「記得聽日要交IES嘅問卷同埋初稿俾我,各位同學再見」

「哎,今晚睇嚟唔使訓啦!仲有中英文嘅作文,同埋啲數……」舒雯打開她的學生手冊,看到多如恆河沙數的功課,她開始有想死的念頭
舒雯的學生手冊是眾人中保存得最完好的一本,她用包書膠把它整理得乾乾淨淨的,
而封面上亦貼滿了韓國組合BangBangBang成員的照片,她聲稱看到偶像,一切都會變得美好
「好緊張呀~!滋-dragon呀,求你俾我力量,可以快啲做完呢啲功課呀!」

正當舒雯向她的oppa支取力量的同時,焌文就用一句把她激怒
「你有咩咁好緊張呀?次次講完話緊張,出到嚟個成績就好到不得了,緊張咗會好啲咩?
啲韓仔,都唔係你身邊嘅!唔係!佢哋都唔識你嘅」


「你講咩話?你唔係同我講,啲av女優會真係幫你咬至得架!」
雖則舒雯一句就足以將焌文技術性擊倒,可盛怒的她,沒有放過他的念頭
「係呀,我係唔識佢哋呀,仲要唔係我身邊!不過呢,有一堆男仔,我識佢哋架~唔只識,仲要係熟嘅~日日都係我身邊添!就算係咁,都唔代表做唔到啲咩呀?  唔係,係無做過至真!下下啲project就係我同雪兒做,而你哋就每日風花雪月嘅享受人生!」舒雯的臉上一條條青筋,此刻都顯現了出來
「咁一係今晚係我屋企同你做埋啦,舒雯姐?」看到情況不對的焌文,此時開始採取行動

「你下下都係咁講架啦,有邊次找數先得架?」
「咁一係放學請返你飲珍珠奶茶同埋雞蛋仔?」
「只係今日,同埋只係得我一個有?」
「一個禮拜,同埋買埋大小姐個份,好啦~」



當二人講數講得如火如荼的時候,他們發覺到眾人的視線
「兩位,我哋可以行未呀?我 好 撚 肚 餓 呀!」大胃王姚明面上的表情顯得僵硬,他的四枝變得無力,一副快要倒下的模樣
「你仲好意思講?你都係hea精之一嚟…仲要係最衰個個,一放學就返屋企打機!」
「其實,不如我哋食住講?」雪兒的一句,將一場即將發生的災難停止了

「咁就行啦」
焌文扯起了雪兒精心綁起的麻花馬尾,他將固定着髮型的橡皮筋扯了下來,雪兒那把流麗而柔順的髮絲就一下散開來
「西米露,俾返我呀~!你仲乜要扯我馬尾呀?我整理咗成個鐘架啦,你就一下子破壞佢!」雪兒用右手將散了的頭髮抓住

此時,焌文就斯斯然的離開課室,而紫色的橡筋就被他戴在手上


「咪走呀你!俾返條橡筋我呀!停呀~」雪兒開始追起焌文,而因為要顧及頭髮的關係,她跑得不是很快
「你估叫我停就停咩?Catch me if you can」看到雪兒"倒瀉囉蟹"的追着他,貪玩的他,將腳步加快了,二人的距離一下子增加了不少
「喂呀!!」

看着二人追逐戰的,是其餘的六個男生,還有舒雯
「咪幾好,之前都唔知做咩,兩個成日都嘈」男神看着關係改善的焌文和雪兒,舒了口氣
「係呀,我都係咁話」口裡如此說的舒雯,眼神卻是看着男神
(咁你同我呢?)
「明明就話唔會接受人,又係度講話人哋公主病咁!你睇下而家佢?」姚明說
「幾好,身體很誠實」怕醜仔笑着說
「咁又係嘅,雪兒人又靚,身材仲正!我係佢都會…哎呀!」光洙說着的時候,被舒雯重重的賞了一拳

