返到屋企,我瞓咗喺床,一次又一次咁回想的士佬嘅故事,令我有好多得著。

當初啱啱中六嘅我,仲係一個唔懂事嘅男仔,聽肥鈞話落自修室溝女就跟風學人溝女,但我唔似得肥鈞咁好彩,一嚟就搵到一個自己最鍾意嘅人,係我幼稚,我賤,我分別令兩個女仔因為我而傷心,當頭先聽完的士佬嘅故事之後,我決定我唔可以再令Shirley同Jojo是但一個傷心,我唔想自己喺佢地嘅腦海中永遠消失。

由今日起,我要做一個真真正正嘅男人。

我喺床上面輾轉反側,苦苦思索點樣可以兩全其美。
我不斷諗返起老媽子同的士佬對我嘅教誨,我明白,由始至終,我最鍾意嗰個女仔都係Jojo。

錯就錯在我同Shirley太快開始,之不過,又有幾多個初戀就會諗得咁清咁楚?



男人最緊要專一,最緊要負責任。

對唔住,專一我做唔到,Jojo Shirley我兩個都愛。
之不過,我明白我要負責任。
從今開始,我對Shirley,係伴侶嘅愛,對Jojo,係朋友嘅愛,係一世嘅朋友。

聖誕節完結,我地五個又再繼續喺自修室奮鬥,而家開始,我再無任何顧忌,
我比起以前更加努力讀書,我要考一間好嘅大學,入好嘅科目,第時搵到錢,同Shirley組織美滿嘅家庭。



另一方面,我同Jojo保持住朋友嘅關係,互相串嚟串去,鬥成績,拗Econ,摵爆佢塊面。佢比我成熟,我知道佢一早就明白,我地兩個會係好好嘅朋友,我地之間再無任何越軌嘅行為。但反而咁樣我地更加開心。

我同Jojo都將當晚我地拖住手嗰十幾分鐘,深深埋藏係心底裡嘅深深處,或者,呢個機會永遠都唔會再有。

依家嘅灣仔自修室,自從一月一日開始,可能人人都知道死期將至,大家都當一月一日係一個新嘅開始,自修室入面每個人都開始埋頭苦幹,再無人打茄輪,再無姣西行catwalk,啲麒麟頭都意識到自己gel頭哂時間,不如早啲落嚟溫書,變返哂乖仔頭。

自修室由今日開始,唔再係學界嘅蘭桂坊,自修室,真係一間自修室。
二月十四日,今日mock嘅成績出哂。除咗maths都係唔夠肥鈞嚟之外,我所有科目都係全班第一,輕輕鬆鬆咁ko咗Hinson,所有老師同老嚴都趺哂眼鏡,但對於我嚟講,呢啲嘢基本啦。

呢一年,我徹徹底底咁由一個男仔成長到成為一個男人,喺任何一方面我都係。



拎住mock嘅成績表,我好開心咁同肥鈞落自修室,等Shirley佢地嚟到俾呢個好消息佢地。

等咗一陣,Shirley佢地幾個都到,Shirley一嚟到我就show張成績表俾佢睇,佢見到笑咗一笑,但又好似唔係好開心咁。

佢地坐低咗之後,我見Shirley奇奇怪怪咁,我就fb inbox花師奶。

「喂,Shirley做咩呀?」
「你真係好鬼蠢呀。」花師奶答。
「做咩無啦啦鬧我,快啲講咩事啦頂你。」
「我地今日都派哂mock卷,Shirley嘅成績麻麻地…你依家仲show你自己咁好嘅成績俾佢睇,佢唔sad就難啦,低B!!!」
「噢…係我錯。」
「仲有呀,今日咩日子呀,禮物呢?」
「係喎,今日情人節…」我道。
「禮物?你想要禮物?」我打咗好多個O咀樣。


「唔係呀頂你,情人節你唔係唔送禮物俾Shirley下話。」
「我一時唔記得咗…」
「你成日都走數架啦,走數X!!!」
「依家補飛都仲補得切呀,快啲去啦。」花師奶續道。
「好。」

講完,我二話不說就拖住Shirley走出自修室。
Shirley無啦啦俾我拖住,有啲不知所措。
出咗自修室,我就攬住佢。

「做咩呀?」我突然攬住佢,搞到佢驚咗一驚。
「Shirley,唔洗驚。」
「我都無驚,做咩你無啦啦咁樣。」Shirley道。
「我知你驚自己成績唔好,之不過無論你成績點,我都會喺你身邊照顧你,養你,直到永遠,阿門。」



Shirley聽到我咁講,咧咀而笑。
「喂呀,咪講埋呢啲咁肉麻嘅嘢啦,你係咪想搞喊人?」
「Hehe,今日情人節,係要講下啲肉麻嘢架啦。」
「咁囉,情人節呀…禮物呢?」Shirley扁咀問。
「喂,情人節唔係男女朋友互相交換禮物架咩,咁我份禮物呢?」我反問。
「哈哈,我都無。呢排又考mock又剩邊有時間準備喎。」Shirley苦笑道。
「咁…我都係同樣原因,哈哈。」
「算啦,有冇禮物都唔緊要,收到份心意就得。」
「算啦,今年情人節無禮物唔緊要,我地仲有千千萬萬個情人節。」我笑道。

我講完,Shirley望住我笑一笑,攬得我更加緊,喺呢一刻,我諗起的士佬。
的士佬,多謝你,我唔會重蹈你嘅覆轍。