「嗚………..實在令人太感動啦!!!!!!!!!」的士佬一聲悲鳴,搞到我地即刻縮開咗。
我同Jojo望住對方,大家都好尷尬,因為我地都知道,啱啱大家都逾越咗界線。

的士佬走埋嚟,俾我地睇啱啱佢影嗰張相,係我地互吻嗰一刻。
張相…影得我地都好享受,好幸福。

「當年我同阿欣都係喺櫻花樹下好深情咁咀咗啖…」的士佬含住淚,望住上面嘅櫻花講。

講完,的士佬轉個頭,搭住我地兩個嘅膊頭。
「多謝你地,你地兩個啱啱俾咗個好好嘅回憶我!!!」



我笑了笑,應該我多謝你先真,無你,就唔會有今日咁嘅經歷,我就唔會錫Jojo。

跟住,我就同Jojo的士佬繼續周圍喺呢度遊嚟遊去,周圍行嘅期間,我不自覺咁拖住咗Jojo,佢都肯俾我拖,我地都好珍惜,因為我地都知道,依家呢段時間,就好似當日陪住佢行返屋企嗰十分鍾咁,可一不可再。

快樂不知時日過,好快就到黃昏,見到太陽落山,我地先醒起我地掉低咗肥鈞佢地幾個鐘,一定擔心死佢地。

搭住的士佬架車回程嘅時候,我一直捉住Jojo隻手,佢挨喺我身邊瞓著咗。
剩返我同的士佬兩個,我好想同佢懺悔。
「喂,的士佬。」


「?」
「其實,我同Shirley仲未分開架,Jojo唔係我女朋友嚟…」
「我知呀。」

的士佬咁樣講,我呆一呆。
「你唔係最憎人唔專一架咩,咁你知你又唔屌我嘅?」
「唉,我見到你隔離個Jojo咁可愛,咁純,仲點捨得鬧你呀,更何況我感覺到你地兩個係真心,唔係玩弄感情。」
「之不過,我地兩個係無可能有結果…」
「呢啲嘢,就睇你地造化啦…我都幫唔到咁多。」



我諗咗一陣,就講。
「係呢,既然你話今次係你嘅告別之旅,今日之後我地係咪唔會再見面架啦?」
「恐怕都係。」

既然的士佬都咁講,我真係好想問佢一個問題。
「老老實實,你其實同我係咪有咩關係?」
「我唔明你呢個問題有咩意思。」
「我本身同你三唔識七,點解我成日都會見到你,我真係唔信我地咁有緣,我從來都無專登去搵你,其實係咪你特登撞我?」
「痴線,我邊有咁得閒撞你。」

的士佬沉思咗一陣,又講。
「兄弟,唔知你信唔信,呢個世界,有樣嘢叫做守護天使。」
「守護天使?」
「係,每一個人,身邊都會有一個守護天使守護住你,可能你唔會發覺,又或者嗰個人對你嚟講一啲都唔重要,之不過,佢就係會默默咁守護喺你身邊。」



「我,可能就係你嘅守護天使。」的士佬頓一頓。

我聽到佢咁講,完全係O哂咀。
「屌你咩,你咁樣講,好GAY。」
「你信唔信都好,我就有套咁嘅想法,我覺得我自己係,所以我一直都幫緊你,你唔覺架咩?」

諗返起又好似係,雖然的士佬每次出場都好神化,又鬧鳩我,但係佢每次嘅出現,最後都係喺度幫緊我。

「係…」我不得不承應。
「同埋,我覺得你同我好似,我地都係錯過咗一個值得愛嘅女人。」的士佬道。
「喂,係囉,你唔係應該係阿欣嘅守護天使咩,你唔係應該去守護佢架咩?」我問。

「哈,你睇我搞到佢咁,你就知我唔係啦,細佬,呢一樣嘢並唔係你想邊個係就邊個係架,好多時都係個天整定。」

「咁…我會係邊個嘅守護天使?」


「呢樣嘢就要你自己去發掘啦,可能係你女朋友,可能係你身邊嘅Jojo,可能係一個你仲未認識嘅人。」

我望住身邊嘅Jojo,佢仲瞓緊教,我摸一摸佢塊面豬墩。
我好想一直守護住佢。

好快,車就駛返到去淡水老街,我喺車上面見到Shirley佢地坐咗喺間食店入面,就即刻叫的士佬停車。

Shirley見到我,即刻撲埋嚟。
「你去咗邊呀,幾個鐘唔見人,擔心死人咩…」

正當我苦惱緊點樣解釋嘅時候。
「咦,你…你咪係迪士尼嗰個的士佬…?」肥鈞指住的士佬,驚慌地道。
「哈哈,就係我啦,咁啱路過見到佢地兩個,捉咗佢地兩個陪我去玩,唔好意思呀各位。」

的士佬行過去肥鈞度,箍住肥鈞條頸。


「最衰呢度無過山車玩,唔係實搵埋你去呀死肥仔。」

喺呢個時候,Jojo終於瞓醒,佢揉一揉眼。
「咦,到啦車厘龜?....嘩。」
佢呢一刻先發現,原來我地已經返到去佢地身邊。
我同佢已經無得再好似頭先咁相處,大家都要做返大家原本嘅角色。

的士佬搞咗一陣肥鈞之後,就上返車,揮揮手。
「各位,你地玩得開心啲啦,我走先啦。」
「拜拜!」Jojo笑道。
「Jojo,keep住呢個笑容! Ok?」
「Yeah!,ok!」

的士佬踩踩油門,開始駛走架車。
望住架車慢慢駛遠,我有啲唔捨得,畢竟佢講過,今次係佢嘅告別之旅,我以後都唔會再見到佢。



突然之間,我好想再見多佢一面。
「的士佬,的士佬。」我用盡力跑,一路跑一路叫住佢。

的士佬停低架車,回一回頭。
「做咩呀?」
「我…我係咪真係以後都唔會見到你架啦?」我一邊喘氣一邊道。
「哈哈,應該係掛。」
「你唔係話你係我嘅守護天使咩,你唔會繼續守護我架咩?」
「你依家身邊咁多人關心你,我諗唔再需要我架啦,唔講啦,我趕住出發去下個景點,走先拜拜。」

講完,今次的士佬真係踩足油門,唔再回頭。

永別啦…的士佬。