的確,焌文會改變對雪兒的看法,無非都是儲物室事件,看到哭得死去活來的雪兒,他確切的知道,雪兒同樣是受過傷的人,於是就決定用自己方式去幫助她,走出傷痛。

「咁慢架你哋,無位架啦」焌文停下了腳步,他將戴住橡皮筋的手舉得高高的,身材較為細小的雪兒,要取得橡皮筋,需要不斷的跳才可能取回


「俾返你啦」焌文將手放下,天真的雪兒終於可以停下來
「邊有咁快呀~」一秒後,嬉皮笑臉的焌文就將手臂繼續的舉着,可憐的雪兒亦只能繼續的跳

午飯時間,可以稱之為戰爭亦不為過,
通常一個所謂嘅學校羣,附近會有兩三間的中學,而多數情況下,只會有一個商場,入面的食肆都只係得三兩間而已,可以用求過於供形容。當然,名校村嘅選擇會多好多啦,呢度指的是屋村旁邊嘅學校羣
以每間中學有一千二百人計,就會有二千至三千個學生,他們要於嗰一小時內,爭到入去食所剩無幾嘅幾間食市
鐘聲一響,就代表戰爭開始咗
所以啲學生都會爭取用最快的速度,到達他們的目的地,有啲仲會係跑嘅
另外,總會有其中一間學校是遲放午餐的,就那些學生只能於門外等候入面的學生談天說地完後,才可用僅存的時間,快速吃完,再趕回課室上課。他們的午飯時間,有大半都用來等待位子,真是慘慘豬
好彩,杏壇中學附近嘅商場,都有十幾間餐廳食肆咁,如果唔係就佢哋咁慢,完咗lunch time都未必有得食

先回到焌文他們的情況
一輪的吵鬧後,他們決定了到一家粥店進餐

「都唔係好知呢啲係咩,Sherman,話俾我知」雪兒看着餐牌上林林總總的食品,看了許久,都不明白是怎麼樣的食物


「你唔明邊啲呀?」
「咩係及第粥,同埋咩係艇仔粥呀?」
「及第粥,則係豬肉丸、豬心、豬肝、粉腸整嘅粥,係生滾粥嘅一種嚟
而艇仔粥呢,就係牛肉碎、油炸鬼、炸粉絲、、魷魚同埋豬皮,同樣係生滾粥嚟」

「等等,咩係粉腸,咩係豬紅」
「豬紅,係豬血嚟,好似豆腐咁嘅形狀嘅,食落口就滑lutlut
至於粉腸呢,唔係劉焌文鬧人哋個啲,而係指豬腸」
「香港人咁中意食埋啲內臟呀、血咁嘅?係外國唔多會接觸到」
「咁係上一代嘅文化,傳到落嚟姐,你唔想食?」
「一場嚟到,咪試下囉,人一世物一世。等等…有無花生先?你知啦…」
「咁又係,雞子你都食過啦,有咩唔可以試?」焌文對雪兒恥笑着
「呢個就....我嗰時都唔知!」
「夠啦,劉焌文就咪串佢啦~
Sherly,一陣同佢講走多花生走青丫嘛,記得嘅


只叫一個粥好易肚餓,不如叫啲小食?炸兩同埋炒麵都好出名架」
「好啦,唔該~」
「雪兒,乜你無食過呢啲?」光洙問道
「其實我好少返香港嘅,所以都無咩機會食」
焌文此時想到了雪兒的背景,不過他無對大家說出來,為的是保護雪兒

等了一下下,食物就送到了
「嚟嚟嚟,開餐!」說着這話的姚明,面前有兩碗粥,一碟叉燒腸以及一碟炒面
「你食唔食得哂呀,咁多」雪兒問起
「你唔好睇好似好多咁,呢個化骨龍三兩下就食完」焌文說着
「等我試下先~」雪兒嘗試起她點的艇仔粥

細細的品嚐後,雪兒表露了幸福的表情
「嘩!好好食呀!啲粥口感綿滑而且有濃郁的米香,食落口非常舒服,
而加咗啲一粒粒嘅面包,同埋的粥食,口感就變咗有唔同嘅層次


啲牛肉同埋魷魚就煮得岩岩好,唔會好un好老咁,有佢本身嘅味道同鮮味,
將所有嘢夾埋一齊食,就更加不得了,口入面唔同嘅味道一次過爆發出嚟!
我好中意食呀~」
「難得有知心人,真係好」姚明看到同樣愛吃的雪兒,感動到不得了
「乜你唔使扮細食咩?大 小 姐?」焌文奸笑着的看着雪兒
「唔理你呀!我仲未嬲完你!」

「試埋個炸兩先講啦,中意食炸嘢嘅一定中意」舒雯將炸兩夾紅雪兒
雪兒將一小節的炸兩放入口
「呢個仲不得了,一樣食物,有兩種口感,外面薄薄嘅腸粉爽滑而順口,內層嘅面包就非常脆口,入面嘅部分就…真係好好食呀~」
「睇下你呀,好似人哋講食評咁」區長笑着說
「咁真係好好食呀嘛!」

