食完飯,阿妹就入左房溫書,而我同莉莉絲就on99咁坐響sofa睇電視。
 
「浩仔呀,點解男主角一定要同其他男角色交換女友既?」
 
「宜家d師奶鍾意睇三角戀掛。」
 
「咩叫師奶呀?」
 
莉莉絲挨落我膊頭,攬住我條腰,再用將對腳搭響我膝頭哥上面。。
 


「咪好似你咁lo,成日箝住自己老公!」我拍下佢大脾。
 
「哈哈,我係浩仔老婆,muah!」佢興奮咁錫左我一啖,然後將我抱得更緊。
 
無記d劇真係好低質,睇左唔夠一個鐘莉莉絲已經訓到成隻豬咁。我亦忍唔住開電腦睇港視黎洗下眼。
 
一連睇左兩套劇,唔驚唔覺已經十點幾。
 
今晚約左肥輝打通宵,點都要有d補給品。
 


於是我就求其執左個街坊look就落seven買零食。
 
「先生,唔好意思wor,你仲差三蚊。」mk店員望都無望過我,串串貢咁攤大手板。
 
「兩杯唔係十二個半咩?」我好記得價錢牌係咁寫。
 
「合味道大杯麵,香辣海鮮味兩杯係十五個半,我無數錯啊。」
 
OK,you win.帶住三個五蚊雞既我宣告敗陣。
 


「屌,搵笨架..」臨走前仲要聽到條mk仔小聲既抱怨。
 
今時今日咁幾服務態度,點得架?有機會真係腰搵華仔黎同佢上翻寶貴既一課。
 
跟住我轉移陣地,兜左個大圈去到屋苑外既百佳,希望未刪門啦。
 
「先生,多謝十二個半。」阿姨彬彬有禮咁講。
 
「十五蚊唔洗找。」我霸氣咁拋出三個五蚊,擰起合味道,頭也不回咁離開。
 
都係百佳好,起碼d阿嬸既服務態度好過班臭mk多多聲。
 
今晚天氣幾涼爽,人又少,時間又早。
 
於是,百無聊賴既我決定特登行條遠路,經過第二個屋苑,再兜個大彎先翻屋企。


 
難得有個機會透下氣,咪當比個機會自己耳根清淨lo。
 
「屌,你唔講清楚咪撚走!」
 
「收皮啦,根本係你問題,係你出面有第二個!」
 
正當我合埋眼,享受緊新鮮既空氣時,一陣煩躁之聲傳入我耳邊..
 
我望一望。
 
原來響遠處一個籃球場,有三個着到不倫不類既mk小子圍緊一個身材頗高既mk妹。
 
不過,雙方只係響到指指點點,似乎仲未發生打鬥,大概都係打下嘴炮咁姐。
 


Mk妹:「分手啦!我唔想再見到你啊!」
 
Mk仔:「分咪分,反正我出面大把菜,多你一條唔多啦。」
 
Wow,我九秒九擰部電話出黎拍低過程。話唔埋咁就十幾萬views,遲下考慮出道做youtube都得啦。
 
Mk:「肯認自己偷食啦,劉進傑!」
 
mk仔:「唔係你呃鳩我話自己係處,我洗出去滾?你檢點下先啦!」
 
咦,咪住。有d唔對路wor,應該唔會係佢下話?
 
我行前少少,換個角度睇真d。
 
個女仔有一身小麥色既皮膚,化淡妝,染啡髮,梳住一個mk梨花頭。


 
白tee透bra,再搭條運動熱褲,厚底人字拖。
 
唔係下話,連個造型都吻合到咁。
 
mk妹:「唔好屈得屈,我無同人搞過!」
 
mk仔:「無?你敢講無?尋日我生日同你做個陣點會無血啊?你講啊八婆!」
 
mk妹無出聲,似乎比個mk仔一語道破,秒殺!
 
Mk仔:「講中啦!死臭雞王雅琳,我唔唱衰你個朵我唔姓劉!」
 
仆街。佢真係王雅琳..
 


我呆左兩秒,迅速停止拍攝功能,然後打比肥輝。
 
「喂,肥輝。」
 
「屌你快d on LOL啦。我老母睇完九點半,宜家訓埋tim啦!」
 
「我宜家翻唔到屋企住。」
 
「點撚樣啊又,呢次係練琴定陪條女傾電話啊?」
 
「冷靜d先..我想你幫手上高登開個post..」
 
「屌,麻撚煩..打完先開得唔得啊?」
 
「緊急事件,認真。之後陪你打幾多場都得,但勞煩你快d開post先..」
 
過左十秒到,佢開聲:「快啦,開post講咩啊?想要av seed,我大把啦..」
 
「a你老母v咩。幫我問下,如何赤手空拳應對三條mk仔而不失霸氣。」
 
電話既另一邊沉默左兩秒。
 
兩秒過後,話筒迅速傳出肥輝豬叫般既笑聲。
 
「你老板,我認真架..」真係隔住部電話都ff到條仆街恥笑緊我既神態。
 
「哈哈哈..做咩姐你,勇者鬥惡龍啊宜家?」
 
「講堅。」
 
「唔差在吹埋個三條mk仔識噴火啊笨。」
 
「開post啦你老板!」
 
「屌,等陣啦,未有人回post啊!」
 
講到呢度,個mk仔突然發難,一野扯住王雅琳隻手,逼佢跟自己離開。
 
其餘兩個mk雖然見到王雅琳痛苦掙扎,但亦恰低頭繼續玩電話,當乜都見唔到。
 
「唔講住。」我cut線。
已有 0 人追稿