但我哋首先要做嘅係搵方法離開呢架車先!」我問中學生同白衣女,「我叫阿逸,你哋點稱呼?」

「我叫莉莉。」

「我全名叫駱梓譯,你可以叫我做駱譯……」

我哋身處嘅車廂只有我哋三個人,而且後方無路,身處最尾嘅車卡。

我望向前方車廂,隱約見到前方遠處嘅車廂有其他人。

「莉莉、駱譯,我見到前面好似有人。」我向莉莉同駱譯提議,「不如我哋向前行,同其他人聚集埋一齊後再作打算。」

「嗯,我贊成。」莉莉應道。

「好、好!」駱譯馬上點頭。

正當我哋打算向前行嘅時侯,前方車廂嘅人們忽然聚集起嚟,紛紛向前湧動。

「前面好似發生咗啲事。」見到前方異狀後,我哋加緊腳步前進。奇怪嘅係,明明西鐵線嘅車卡至少有七個,但我哋行咗四卡車廂就到車頭位置。

只見最頭嗰一道車門打開,重有一群人聚集咗喺月台車頭位置,初步推算至少有三十人左右。

我哋行出車門後,廣播聲突然響起。

『請勿靠近車門……Please stand back from the doors……』

嘟嘟嘟嘟——列車車門突然關上,然後漸漸駛離咗月台。

「睇嚟呢度係最後三個人喇!」有位阿叔從人群中行出嚟講。

「你哋……都係啱啱嗰班西鐵上面嘅人?」我疑惑地問。

「我唔喺架西鐵落車,唔通自己識瞬間轉移嚟呢度咩?」阿叔用極差劣嘅口吻回答。

「咁你哋知唔知發生緊啲咩事?」雖然阿叔嘅態度令我感到不爽,但可能佢哋知道啲我哋唔知道嘅資訊。

「發生乜事?咪港鐵故障囉,港鐵年中都成日發生呢啲事㗎啦!呢架車出撚咗問題,咪放晒我哋落車,要我哋轉搭第二班車囉!」

阿叔……佢同我一樣,並無出現好似駱譯同莉莉所講嘅情況,但聽到阿叔回答嘅莉莉反而係皺起眉頭,彷彿係懷疑緊對方。

阿叔講完之後,就企喺車門位置等待另一班列車。

除咗阿叔之外,其他人都企喺原地,露出一臉茫然,手足無措嘅樣子。阿叔可以話係特例中嘅特例,即使佢本身真係搭緊西鐵,但望見呢個除咗林立方柱就空無一物嘅月台,任何人都會有所懷疑。

落咗車之後,更能睇清月台嘅詭異之處。尖東站月台應該有十二節車廂嘅長度,但眼前嘅月台只有一半長度左右,大約五節車廂長度。同埋列車駛入尖東站時會喺月台實際上第二節車廂位置停泊,但呢架列車係駛到最盡位置先停泊。

「呢個地方實在太奇怪,根本就唔係尖東站。」

「你都覺得奇怪呢?」一個戴黑框眼鏡,身穿恤衫嘅斯文男子向我搭話。

「係,雖然睇落好似平時嘅尖東站,但細心留意嘅話,站內設施、列車停泊位置、月台長度,統統都有問題。」我回答斯文男問題。

「連電梯都無,就好似想將我哋困喺度,唔俾我哋走咁。」斯文男一語中的道出我心中話。

「一係我哋向前行睇下有無其他通道?」喺我身旁嘅莉莉加入話題。

「好主意。」斯文男贊同道。

「等等!」駱譯指住頭頂,「你哋睇下,個顯示屏不斷重覆住同一句嘢……」

我抬頭一望,先發現原來呢度有塊顯示屏,亦係整個月台唯一一塊顯示屏。

只見屏上不斷重覆住同一句走馬燈,而嗰一句話嘅內容相信大家都好熟悉——

請勿超越黃線。

「有咩問題?」我不解咁問。

「你望下前面地下……」

駱譯指住前方,大約喺第一節車廂同第二節車廂交界,地下有條橫跨整個月台嘅奇怪黃線。

「呢句嘢……就好似警告我哋唔好跨過去咁……」

「會唔會係你諗多咗啊?呢句話就算平時都好常見,無咩特別呀!」莉莉講。

「月台上忽然有條咁突兀嘅黃線,而咁啱成個月台淨係得呢度有顯示屏,重要不停重覆呢句話。睇嚟係有人專登強調呢一點,唔想我哋踩過去……」我愈望就愈覺呢條黃線有可疑。

再加上之前遇到嘅各種怪異事情,好難令人唔聯想到而家嘅情景係有人刻意設計出嚟……

「我都覺得安全至上好。」斯文男亦贊成我嘅意見。

阿叔好似聽到我哋之間嘅討論,挪揄一句:「成班人都痴痴地,都唔知係咪妄想症發作!」

「咩話?你個老嘢——」莉莉不滿地罵道,但一陣嘈雜嘅聲音傳嚟,將眾人嘅注意力引開。

「成班戇居都唔知堆晒喺度做乜,我哋行啦!」一個金髮嘅男子高講叫道,佢身旁重有一男一女嘅同伴,三個人直接往月台前方前進。

當佢哋越過黃線時,一道刺耳嘅警鐘聲響起。

嗡——嗡——嗡——

月台所有燈忽然熄晒,然後亮起不祥嘅紅燈。

「哇!屌!做乜撚?」金髮男俾眼前情景嚇到即刻調轉頭跑。

『請勿超越黃線……請勿超越黃線……再不返回黃線之後,格殺勿論。』

「阿樂,不如都係唔好行……」另外嗰對男女嘅女方畏縮地拉住男方嘅手。

「……屌!有乜好驚?」男方冷靜落嚟之後,向住前方大叫,「你咪以為你嚇到我啊,我靠嚇大㗎!我唔理你係邊個,最好快啲放我返出去。」

聲音喺月台回響,但月台除咗紅燈同警報聲之外,並無其他動靜。

「都話無嘢㗎喇!我哋——」

嗖—!

嗖—!

兩道劃破空氣嘅聲音傳出。

雖然燈光十分昏暗,但我隱約見到嗰對男女停咗喺原地,無再繼續向前行。

『沙沙……總係會有啲咁嘅人,唔聽人勸告,結果自吃苦果。』一把沙啞嘅男人聲由廣播傳出。

係邊個……?

『睇嚟呢度已經齊人,可以準備進入正題,咳咳……歡迎大家嚟到呢度,各位都係千挑萬選嘅幸運兒,得到資格參加呢次嘅篩選。只要你哋成功通過所有遊戲,唔單止可以離開呢度,重會得到豐富嘅獎勵……』

警報聲停止回響,燈光回復正常。

嗰對男女咚一聲倒在地上,鮮紅色嘅血不斷從佢哋身上滲出……



『不過啊,萬一挑戰失敗,之後等待你哋嘅……就只有死亡。』