講完,Jojo同Shirley佢地就影完相。
「喂,我仲未同啲男仔影相呀,阿楠你過嚟吖。」Jojo道。
「哦…」

我行埋去Jojo身邊,企到直一直,望住喺我眼前嘅Shirely,我唔敢有任何動作。
點知Jojo一嘢搭住我膊頭,我呆咗咁望住佢。
「喂,依家影學生相呀?咁拘謹做咩呀。」Jojo笑道。
「係囉,你地企埋啲啦。」Shirley道。

我見連Shirley都咁講,唯有搭返住佢膊頭,笑一笑,咔嚓,影完,Jojo即刻走去肥鈞身邊睇相。


「Wow,影得幾好喎,哈,今次係我同你第一次合照呀呀楠。」

我走埋去睇睇,的確影得幾好,Jojo笑得好燦爛。
影咗一輪,我地咩組合都影過哂,突然之間,Jojo留意到企喺遠處睇緊風景嘅的士佬。
「喂,不如你過埋嚟同我地影吖。」
「吓…我?」的士佬指住自己,一臉茫然。
「係呀,話哂都一齊玩過,一場朋友嘛。」Jojo笑道。

的士佬擘大個口得個窿,睇嚟佢唔相信會有人當佢係朋友。
「嗚…喺呢個世界上,竟然有人當我係朋友…呢位女同學,其實你叫咩名?」


「我叫Jojo呀。」
「Jojo妹妹…係我怪錯咗你…好多謝你….」

我地幾個同的士佬企埋一齊影相,個感覺就好似幾兄妹加個老豆咁。」
影完,的士佬望住張相,真係喊咗出嚟。
「我今日真係好開心,好開心呀!!!!!」

我無理的士佬,去返Shirley身邊,細細聲問佢。
「係呢,今日Jojo生日,你地有冇準備蛋糕嗰啲?」
「係喎!真係唔記得咗添。」


「哈,你地有冇搞錯,呢啲咁簡單嘅嘢都唔記得。」
「唉,知你細心啦,咁依家點算呀?」
「因間出返去嗰陣直接買個啦。」
「好。」

好快就到煙花匯演,我地搵定個靚位睇,個個都好似好期待咁。
突然成個迪士尼樂園黑哂,剩低個城堡發光,我地都知道要準備放煙花啦。
個城堡五顏六色,加埋迪士尼嘅音樂,個feel好浪漫。

啲煙花開始放出嚟,五光十色,播住阿拉丁嘅A Whole New World,我就學阿拉丁咁,拖住Shirley隻手,Shirley望住我嫣然一笑,情侶去到呢啲時候,緊係要肉麻一下架啦。

我見到喺我側邊嘅肥鈞同Venus已經攬埋咗一舊,喺呢個咁sweet嘅moment,我係咪應該都要同Shirley親熱下呢?

之不過,當我有呢個念頭嘅時候,我又諗,Jojo佢喺我地側邊,我依家同Shirley做啲咩嘢佢都會睇到,話唔定佢見到又會唔開心。
所以到最後,我都係剩係同Shirley拖住手睇煙花,無做到啲咩嘢。



睇完煙花,今日嘅迪士尼之旅正式完結,我地個個都盡興而返。

我地幾個搭住的士佬架的士出返市區,成程的士我地都聽住個的士佬喺度鳩叫A Whole New World。

我地出返銅鑼灣,落咗車,的士佬就同我地幾個道別。

「再見啦咁多位…今日我真係好難忘…我終於可以見到米妮同埋鳩飛啦!!」的士佬喊哂口咁講。

「唔好咁講,我地多謝你就真,多謝你車咗我地兩程。」Jojo笑道。

突然的士佬望住Jojo,語重心長咁講。
「Jojo,你係一個好女仔,記得以後都要keep住呢個笑容,ok?」
「哈哈,ok!」



睇嚟的士佬已經對Jojo改觀,的確,佢係好得人鍾意嘅。

「我地可能以後都唔會再見架啦,呢張大合照我會好好keep住架,真係再見啦咁多位!」的士佬道。
「我就唔想再見到你啦的士佬。」肥鈞細細聲講。

雖然我就唔信我唔會再見到佢,之不過聽到佢咁講,都幾感動。

「拜拜啦,的士佬!」我大嗌。