【重甜】死後重生，我成為咗屌閪王！(港語): 一章第一話《枉死》
「砰！」
「好撚痛……」呢個係我呢一刻第一個感覺。
但好快，我已經唔覺得痛。無他嘅，我見到自己撻撚咗喺下面，於是我諗到啲嘢。
以前有一段時間好流行啲乜撚嘢膠問呢，其中有條友問，話佢俾架車炒到飛起，到而家未落返嚟，上知識plus問人點拆。
我曾經因為呢條戇鳩問笑到成個戇鳩仔咁連鳩都戇撚埋，但而家我真係笑唔出。
我忽然間發現，識得痛，笑得出，可以上網睇知識Plus，其實已經可以好幸福。
喂我死撚咗呀屌你！！！
抬高個頭望望個天，又有個白色嘢，即係好似我咁，飛緊上天。
我醒起喇！頭先好似話嗰邊有條女跳樓，我諗住走去睇，隔住條馬路見綠公仔衝過去，之後……
屌，之後咪再沒有之後，連恨也不留囉…咪撚住！明明綠燈點解轉眼變成紅燈仲要車鳩死埋嘅？
我望望嗰個白色嘢，開始慢慢見到係條女嚟嘅，跟住又有一黑一白嘅人衝埋去捉住佢。
黑色嗰個就黑到乜咁，白色嗰個條脷成隻寵物小精靈咁長，一睇就知黑白無常啦…
啱喇，咁轉頭實嚟帶埋我走啦…
我嘗試想走過去，先發現自己除咗一直爬升，原來仲可以控制方向嘅。
於是乎我就飄過條女嗰邊，點知佢哋又調頭走噃……
「喂！阿Sir！」我想嗌住黑白無常，佢兩條友挾住條女仲走得快過乜，嗌都嗌唔住就消失埋。
呢鋪點拆呢？喂唔係噃，橫掂我而家都死撚咗，即係鬼啦！咁不如嚇下特首條仆街吖……
於是我望清個方向，飄呀飄，仲飄過飄柔咁係咁飄。
飄到去禮賓府附近，見到有個紅衫仔喺上面飄緊，我就埋去嗌佢喇。
「喂紅衫仔！」
紅衫仔之所以叫紅衫仔，事緣條友著件紅背心，成個聯交所啲人咁，背脊仲寫住「四六八九」四個金字。
「你叫我呀？」紅衫仔問返我。佢唔開聲，我完全唔會聯想到，佢原來係女嚟。
細心Ｄ望下佢，眼大大，臉圓圓，細細粒粒，目測３４Ｃ既身材有少少肉地，應該係可愛教主果Ｄ類型。
「咁一天飄緊嘅都著白衫，得你一個著紅衫，我唔嗌你唔通嗌張一百蚊紙咩？」
條紅衫妹拎咗部平板出嚟，口嗡嗡話:：「咁寸吖嗱？照下你咩料先？」就影咗我一張大頭喇……
見佢拎部嘢出嚟咁盞鬼，我又飛埋去睇睇吖。
唔睇由自可，一睇？早知你個冚家拎。
紅衫妹：「喂你死咗幾耐？今年幾多歲？」
「啱啱死咋……」我指住車禍現場嗰邊，「28歲就釘咗蓋，我個樣咁長命又買旗又剩，係冇捐錢俾大陸啫，唔使咁快死呀？」
「快啲返過去！」紅衫妹扯住我隻手，一下就衝返埋去。
「喂我仲未嚇啲舐共狗官架……」我句嘢都未講完，已經俾佢拉咗返去。
我從來冇諗到，做鬼平時應該死下死下咁飄，原來係可以好似龍珠啲人咁飛得咁快。
而呢個時候，我亦留意到，頭先炒低我嗰架車，已經炒咗埋石壆。
但係我條屍呢？明明頭先唔係咁擺法架……
呢個時候，又一個著銀色衫嘅女仔飛咗過嚟我同紅衫妹附近，佢一見到我同條紅衫妹，第一時間又拎部平板影我相。
睇睇女仔個相頭，頭髮長長，下巴尖尖嘴細細仲要白白淨淨。
呢次我唔奇怪喇，唯一好奇嘅係，著連身裙點解要著銀色呢？
不過呢條銀色連身裙有佢既好處，就係非常之貼身，加上佢既高佻身材，條裙就顯得好短。一望對腳又長又白，起碼４３吋。
