有過·未有過的愛情

致我既初戀：

常言道：「一個男人既初戀永遠都唔係佢最鍾意果個，男人既初戀只係一心想試下咩叫愛情。」

呢句說話套用係我身簡直係度身訂造。

我諗循例都要講句，你近來好嗎？其實我有時都會諗起你，所以其實都唔算循例。我唔知你係咪知情，但最初大家一班朋友一齊，我唔係鍾意你先，我係鍾意你個好姐妹先。到左後來，知道你對我有感覺，但我又始終係鍾意你既好姐妹，所以就拖左你一陣。但由於我始終想試下拍拖既滋味，之後就應承左你。

一開始既時候，我仲擔心之後冇感覺應該點算，但原來我呢個擔心係多餘既。你對我既溫柔體貼簡直令我當時呢個怕醜A0去到受寵若驚既地步，我永遠都唔會忘記你問我鍾意你著邊套衫出街；我地一齊去睇戲然後十指緊扣既感覺；你係三十度之下仲幫我拎兩大袋書番屋企俾我去練波；仲有我地既初吻。人地可能睇黎好小事，但實際上你係果段時間𣊬間燃亮左我呢十幾年黎既人生，令我永遠都唔會忘記呢段經歷。



後來漸漸地我就愛上左你，我開始成日錫你，希望大家可以成日都一齊。但可惜，自從去完果個event之後，一切都變曬，唔知點解你開始變得冷淡，甚至去到一個位就係我只不過係一個朋友都不如既掛名男朋友。到果陣時，我就明白愛情係有賞味期限，同時，我亦都明白我對你既愛比我自己想像既多好多。所以果段期間，我係十分十分難過。

考慮到要分手，我就即刻寫左一段心底話以係你話分手既時候挽留你，希望可以喚起你對我地呢段感情既美好回憶，但當然一齊都只係徒然。我記得你當初對同我一齊既堅持，亦記得你對離開我既堅決。我諗只有一句歌詞可以形容就係「你叫我最快樂，你也叫我最心痛。」
分手之後，我為你喊左七日，全部都係夜闌人靜既時候，瑟縮係被窩痛哭。我唔敢比屋企人知我既難過，我亦都唔想比朋友知我脆弱既一面，所以儘管我心如刀割，但我依然要保持面不改色，一到夜晚先可以釋放自己。

不經不覺我同你分左手差唔多兩年啦，最初我真係好憎你，但之後我已經冇野。直到宜家，我有時都會諗起你，雖然已經唔係鍾意，但就係有一種特別既感覺，會掛住你，雖然我估你都對我呢個人冇乜感覺甚至反感，但冇辦法，可能係我冇能力可以做番你「真正既朋友」。我廢up就up完，我知直接打呢段野比你你或者會不屑一顧，但我擺上黎，希望有朝一日你有緣可以睇到，會知道我講既係你，亦都希望你會花時間去睇下我呢個當初愛你的少年埋藏係心入面既說話。同埋，老套d講句，一定要搵個比我好千百倍既人啊，B