「乜嘢面包呀,係油 炸 鬼!」
雪兒的表情,從幸福滿瀉的樣子,轉變為一臉不解
「下?乜鬼都有得炸嘅咩?」
「你個真心膠呀,都唔係真係鬼,而係諧音嚟姐」
「唔明。」
「即係玩食字。要追溯就要講返宋朝嘅一個仆街」本來嬉皮笑臉的焌文,表情突然變得嚇人
「呢個奸人叫秦檜,勁乞人憎嘅佢,就係砌岳飛生豬肉嘅仆街嚟嘅。
因為咁,啲人就好憎佢,於是就整咗呢樣小食出嚟,希望佢兩公婆死後落地獄不突只,仲要俾閻羅王將佢哋放落滾油度炸。
仲有,點解油炸鬼會係兩條孖住,係因為要一次過咒哂兩個人……
所以如果你唔想俾人炸嘅話,就要做仲好人,知嘛……haha~」焌文扮鬼的說着,而聽着的雪兒更被嚇得打起冷震
「你講完,都無好咗咁嘅?」雪兒仍然是一副驚恐的模樣
「咪聽佢尻up啦,佢係想玩你,睇下你個驚樣!」區長說穿了焌文的想法
「都唔好玩嘅!仲想睇佢驚耐啲架嘛,仲咩提佢啵!」

「你講到咁好食,等我食下?」焌文將碟上的炸兩送到嘴裡
「喂呀!食埋人哋個份都有嘅!」
「係咁架啦,朋友係要分甘同味嘛!怕咗你啦,俾你食返我啲糉啦?」焌文將碟子遞給雪兒
「你唔係想同我間接…」
「邊度會同你諗埋呢啲呀?食你就食啦!」
「加啲糖,會好食啲架」姚明邊吃炒面邊說
雪兒將糉的一角夾起,沾了砂糖後,放到嘴裡。咀嚼了幾下後,她幸福的的表情回來了
「呢個真心正呀!啲米軟熟得嚟,仲有啲粘口,不過未去到痴牙咁,而係剛剛好嘅程度
食耐啲,仲有啲竹葉嘅香氣添。加埋啲肥豬肉,就更加停唔到口~」

「等等」焌文叫停了雪兒
「咩事?」
「你渣筷子渣錯咗呀,你睇下?」焌文看到雪兒拿筷子的姿勢,是用拳頭拿着的,於是看不過眼
「無事嘅,食到咪得囉」
「說話就唔係咁講,你話哂都係半個香港人呀,渣得唔好,
啲姨媽姑姐會話你無家教,係度煩你架啦,你都唔想俾人串到無聲出架?
仲有,自己望落都核突啦,何況係其他人?」
「咁點渣先岩呀?」
「嚟啦大小姐,放低對筷子先~」焌文將手撘上雪兒的手,親手的教她用好一對筷子的方法
「首先,將其中一隻放係無名指上面先,之後就用呢個叫虎口嘅位夾實先。」
他將筷子放到雪兒的手上,如同教小孩一樣的教着。雖然雪兒有點難為情的看着他,可她有乖乖的跟着焌文教的步驟做
「之後呢,就將另一隻放上中指上面,用手指公同埋食指hold住,做得好。差少少」

「Sherly又會咁聽佢話嘅?發生咗咩事呀?」舒雯對男神輕輕的說着
「我到想知,重點係點解文少會對佢咁有耐性,究竟發生咗咩事?」
上次在儲物室的事,是焌文和雪兒二人間的秘密,
當時雪兒要求焌文不能將事件告訴任何人,包括舒雯
還說如果焌文不小心爆響口,會告訴舒雯他打架的事
每次舒雯知道焌文打架,都會和他冷戰一星期,為免這樣,怕麻煩的焌文只好答應
因此,男神和舒雯不知二人的關係,是因着此事而轉好的

「好啦,到咗最後,試下yuk食指同中指嚟夾舊糉,連埋紅色個舊」
「有啲難夾啵!」
「萬事起頭難,試多幾次咪得」
「試下先」雪兒這下夾起多一點的糉,她將連部分咸蛋黃的糉放入口中
「Ummmmm!會唔會太好食呀!蛋黃同埋啲豬肉好夾,啲油仲要!Ummm!」
「你唔驚肥嘅咩?」
「唔驚得咁多啦!」
​「肥死你呀!」
其實雪兒是食極都唔肥嘅女仔,點食都好,身材都係咁好
當其他女仔努力節食、唔食肥膩嘢嘅時候,她就係旁邊食啲三高食物
最勁嘅係,佢食咁多嘢都好,體重都無咩增加過,可以話係女仔夢寐以求嘅體質

