【愛情/輕甜】☺我的鄰家女孩☹: 四、〈 再度相遇 〉

四、〈 再度相遇 〉


叮咚!
 
「黎!」
 
「你好啊伯母，我住對面屋架，攞左D西餅過黎，見妳地新居入伙，小小心意。」
 
「喔喔! 有心有心，不如入黎坐低一齊食啊? 啊瑩!幫手攞D叉出黎!」



「哦!」

 
啊瑩
 
啊瑩?
 
我望一望電視機櫃前面個茶几，上面有抽鑰匙，堆鑰匙中間有個雪花鑰匙扣。匙扣係燈光映射下閃閃生輝，往事即刻好似走馬燈咁係我腦入面放影。
 


 
「哇，今日真係好凍啊! 你覺唔覺啊浩軒?」
 
「嗯! 得11度炸!」
 
「乜原來聖誕節公園真係會少左咁多人嘅。」
 
「雪雪! 你睇下咩黎?」
 
「嗯? 禮物盒?!」


 
「聖誕節快樂! 快D開黎睇下啦! 我草左3個月零用錢買架!嘻嘻!」
 
女孩小心翼翼地揭開禮物盒，有一個雪花鑰匙扣在裡面。
 
「我去買果陣啊，個老闆娘問我係咪送比女仔，我答係，跟住佢叫我揀粉紅色喔，我即刻話唔好! 知你唔鐘意粉紅色，呢個銀色架炸! 係咪好聰明呢我?」
 
「嘿! 多謝喔!聰明!」女孩再一次笑容滿面，然後舉高鑰匙扣。係冬天嘅陽光底下，鑰匙扣閃閃發光，男孩偷偷凝視女孩雀躍嘅神情與笑容。
 
「冇諗到你會送聖誕禮物比我添! 我要點回禮啊?」
 
「唔洗啦! 我收到架喇!」
 
「下? 我咩都冇做喔!」
 


「嘻!」
 
 
宜家D聖誕節香港都成三十度，我都好懷念以前嘅日子。
 
唔係! 重點唔係度!
 
望住眼前呢個銀色嘅雪花鑰匙扣，我再望住岩岩係廚房攞住三支叉出黎嘅呢個女仔。
 
 
 
 
「妳…係雪瑩?」
 
佢昂起頭，表情充滿疑惑，因為咁我先更加望得清楚佢個樣，同當年嘅雪瑩相比，其實無論眼型、鼻型同臉部比例都有好多相似之處，點解我會咁遲先發覺!


 
「我…識你?」
 
「個鑰匙扣… 係我送架…」我指一指放係茶几嘅鑰匙扣。
 
「…」
 
雪瑩面色一變，好似想喊出黎咁。
 
佢攞走左抽鑰匙，乜都冇講就衝左出門口。
 
「啊瑩! 去邊啊妳??」伯母見到咁嘅情境有少許尷尬。
 
「唔好意思啊，我個女係咁，成日有時唔知去左邊，不過佢好獨立架… 最衰都係我… 如果唔係我，啊瑩依家可能讀緊大學喇…」
 


「咦? 咪住先，頭先你話你係送呢個鑰匙扣比啊女嘅人，唔通你就係果個浩軒? 乜你都咁大個仔架喇?!」
 
「係啊伯母! 我係浩軒啊，雪.. 雪瑩細個有同你提起過我?」
 
「梗係有啦! 佢一開始係公園識到你不知幾咁開心，日日都笑住咁同我講同你玩左乜野，有時我跟佢落黎公園我都有見過你架，」
 
「哈哈，乜係咩」
 
「我冇呃你架，12年前啊瑩佢.. 遇到D唔係幾開心嘅事，跟住我同佢老豆離婚，好多野發生… 仲搬走埋」
 
 
係我個腦仲未接受到，12年前係我眼前消失嘅雪瑩突然出現嘅時候，伯母就已經開始補充我所缺乏嘅資訊。