我走出考場,搵返肥鈞,我地相視而笑,終於,終於都考完啦。
依家個感覺就好似打咗一次打足成年嘅飛機,chok到呢一刻,終於射得啦。
好爽,好釋懷,好感動。

我同肥鈞搭住膊頭,走出間中學。
「喂,依家返自修室。」肥鈞道。
「其實我唔明點解要返去。」
「嘩,你咁唔講感情架,話哂間自修室都陪咗你成年吖,你以後都唔會再去架啦,唔係唔同佢講聲拜拜呀?」

肥鈞咁樣講一講,又有啲道理。


灣仔呢間自修室,陪伴咗好多人一年嘅歲月,一年又青春又熱血嘅歲月。

呢間自修室話俾我知,原來落自修室都可以係一件咁熱血嘅事。
無呢間自修室,我唔會讀書,我唔會有女,我唔會好似依家咁成熟。
但以後,我都唔再需要嚟呢度。

諗返起一年前,一嚟到就見到有人喺度打茄輪,見到三個姣西行catwalk,我以為呢度只係一個溝女場所。

喺呢度遇過好多人,St lou雙麒麟,on9仔Thomas,mk小豬頭,呢幾個人,隨住我嘅成長,都慢慢喺呢間自修室消失,灣修都好似陪住我成長咁,慢慢由學界嘅蘭桂坊變成一個真真正正討論學術嘅好地方。



果然,呢啲嘢都係睇你嘅心態而轉變。


我同肥鈞搭車去到灣修,已經見到Shirley佢地三個,佢地個個都笑容滿面。
大家都考完DSE了。

入到去,仲喺度溫書嘅人已經無乜,相信過多幾日,呢度就會變得冷冷清清。
望住依家間自修室咁嘅光景,行到去平時坐開嘅194號位,我突然有啲忍唔住。

「我,考,完,D,S,E,啦。」我大嗌一聲。


成間自修室嘅人都望住我。

我一嗌完,肥鈞同Shirley都拉住我。
「頂,你係咪痴線架。」
「喂,唔係喎,你地跟我一齊嗌吖,個感覺好爽,哈哈哈哈。」
結果都係無人同我癲,我仲俾個管理員鬧咗一餐。

之不過點都要講句,多謝你,灣修。


考完DSE之後嗰幾日,我好撚空虛,除咗準備埋個英文Oral,同埋有一日同Shirley出咗去行街之外,我日日就喺屋企同肥鈞打LOL同埋食瞓墩。

老媽子叫我返下暑期工,但我就唔係好想,壓抑咗咁耐,我想瘋狂咁玩咗呢幾個月佢。

但係玩都唔係可以玩得咁耐,始終日日喺度玩都會悶。



有一日,我同肥鈞照舊喺度打緊LOL。
「唉,又輸,唔想玩啦。」肥鈞道。
「知唔知點解我地係咁輸。」
「點解?」
「因為我地打得太多,仲有成三個幾月先放榜,我地無理由打機打足三個月,我覺得我地依家要搵啲其他嘢做下。」
「有咩做?」
「我都唔知。」
「屌,你又喺度講廢話。」
「你有冇咩諗頭?」我問。
「其實,我一直都有個計劃,之不過唔知預唔預埋你地好姐。」肥鈞道。
「嘩屌你咁講嘢嘅,有咩做唔預得我先?」
「我諗住同Venus去旅行。」

係喎,好多人考完公開試都會去旅行。


「屌,預埋我地啦,人多先好玩架嘛。」
「我本身諗住同Venus二人世界,順便可以乘機…」
「乘機扑嘢?」
「係…」
「肥鈞,老老實實,你同Venus扑過未?」
「就係未呀屌你…你都知我阿哥條死毒撚長駐喺屋企,Venus屋企又長期有呀媽喺度,我根本無機會…」肥鈞講到好慘咁。

「無架啦,你最後一個機會都無埋,因為你已經講咗俾我知,我地一齊去旅行啦!」
「屌…」
「你地本身諗住去邊旅行?」
「台灣。」
「好,咁就去台灣啦!!!出發!!!!」