「早上六點 依家由黃維為你報道一節新聞 昨夜凌晨受到海嘯影響 多區出現嚴重水浸 並有多棟樓宇倒塌 造成多人死傷 正在訪京嘅特首梁圳英表示 對香港發生破壞性嘅災難感到難過 並對受災居民致以深切慰問 表示會盡全力搜救生還者 梁圳英係記者會後未有表明隨後嘅訪京行程⋯」

「⋯乜向左走向右走嘢咁光嘅?」我比出面光整醒咗
「原來係日出 唔怪之得咁光啦⋯」
尋晚我係張辦公枱度唔覺意瞓着咗 搞到我依家條腰有啲痛
不過話時話 我都好耐無咁樣睇過日出
雖然唔係對正個太陽 但係我都覺得幾靚

「佢仲未覆我WhatsApp既 應該唔會出咗事呱⋯」
我嘗試再打電話俾佢 但係結果都係一樣




「電話暫時未能接通」
睇嚟真係除咗承哥之外 冇人個電話打得通⋯
成件事真係好奇怪 點解我可以打到比承哥但係其他人又唔得?
我真係睇唔透⋯⋯

我見到外面依然充滿積水 一心想落去睇吓
行到去電梯大堂 我先醒起
「我Hi呀⋯ 唔記得已經停咗電⋯」
我行入去防火門 望住好似深不見底嘅樓梯
深思緊下一步應該點做⋯




「呀有啦 依棟大廈好似有後備電源」


「⋯但係我唔知係邊呢…」
「唔係又要逐層逐層搵呀⋯」
然後 我諗起承哥可能知道
我即刻打電話俾佢

「喂⋯你搵我有事呀?我仲瞓緊覺啊大佬…」佢用佢把好低沉嘅聲講
「你幾眼瞓都好都要幫我架啦」




「⋯咩事咁嚴重呀」
「你喺度做咗咁多年 你應該知道邊度有後備電源架?」
「知係知道⋯ 但係我驚你用咗會俾人鬧喎⋯」
「依啲咁嘅關頭 畀人鬧我都照用架啦 總之話俾我聽係邊度」

「以前呢幢大廈有幾層本來係用來放伺服器既 所以設計左60樓有個大容量嘅後備電源」
「就係為咗大停電嘅時候 依啲伺服器都可以繼續運作」
「但係後來 放伺服器嗰間公司搵到個更加好嘅地方 所以最後無喺呢度放⋯」
「⋯但係個圖則冇改到 所以成幢大廈就剩係得60樓先有後備電源」

「得啦得啦⋯ 問你個後備喺邊姐 唔使講埋個background出嚟嘅⋯」
「sorry 突然間有興致想講 順便講埋 個後備係電表房 拜 我要瞓覺」
「喂 但係個電表房⋯」
*收線*






「⋯但係個電表房要有密碼先入到去架喎……」