看到吃得津津有味的雪兒一位穿著背心短褲、踢拖的中年男人向着眾人走去
「喂,你哋嚟咗啦?」男人用聲如洪鐘的聲線打起招呼
「南哥!」眾人向這位名叫南哥的男人打起招呼
還在吃着的姚明,此刻暫時停了口「男哥~」
「又係你呀,睇見你食得咁高興,我都開心埋一份!哈哈!」
「hey,南哥!出嚟抖下?」
「喂~文仔!」南哥和焌文撘起膊頭來
「一嚟啦!個廚房熱到我呀!二嚟係睇下邊個咁欣賞我手勢呀嘛!一出嚟就見到有個靚女食得好開心,食得幾咁滋味」南哥倒起凍豆漿,並喝起來
「得佢一個靚女炸!南哥你當我無到?」舒雯說
「點會少得你呀,雯女!未知佢個名,咩叫住靚女先囉!」

「介紹咗先,呢位仁兄就係呢間店嘅老闆──南哥,啲美食都係佢一手一腳整出嚟嘅」
「多謝啵!哈哈!呀妹,未見過你嘅?」
「係呀…我係今年嘅新同學。南哥,你好,我叫雪兒。」
「你好!幾好禮貌咁啵。」
「多謝。南哥,你呢度都好多人捧場啵」
「咁就要多謝文仔啦!就係佢上年幫我登食評上報紙度,先多咗咁多客嚟捧場。
本來都係做下街坊啲生意,經佢一嚟?就連其他區嘅人都渣車嚟買粥食,做到無停手」
「乜說話呀,都要南哥好手勢先得架!」
「今日咁高興,又識多個朋友啦,請你哋飲豆漿啦!」
「多謝南哥!」眾人對南哥說

「你幫人寫食評,無聽你講過嘅?」雪兒看着焌文說
「我呀媽係做報館嘅,帶佢嚟食完之後,就話一定要介紹俾其他人識咁話,咁我順便幫手寫食評」
「咁佢做咩post架?」
「老總。」

「下!?係真唔係呀,點會生到個仔,好似你咁?」
「好失禮你咩我?」
「係架啦,紅髮mk仔」
「你講咩話?溫室小花!」
「有講錯咩,仲要成日講粗口,食煙同打交嘅gangster!」
「咁你呢?化哂妝,仲要成身香水味返學嘅大小姐!」

「Hi!呢頭話佢哋好咗啲,個頭就鬧哂交咁」男神看着二人,輕輕的慨歎了起來
「睇你點睇啦!話唔定,呢個就係佢哋相處嘅方式呢?」在旁的舒雯安慰起他

到於,點解會話係快要消失嘅味道
係因為而家香港好多地方,無論係屋村定係商場嘅位置,都俾啲大集團攏壟斷咗
先講啲舖位,而家係香港最驚嘅,係要加租
係食碗粥,三十幾蚊,至少有成廿幾蚊都係俾咗做舖租度
加上食物來貨價錢又不斷加,連埋糧油雜費,小商家根木無法有生存空間
而且,本地嘅年輕人都好少幫親,只係得嘅上一輩支持,跟本就唔夠維持運作
種種的因素,都令傳統的街邊小食同食肆面臨倒閉嘅結局

偉大嘅香港市政府有話要推廣香港地道小食,不過都係得個講,無做啲貼地嘅行動
個小食車計劃,聽落幾好,實質仲難過阿根廷做美州杯冠軍:
首先,就係架車本身,就打死咗唔少人,
一般七八十年代嘅推車仔,就唔俾做,
要嘅,就係成廿萬一架嘅貨櫃車(好似咁嘅樣)
之後仲要過埋啲評估,過五關斬六將,搞勁多嘢,先可以係迪迪尼公園,同埋其他旅遊區做半年咁多,最過分係,到咁上緊就要轉地方

由頭到尾,呢個根本就治標唔治本嘅方案嚟,最重要嘅,仲係我哋本地人,去親身支持,同埋向外推廣,分分鐘仲有效過政府嘅行貨方案
而家仲有你選擇食咩好,到咗遲啲有特色嘅香港味道都消失得七七八八,就太遲了
已有 0 人追稿