「你隻腳..」
 
王雅琳既眼神閃過一絲痛苦既神色,然後搖頭講:「我無事。」
 
「不如去醫院check下啦..」我行過去,諗住扶下佢。
 
「屌,咪煩啦,我咪講左無事lo。」佢將我推開。
 
佢兩隻手撐住滑梯,勉強咁向前行左幾步。下一秒,佢皺一皺眉,然後成個人跌左落地下。
 


「比我睇下。」我踎低身。
 
「唔洗啦..」
 
我無得到佢既同意,擅自托起佢纖細修長既小腿,然後伸手向佢既腳踝細細力咁搓左幾下。
 
「痛唔痛?」
 
「唔痛wo!小小痛楚對老娘黎講算得d咩?」
 


佢忍住痛,扮無事咁講,但眼眉之間既抽搐表情已經完全出賣左佢。
 
「咁呢?」我故意出力向佢既腳腕gum左兩下。
 
「呀!痴線架你!」佢抬起頭,咬緊牙,一捶窩落我心口。
 
我掩住心口:「哇屌..一早知你咁大力,當初就唔幫你啦。」
 
佢「哼!係你自己衝出黎咋嘛,關我撚事啊。」
 


「喔。咁好lo,我走啦。」我chok個poker face,轉身走人。
 
佢:「喂,我講下笑之嘛,你唔係嬲下話!」
 
我轉頭向佢講:「玩下你姐,我孭你啦。」
 
佢塊面豬微微發熱:「你扶我咪得lo,我自己行到。」
 
我:「唔好咁硬頸,比隻腳透下啦,我怕你行多兩步仲傷。」
 
佢猶豫左一陣:「咁..咁唔該曬你。」
 
我笑左笑,踎低身:「上黎啦。」
 
呢一刻既佢紅都面曬,眼神向住唔同方向游離,簡直同我認識既霸氣mk妹截然相反。


 
唉,不過都唔話得佢,連我自己都開始有d心跳加速。
 
老老實實,咁大個人,我都淨係孭過兩個女仔,第一個係梁永宜,第二個係嘉欣。
 
一個係阿妹,一個係女朋友,所以無計啦,但點都估唔到第三個竟然係一個比我女女女過既女仔。
 
「行啦。」佢遲疑咁將雙手搭響我既膊頭。
 
我既雙手緊緊咁托住佢既大脾,五隻手指無意咁觸摸到佢細膩絲滑既皮膚。
 
佢柔軟既酥胸壓響我背脊上,身上所散發出既香水味混合少女既幽香,簡直係惹人犯罪最好既證明。
 
不過,宜家我已經無理由顧及到性愛呢方面。我只係想盡快送佢翻屋企,然後自己翻歸。
 


一黎我約左肥輝打rank,二黎阿妹見我遲左成個鐘先翻到去,實屌到我上天花板。
 
「你屋企住邊?」
 
「我..我無屋企..」
 
莫非你個mk妹學人玩離家出走?
 
我:「咁你呢段時間住邊?」

佢:「朋友屋企。」
 
我:「你朋友住邊,不如我送你去個到?」
 
佢:「yuki係阿傑d friend ,佢知我地分左手一定唔會再比我上去住。」


 
我停低:「咁你諗住點?」
 
佢:「我..我可唔可以..上你屋企訓住先?」
 
我:「唔係唔得..但我屋企有d逼,加上我阿妹未必比..」
 
佢:「唔緊要,我明白。」
 
屌,反正唔幫都幫左。幫人幫到尾,送佛送到西,呢鋪當我一次過還翻之前食左佢隻豬個條數啦。
 
睇佢個樣頂盡都係住一兩個禮拜。唔洗幾耐應該就會同阿傑複合,到時佢再搬都未遲。
 
我:「唉,一係我帶你翻去先。再問下阿妹,佢話點就點啦。」
 


佢:「真係得?」
 
我:「但你可能要陪我做廳長架。」
 
「哈哈,無問題!」佢興奮咁拍左下我背脊。
 
我:「痛架屌你!」
 
大概行左三,四個字,終於黎到屋企附近既一條長樓梯。
 
我沿住台階向上走個陣,一樣硬物墜地既聲音突然響起。
 
佢:「我跌左野!」
 
「咩年代啊..仲用mp3?」我踎低身,將一部類似mp3之類既物體拎起,然後遞比佢。

佢無回答,只係迅速咁搶走部mp3,仔細咁檢查一番,發現部機無爛個陣,即刻鬆左口氣。
 
佢:「屌,你識條鐵咩!」
 
我:「宜家個個都用手機聽架啦。」
 
佢:「只要呢部機,先可以播出好既音質。」
 
我:「恕小弟無知,音質唔係關耳機事咩?」
 
「妖!唔講啦!」我個頭又食左一拳。
 
行到一半,佢突然將一邊耳機塞入我耳仔,再將另一邊塞入自己隻耳到,然後打開mp3。
 
「sh..」正當我想問野個陣,佢將食指放響嘴唇,制止左我講野。
 
夜幕低垂,周圍靜到連車既雜音都無,只有樹葉摩擦地面既細響。
 
耳機既一端傳出一片男聲。老老實實,可能係我唔識欣賞,音質確實麻麻。
 
「皇后大道西又皇后大道東,皇后大道東轉皇后大道中,皇后大道東上為何無皇宮,皇后大道中人民如潮湧!」
 
佢跟住首歌既beat一邊fing頭,一邊唱出激昂既歌聲。
 
老老實實,我真係第一次見過岩岩分完手都仲可以咁high既人。
 
佢:「喂,跟住唱啦!你唔覺好正咩?」
 
我:「好柒..」
 
「超!」佢繼續唱。呢獲仲要痴線到一邊唱,一邊扯我d頭髮。
 
我:「點解你岩岩先分完手,宜家仲可以咁興奮既?」
 
佢停左停,回答:「帶不走的留不下,留不下的別牽掛。」

我:「咩意思?」
 
佢:「屌你咁蠢架。唉,算啦算啦!快d跟我唱。皇后大道西又..」
 
 
 
已有 0 人追稿