【微甜】點解有五條女同我一齊?: 15-玻璃公仔-「修正版」
啊雯佢好似諗左一諗就話:「其他？我無其他中意，剩係中意公仔。」
咁講都岩，妹妹仔係中意公仔，所以都係自己諗下仲有冇其他佢地中意既野。
我望下周圍，望到啲手繩，頸練，飾物之類既舖頭。
「你估佢地會唔會中意果啲野呢？」我用手指住果間飾品店。
「都係喎，係女仔都貪靚，可以去睇下。」啊雯都好似同意我講既野。
我地就去左果間飾品店，入度去，睇到我O哂嘴。
因為入面真係五花八門既野都有，原來女仔既選擇係咁多。
不過我都要黎既目標唔係望野，而係買野，所以我都好努力諗緊要買啲咩？
我望到啊雯企左係度，望下望，好似唔太感興趣，一睇就知道佢其實唔中意黎呢啲地方，
明明係佢話係女仔都貪靚，自己就唔中意，真係一個怪人。
我見佢唔係就中意啲飾物，但係佢都係一個女仔，
無可能一世都唔帶飾物，我想都佢變返一個普通女仔。
所以我買左一個黑色既髮夾送比佢。
啊雯竟然話:「做咩買個髮夾比我？」
「無，我覺得個髮夾好親你姐。」我答。
「係咩，多謝喎。」
經過呢件事，我諗啊雯應該對飾物有興趣。
但係女友們既禮物都未準備，要再搵搵...
不過唔知點解我搵極飾物都係諗起點親啊雯，完全唔知點解？
所以係咁既情況雖有唔買飾物，買其他，阻住自己再諗起佢。
「做咩唔買就走？」啊雯問我。
「覺得好似唔係幾岩佢地姐。」我答。
「咁你諗唔諗到買咩比佢地？」
原本仲打算你做啊頭幫我，到頭去都係要靠自己，唉!
我望左一望，其他附近都無咩野也可以做到禮物，所以都企左係度諗左一諗。
啊雯突然之間走左去個雪糕店度買雪糕，我走左埋去問佢。
「你同我出黎唔係幫我買禮物嫁咩？」
「其實我未食午餐，食個雪糕頂住當都得掛？」啊雯就駁我。
掛住諗買咩禮物都唔記得我地未食野，
既然係咁，肚餓會影響思路，當然係食左野先再諗。
「咁我地不如去食左野先囉!」我講。
我正打算同啊雯走去食正餐之際....
「啊龍，等我食埋個雪糕先行啦。」啊雯笑住咁話。
我二話不說咁話:「好呀。」
我企返係原位，慢慢等佢食個雪糕。
既然都係等，順便諗下，可以買咩情人節禮物。
一講到情人節，就想屌鳩個諗出黎果個人，做咩野定個情人節，又要有節目又要有送野。
聖誕節送禮物送唔夠咩？仲要加個除夕，又要出街食又要凌晨先返去。
我未吐嘈完嫁，情人節之後就係農歷新年，夠竟點解年頭年尾先黎咁多節日。
啊雯望左一望，見到我呆左係度諗野，就食住雪糕話。
「咁等陣我地食啲咩？」
「你食埋先啦，食不言呀。」
我就笑笑口咁話佢，其實自己係最多野講果個。
啊雯食左幾分鐘，終於食完雪糕，
果幾分鐘等於唔知幾多個無比既春秋晚，可能係肚餓既原固，所以就有啲咁既現象。
啊雯食完雪糕之後，我同佢去左M記度食野。
你會問，黎到旺角都食M記？
我會理正馬壯咁同你講，身為一個毒撚，識食一定食M記，因為可以減少葡萄人既情況。
雖然我身邊多左啊柔同啊情做我女友，再加上依家我隔離果個都帶有蘿利feel既美女做我同行者，
但係我本身就係毒撚，係掩飾唔到。
我一去左人山人海，望撚到眼都凸埋，不過同左5分鐘，搵左一搵......終於都有個兩人位。
我同啊雯講我幫佢買埋佢果份，佢坐係度得啦，啊雯就真係坐定定係度等，
我就出左去買野食返黎，我叫左個豬柳蛋漢堡餐，啊雯叫既係麥樂雞餐。
我同佢一路食一路傾下打機既野，又傾下送咩禮物最岩我果兩位女友。
係我地對話既時候，其實我都feel到周圍既狗公都睥住我，食得勁唔自在。
我同啊雯都知道附近既毒撚係葡萄緊我，又唔抵得有女同我食m記。
忽然諗起肯捱麥記既女人，娶得過!!我又望一望眼前呢個女仔，的確係肯同我食m記。
我當時係度諗，呢個女仔除左毒左啲，其實都係一個好女仔，又可愛，又靚女。
只要做少少撒嬌動作，基礎上大把人肯做兵，無理由一個朋友都無。
我就拿拿林食完，行左兩行，望左兩望咁，沿途商店都無樣可以做禮物，我地一路行一路睇。
大大話話都行左兩三個商場，都未買到禮物，或者可能我怕啊柔同啊情唔中意啦。
睇左無幾耐，我都打算聽日去其他地方再睇下有冇咩可以做禮物，或者DIY都得。
係喎!仲有DIY喎，唔諗都唔記得，一諗就打算今晚上網search下，有咩又靚又簡單既手工。
正打算同啊雯講不如整DIY算之際，啊雯已經唔見左啦。
我連忙周圍搵，終於比我搵到啊雯，佢係一個水晶店度對住塊玻璃係咁望。
我就行過去睇下佢望咩，一望就見到有個玻璃做既熊公仔。
我望一望啊雯再望一望個玻璃熊公仔，個公仔真係好靚，連我呢個唔太中意公仔既人都覺得好靚。
我把心一橫，就決定去呢間舖頭睇下，應該可以做情人節禮物。
「不如我地入去睇下囉。」我同啊雯講。
啊雯望住個公仔點左一下頭，我心諗，你夠竟有冇聽我講野嫁？
算啦，我自己入去睇下，睇左一耐，
買左個玻璃高踭鞋同玻璃翻開左既書本，一件都要2，3百蚊走唔甩，
雖然唔係水晶，只係玻璃，不過鵝毛都送得，玻璃都唔差呀。
我買完之後，望住啊雯都仲睇緊個玻璃公仔，
我諗佢真係好中意，諗諗下不如送比佢做今日陪我咁耐既獎勵都好喎。
我就問問個店員，指住個玻璃公仔，問下佢幾多錢。
佢話599，我心諗咁撚貴，公仔喎，佢話因為版權問題，所以提升價錢，又怕無人買，所以放左係門口位。
我再望望啊雯，啊雯望住個公仔實一實，佢個樣好似話比我聽，真係好想要咁。
「其實可唔可以平d？我又買左你兩件貨。」我問。
「唔好意思呀，先生，已經係最平啦。」店員微笑同我講。
我就諗其實都算平啦，比起個大公仔黎講。
內心掙扎左一陣，好啦，就買比個傻妹啦，又同我食m記咁，都算係好女仔，無理由唔獎勵佢。
明明有一個好明顯既藉口一句可以推返哂所有野，就係唔係同佢好熟，又買咁鬼貴既野，點解我當時諗唔到？
我出到門口，我同啊雯講:「走啦，我買完啦，多謝你喎。」