一個尋常的星期五傍晚 ...

「唉,終於收工 ...」阿謙拖著疲倦的身軀進入觀塘地鐵站。
站內充斥著趕回家的上班族,月台更擠得水洩不通。
「往油麻地列車即將到達,請先讓乘客落車 ...」
列車駛進月台,排左前排的阿謙在車門打開的一瞬間,一個箭步衝進列車,成功搶得一個坐位。
「呼!」他展露勝利的微笑,然後拿出電話,按入瀏覽器,舒適地繼續追看最新一期的動漫。
直至 ...

「下一站,九龍塘 ...」




「唔郁嘅?」阿謙用食指不斷按螢幕:「搞咩呀?唔係lag機呀?」
他開始檢查手機設定 ...
「冇數據?我明明早兩日先交完電話費 ...」
「仆你個街,死左機嘅?」坐在左邊的金髮青年對著電話咆哮。
「你又冇數據呀?」好奇的阿謙插嘴。
「數據?」金髮青年開始檢查手機:「咦?係喎,你又知嘅?」
「因為我都係突然冇左數據囉。」
「你咩台呀?」
「數字台囉!」
「我都係呀,咁之係個台又short左囉,屌你平時收咁撚貴月費,服務又唔對等!」




「唔係喎,我都冇數據,但我明明係聰明台 ...」站在他倆前面的一個中年大叔加入對話。
「下?!」金髮青年疑惑起來。
「唔通收唔到?但平時唔會咁嫁喎 ...」
此時,列車內的人紛紛對著手機咆哮的咆哮,漫罵的漫罵 ...
「列車即將到達,請先讓乘客落車 ...」車廂傳來廣播。
「下?成車人都冇左數據?唔係呀嘛?」阿謙心中傳來一陣不安感。

列車駛入九龍塘站月台 ...
十秒後 ...
二十秒後 ...




「喂!開門啦!」
「趕時間呀仆街!」
「屌你平時賺小市民咁多錢,而家黎壞車?」
連站在月台的乘客也開始鼓譟起來 ...
阿謙心中的不安感,卻愈來愈濃烈 ...
突然 ... 廣播器傳來一把男性的聲音 ...

「各位親愛嘅地鐵乘客你地好,我叫A,好遺憾要同你地宣佈一個消息,全港鐵路,已經比我地控制!」

「玩咩呀!快啲放我地出去呀!」乘客們開始感到不對勁。
「快啲報警啦!」
「仆街!打唔到電話嘅?」

「大家唔洗諗任何嘅逃生方法,因為我地已經控制埋地鐵站嘅大氣電波同網絡,你地所有人都唔會打到電話同上網。」A繼續說。
「個緊急手制仲有冇用呢?」金髮青年站起拉動手制,沒有換來任何反應。




「我地控制地鐵嘅目的,係想知香港人到底有幾聰明,同埋生存意志到底有幾強,而家地鐵範圍裡面總共有齊頭一百萬人,唔知最後會剩返幾多個人呢?」
「咁肯定有好多人死 ...」阿謙感到毛骨悚然,打了一個寒顫。
「而家先請大家用手機加入我地提供嘅Wifi先,冇智能手機嘅朋友將會好快收到我地send比你嘅sms。」
「下?之係點呀?」金髮青年問阿謙。
「而家都做唔到啲咩,唯有見步行步啦 ...」

阿謙加入了「生存遊戲專用網絡1」的Wifi,然後試圖上網,但瀏覽器彈出無情的「無法顯示網頁」頁面 ...
「係大家入緊Wifi同收sms嘅時候,等我再講解一下,」A的柔和聲線跟現場的緊張氣氛完全不配合:「你地將會收到一個E-mail,內容同sms係一樣嘅,
你地而家可以選擇自己嘅開始據點,據點嘅選擇將會跟據各位原本嘅行程路線,
例如你由荃灣去旺角,你可以係四條途經線路,荃灣線、東涌線、西鐵線同埋觀塘線入面揀開始據點,如果你揀東涌線,咁你嘅開始據點只可以係荔景站,
如果你揀荃灣線,就可以荃灣至旺角任何一個你鍾意嘅車站做你嘅開始據點,我地會等所有乘客揀好晒開始據點之後,再宣佈下一步行動,
冇電話嘅朋友,請去車站嘅客務中心集合,我地會有工作人員幫你,唔好試圖反抗,如果唔係,你地將會被極殘忍方式處死。」
已有 0 人追稿