(二十三)駁髮

今日分享一個我聽返黎嘅離奇驚歷。

唔知大家記唔記得,有一期,香港女仔好興駁髮。
條條女都話去駁髮,得閒無事又話返大陸駁個髮。
一舊水有找,即刻變長又得,立即變攣亦得,得左。
潮流嘅野真係…而家就好少聽人講駁髮喇。

呢個係我朋友個前度嘅驚歷。(我朋友不是我)





話說佢女友阿思,自細d頭髮都係「公仔麵」頭,
即係一生出黎就攣攣地好硬果隻,留長嘅話好難打理。
佢一路都好憎自己把頭髮,係學校仲比同學笑佢非洲兒童,
望見班上d女同學個個都有把長長直直嘅柔順頭髮,佢成日自己匿埋一邊喊。
佢好渴望自己能夠有一把又長又直嘅秀髮。

渴望嘅程度,無論係佢吹生日蠟燭果陣,
無論係見到流星,無論係經過地主公公,無論係行過車公廟,黃大仙廟,佢都會合十求一句。





「好想要一把又長又直嘅頭髮。」

然後,機會來了。

駁髮嘅普及,佢決定先負離子整直左自己把短髮先,再返大陸駁髮上去。

當日,搞左五、六個鐘,佢終於擁有一把又長又直,
十足rejoin 廣告裡面一梳到底果種秀髮。
佢當然開心啦,自細想要嘅女神頭終於擁有。





不過,伴隨靚靚順滑嘅頭髮之外,果晚,佢仲發左個奇怪嘅夢。

夢入面,佢見到一個頭髮好長好直,長度落到腰嘅女人,企左向天台到。
果女人全身著住件白袍,背向住佢,見唔到樣,淨係見到佢後面好長好黑嘅頭髮。

一路企左響天台。

阿思同佢大約有十步嘅距離,咁佢行前,就問:

「小姐小姐,你無野吖嘛…?果到好危險架,小心…」

都未講完,眼前個女人粒聲無出咁向前踏左一步,係阿思面前「逢」一聲跌左落樓。

然後幾秒後,「嘭」一聲巨響衝住耳仔傳黎。





阿思嚇到嗌左出黎,扎醒左。

大汗搭細汗。

佢發現,佢枕頭上面有好多好長嘅頭髮係到。

佢拎黎睇,都無野啫,駁左髮甩返d出黎,正常卦。

第二晚,一樣。

阿思發返同一個夢。

不過今次佢同個女人嘅距離再近左,大概相隔五、六步左右。

佢一樣想出聲嗌住個女人,果個長髮女人「逢」一聲就跳左落去。





扎醒,一樣,今次又係好多頭髮係佢個枕頭上面。

如是者,之後每一晚佢都發同一個夢,分別只係佢每次再近左果個長髮女人,
同埋,扎醒時,愈黎愈多頭髮係個枕頭上面。

佢開始覺得果d頭髮唔係甩出黎,因為實在多得交關。

一個星期後,佢直頭係果個長髮女人嘅腳邊,佢清楚睇到佢係無著鞋嘅,腳甲好長呈黑色。
佢抬高頭,諗住試圖望下長髮女人個樣果陣,又係一下失重咁跌左落街。

今次佢扎醒,眼前一條條黑色咁,望唔清自己房個天花板,塊面好痕。

佢坐直係床,佢發現,成面都俾一束束嘅長頭髮遮住。





佢個下勁驚!佢形容就好似响飛髮鋪個地下到執一渣頭髮蓋住塊面咁!
而果d頭髮唔係佢甩出黎嘅!

佢無暇深究d頭髮究竟邊到走出黎,第朝,佢即刻就驚到去拆曬d駁髮,鏟一次個頭。

以為無事。

過左一排,阿思望住塊鏡,佢發現自己新生出黎嘅頭髮唔再係「公仔麵」頭,
而係又黑又直,唔似係屬於自己嘅頭髮…

佢終於可以擁有一把又長又直嘅頭髮。

而自過次起,我朋友話阿思一出少少頭髮就去鏟頭,一出少少就去鏟,
直到今日,佢都係一個長時間留和尚頭嘅女生。





就算而家出左黎響名店到賣化妝品都一樣。


駁髮    參考圖片


已有 0 人追稿