【微甜】點解有五條女同我一齊?: 42-完美女友-「新版」
啊麗並無任何表示，只係企左係度。
「我真係無加佢入去，你點先信我？」我問啊情。
呢個時候，突然有人行過黎，我另轉面望一望，原來係啊柔。
啊柔並無出聲，只係靜靜地企係度。
「一係咁呀，我以後唔見唔理啊麗，咁無問題啦？」我講。
「咁......」啊情開口講野既時候，突然比啊麗攔截住。
「唔得。」啊麗繼續講：「你地兩個既事我可以唔理，但係我要啊龍做我男朋友呢件事我就唔得，之前已經失去一次機會，呢次我唔會放手。」
「喂，佢有話過要你做佢女朋友咩？」啊情講。
啊麗用眼神視意我知，無得我揀。
如果我拒絕啊麗既話，問題會更加嚴重。
始終啊麗對於我既所有事佢最清楚，萬一啊麗講左女神啲野同啊柔啲野出黎既話，我會比依家呢個情況更難搞。
「一係咁......」我未講到一半，突然啊柔開口講野。
「不如由得啊麗做啊龍女朋友先，比個試用期你地，如果做得唔好，我地再決定比唔比啊麗做啊龍女朋友囉。」
我，啊情同啊麗都呆左。
啊情開口講：「你傻左呀？」
「你聽我講埋先啦，期間唔比嘴，唔比攬，唔比拖手，最多比單獨出去。」啊柔講。
「咁佢單獨出去都死啦。」啊情講。
「咁你信唔信啊龍呀？啊龍話可以因為我地唔理啊麗，如果啊龍係對啊麗無意既，我相信之後啊麗都唔會強人所難。」
「但係......」啊情講。
啊柔無視左啊情講既野，直接去問啊麗：「意下如何?」
「我無所謂，可以同啊龍一齊就得。」啊麗答。
啊柔望住我，我都唔知答咩好。
「Um......你都幫我諗好哂囉，就照你決定啦。」我講。
「唔得呀......唔得呀........我唔要咁呀。」啊情又開始崩潰。
「最多咁，我放你係第一位，咩都為你著想先，咁得唔得？」我講。
「真係？」啊情停止左喊。
我點頭。
「唔得，我唔要你有咁多女朋友，我剩係想見到我地三個，多一個都唔得。」
邊三個？我，啊柔同你？
突然之間我電話響，黎左一個訊息，原來係啊柔，我睇完之後心諗得唔得架？
但係依家呢個情況我別無選擇，就算結果會無法挽救都要一試。
「既然係咁，我都唔想為難你，或者咁講啦，我唔係幾配做你男友。」
啊情望住我呆左。
「你想要既野我都比唔到你，大家勉強落去都無意思。」
「你......」啊情又再喊過。
「我唔要呀，我唔要咁呀。」啊情攬住我喊。
死嘞，會唔會過份左呢？但係啊柔係叫我咁做喎。
「咁都係試姐，最終權仲係我地度，係咪先?」我講。
望到啊情既無助樣，我都心痛。最弊係啊麗係度，唔順下佢意又唔得。
「啊麗，不如你返去先啦，呢度我會解決。」我講。
啊麗唔係度應該會好傾啲。
「你決定好再搵我啦，總之我唔會放棄架。」啊麗好堅決咁講。
啊麗就咁上左車，啊柔同我都望住佢上車。
「啊情呀，你唔好咁啦。」我講。
「點解？點解呀？我咁努力去愛你，但係你就......」啊情講。
「或者可能同啊麗一齊對啊龍黎講會有好處呢。」啊柔好冷靜咁講。
我望住佢地兩個講既野好大對比，我內心係度諗，雖然啊情既情況好難搞，但係對於啊柔異常冷靜咁解決問題，我更覺得可怕。
「拿......一係就有咩唔滿意就話啊麗，咁咪可以令佢唔好纏左我囉。」我講。
「再唔係啊麗搵我既，我就搵埋你或者向你報告行蹤，咁ok啦？」我再講。
「我話你知......」啊情指住我。
「如果你溝多件返黎我實殺左你。」啊情再講。
「小人不敢。」我笑左咁講。
「係就最好。」啊情講。
「都好夜啦，不如返去。」啊柔講
經過呢件事後，我覺得上次啊雯件事都係啊柔解決，甚至如果無左啊柔係度，應該無可能出現一腳幾船既情況。
可能啊柔就係古代入面既賢良淑德既娘子，唔至大方，又會幫我解決問題。
就係咁，啊麗就暫時叫做試用女朋友，咁都比啊柔解決到件事，你係得既啊柔。
之後我同啊柔送左啊情返去先，之後我再送啊柔返去。
啊龍將啊情加入龍之家OL群組內。
呢句係whatsapp最後既一句，今晚都叫又解決一次呢啲問題。
「啊龍，不如送到呢度啦，你返去先啦，你都攰。」啊柔同我講。
「唔好，至少送到你門口啦。」我講。
啊柔微笑作回應。
「話說點解......」我問。
「我見你又唔多想拒絕，而且啊情又......」啊柔講到一半，比我打斷。
「其實係有原因，因為......」呢個時候，啊柔放食指到我嘴唇上。
「其實唔想講可以唔講，我見你對啊麗都無咩感覺，所以我好放心。」啊柔講。
我捉住啊柔隻手，然後講：「你唔驚我之後會中意啊麗咩？」
「我又唔驚喎，我知我男朋友最錫果個係我。」啊柔甜笑咁講。
「咁我要搵多幾個返黎啦，原來你唔介意既。」我得意忘形咁講。
「我唔擔保次次搞得掂架。」啊柔扮嬲咁講。
「不如今晚......」我開口正想問可唔可以去我屋企訓既時候。
「唔好問，你想就去做。」啊柔突然講。
「好。」我答。
啊柔今晚幫我解決左一個好難既問題，我諗我真係要好好報答啊柔。
之後我有同啊情傾返呢件事，啊情依家仍然係覺得我同啊麗係有啲野，但係就係因為咁，啊情好似更加著緊我咁。
原本已經好著緊，依家直頭係管住哂，天呀，我既自由呀。
過咁快又到左星期五既夜晚，我同啊強啊俊啊雯一齊打緊機，同時啊情亦係我隔離。
啊雯：聽日不如出去行下囉。
我望住手機呆左，因為明明skype可以講出黎，點解會係whatsapp度打出黎？
我：可以呀，咁去邊？
雯：唔知呀，但係最近下載左既手機遊戲要出街玩。
我：PKM 鳩？
雯：你有玩？
我：有呀。
雯：咁約定你啦
我：OK
「喂！去邊？」啊情講。
我望一望啊情，原來佢一直偷睇我。
「無呀，啊雯約我行街街。」我講。
「咁我都去。」啊情講。
「咁你都無玩。」我講。
「陪你去得唔得？！」啊情講。
「好。」我講。
突然whatsapp有人覆我。
雯：可唔可以唔好同柔姐姐同情姐姐講？
我：無啦，有個靚女睇到啦。
原本我都諗住單獨同啊雯出街添，算啦，我諗應該無咩問題既。