11月23日。
 
今日係A grade既友賽,同時係我相隔一年後從新打翻正規場既日子。
 
雖則我無預過自己有出場既機會,但仍然緊張到未換衫已經成身出曬汗。
 
「大家今日打得輕鬆d,當拎個經驗就得啦,輸贏唔重要。清唔清楚?」教練山哥例牌9 up幾句,其實全隊最重勝負個個就係佢。
 
「清楚!」我地全隊大聲叫。
 


「宜家去換衫,十五分鐘出黎。」佢擰轉面,坐翻去木凳搞戰術板。
 
我地一班人入到更衣室換衫,雖然我地無講出聲,但大家既心情都好沉重。
 
因為對面學校上年學界八強以兩分之差贏左我地。
 
記得對面對有條友同男神峰一樣,射得又鏟得,三分線比佢當兩分線咁玩。
 
當我地換緊衫既時候,犀牛講:「上年八強既仇,今日一定要報!」
 


阿信:「唉,個陣唔係浩J同建峰無手感,我地一早贏左啦…」
 
我同建峰好自然咁對視左一眼,然後即刻轉開視線。
 
我地都知道個場波既失敗唔係手感咁簡單,而係因為我先佢一步追到嘉欣,繼而令到大家不和….
 
我:「屌,講呢d。諗下點打好場波仲好啦。」
 
其他人一早搞掂曬出左去,淨翻我,阿信同犀牛響度吹水。
 


我地換好衫之後,行出更衣室,呢個時候MK琳正挨響門口側邊。
 
犀牛雙眼發光:「雅琳姐你黎撐我啊?」
 
MK琳交叉雙手,藐起嘴講:「係啦,係啦。你今日最好同我比心機d打!」
 
犀牛:「哈哈,無問題!」
 
犀牛做左個yes既手勢,然後充滿自信咁拉住一頭霧水既阿信行出去。
 
「跟我黎。」MK琳格硬拖我入更衣室。
 
我:「做咩姐?」
 
佢:「坐低。」


 
我事但搵個位坐好,跟住佢行到我面前踎低望左兩眼,講:「除鞋。」
 
「喔…」我知問黎都無用,唯有無奈咁順從佢。
 
佢起身坐埋我側邊,翹起對腳,然後將左腳腳踭上綁住既腳繩除落黎。
 
佢:「比隻腳我。」
 
我求其抬起隻右腳,佢即刻一野拍落我大脾:「屌,左腳呀。」
 
我死死氣咁側身坐,然後佢跪低幫我綁起條腳繩。
 
我:「咁mk,唔綁得唔得啊?」
 


佢:「你識條春,呢條係幸運繩黎架,有佢響度你一定會贏波!」
 
我:「下話。」
 
佢企起身,拍左下我心口:「死矮仔,生性d呀。嘉欣響出面睇住你架,唔好令佢失望。」
 
「盡力啦…」口就咁講,實際上咁耐無打比賽,我都唔知自己掌握到幾多…
 
「望住我。」佢突然用兩隻手掌夾住我塊面,擰我塊面埋去,然後望到我實一實。

佢皺起眉:「你怯!」
 
「無啊…」我將眼神移開。

佢伸頭阻擋我既視線,啤住我講:「收皮啦,連望都唔敢望仲無係心虛?」


 
我用沉默回應,因為佢確實睇穿左我。
 
「唉,一次架咋。」
 
講完,佢突然將個頭伸前,一野撞落我額頭。我下意識退後,但塊面比佢夾實左,所以想退都無得退。
 
宜家我地額頭貼額頭,鼻尖對鼻尖。佢額頭好熱,成塊面紅曬,又嬲又怕醜咁同我對視。
 
我:「好痛呀大佬…」
 
佢:「屌你咪撚理個d先啦,你同我聽住。」
 
我:「嗯?」
 


佢做左個深呼吸,合埋眼,然後一口氣講:「你唔驚,你唔驚,你唔驚,你唔緊,你唔驚…」
 
就係咁,佢重覆左三個字十幾次,直到忍唔住搭住我膊頭氣咳。
 
我:「做咩姐你?」
 
佢:「喂,跟住我講啦。如果唔係就無用架啦。」
 
我:「我都要?」
 
佢:「係呀!」
 
「OK,fine。」我照樣吸左一大啖氣,然後一輪嘴咁講:「我唔驚,我唔驚,我唔驚,我唔驚…」
 
講到喘氣既時候,我先忍唔住收聲。佢退後一步,同我分開。
 
佢:「點呀,仲淆唔淆?」
 
我苦笑搖頭:「輕鬆啦,都係你呢招勁。」
 
佢懶勁咁答:「洗乜講,我細個緊張個陣,媽咪成日咁做幫我。我見係你先益埋你咋。」
 
我:「你阿媽會撞人額頭架咩?」
 
佢:「唔係wo,個下係我自己加落去,因為你樣衰,哈哈。」
 
之後我地一齊出行出更衣室,迎面撞到一對男女。
 
男既身高米八,着住隔離校既校服,擰住一個MK單邊袋。
 
女既大概到佢膊頭,長髮及肩,五官清秀,身材方面響學生妹之中都算突出,但對波略輸嘉欣,腳略輸MK琳。
 
個男仔舉起雙手:「yo,好耐無見。」
 
我:「我地識架?」
 
「上年八強比我地洗到傻左啊?咁快失憶?」 佢一邊恥笑我,一邊攬住條女。
 
我諗諗下先醒起佢就係上年個個打波同男神峰一樣強既男仔。
 
MK琳拍開佢隻手:「收爹啦柒頭,睇下今場邊隊洗邊隊?」
 
個男仔打量左MK琳一陣,然後搭住我膊頭,挨向我耳邊細細聲講…
 
「既然你地都輸硬,唔差在輸埋多條女比我玩下啦,哈哈。」
 
 
 
 
 
 
已有 0 人追稿