我叫馮浩然。我已經三個月冇出過屋企啦。
 
如果你問三個月前發生咗咩事,我都講唔清楚。兩年前我仲喺本地大學讀year2。無目標同方向嘅生活令我感到迷惘,甚至慢慢失去生存嘅動力。
 
我喺呢段日子重拾返寫作嘅興趣。雖然話係重拾,但事實上只係我對現況嘅一種逃避。我好任性噉抱住寫出偉大作品嘅願景離開大學,而兩年後嘅我連一件似樣嘅作品都寫唔出嚟。
 
強烈嘅無力感同自責感迫使我面對現實,面對最真實嘅自己。就喺三個月前,我感覺到自己就快崩潰,所以將自己困喺房間。呢兩年實在太痛苦啦,我實在承受唔到。我將呢一切都寫出嚟,等自己抖抖氣。
 
呢啲文章都係充滿惡意嘅呻吟。但人喺痛苦嘅時候點都會呻吟。