銀衫女仔望望佢部平板，又望望紅衫妹，跟住指住我話：「喂紅鈴，佢未夠期噃，點解會死咗嘅？」
咩話？紅鈴？你個名咁柒嘅？
「鬼唔知咩？」紅鈴影咗一影我條屍，「但係俾佢返落條屍都冇用啦，條肋骨插穿個心臟整到爛晒。」
「喂陳志文！」銀衫女仔收起部平板，遞咗張卡片埋嚟俾我。「我係地獄世界有限公司架，我叫銀茹。」
地獄？喂又天堂與地獄呀？唔係咁老土呀？
銀茹拎返部平板出嚟隊俾我，上面有我個名啦，樣啦，出身年月日死亡日期嗰啲行貨資料。
「嗱就咁嘅陳生……」銀茹繼續講，「我check過其你仲有70年命，不過而家就提早咗……」
「喂搶客呀八婆？」紅鈴飛埋過嚟，就話：「個客我搵先架……」
「你哋可唔可以尊重下我呢其實？」對於呢兩條女，我實在有啲唔耐煩。「有冇人可以話我知而家咩皮？」
其實呢…死唔死好閒啫，唔死都死咗，條屍又搞到咁，我都已經冇乜好怨，剩低都係擔心屋企人生活啫。
佢兩條女七嘴八舌講完一輪，等我重新組織一下。
本來我有98歲命既，但好不幸，唔知做乜鳩我無啦啦死左。而紅鈴同銀茹兩條女呢，就係分別由天堂同地獄派黎呢區，所以呢區有咩死人，點死幾時死，收與唔收，其實都由佢兩個決定。
如果一個人生前仆街都盡，連龍蝦老公都冇佢咁仆街既，咁唔使拗啦，銀茹會CALL定黑白無常等佢一埋單夾佢落地獄；相反如果佢成世行善積德，咁紅鈴搵天使等佢銀茹都唔會過問半句。
而我呢個CASE最特別之處，就係我唔單止明明唔使死又死左，更有趣既地方係，平時作為參考既善惡指數，我岩岩搭正中間，正正都冇咁正。
亦因為咁，紅鈴同銀茹就會爭到底我係歸邊個喇。究竟點解佢地要拗到面紅耳熱呢﹖
聽佢地講返，話說天堂同地獄自從實行公民提名既真普選之後，佢地既民生日漸改善。為左令到民心所向，大家都有好多福利政策，包括全民退保。
衰就衰在，由於而家凡間既人越黎越唔肯生仔，於是乎長遠落去新鬼會越黎越少。放長遠少少睇，即係話佢地要維持龐大既福利開支，必須要有更多既鬼交稅。
換言之，銀茹同紅鈴既責任，就係做燈頭拉人入場。唔好睇少呢門生意，聽佢兩個講，有D天災多既地方，要搵最TOP既SALES去，畢竟，佢地靠食佣架嘛……
聽完佢地講，我就問喇︰「咁我蝕左七十年而家點搞先﹖」
銀茹即刻話︰「我話晒都係魔鬼，雖然你冇做過咩大事，個靈魂唔多值錢。咁但係你賣個靈魂俾我，我幫你還陽丫……」
「你搵我笨呀﹖」我問返佢，「我條屍搞成咁點還陽呀﹖」
「我就有辦法喇。」紅鈴話︰「我幫你時光倒流返去之前你避左架車，咁咪有得還陽囉﹗不過你要加入天堂先架……」
時光倒流都有得玩﹖咁就盞鬼喇……
「得你可以時光倒流咩﹖」銀茹即刻話︰「我唔只可以幫你時光倒流，我仲可以幫你開外掛，等你同人打交一定贏﹗」
「唔好意思，你地有冇人有煙﹖」我煙癮起就想食煙︰「你知啦，包煙漏左係條屍度……」
一問紅鈴即刻隊左包煙埋黎，仲幫我點埋。
反而銀茹呆左咁望住紅鈴，好愕然咁問︰「你做咩俾煙佢食呀﹖」
食支煙有咩咁大不了呀﹖大佬，死左咁耐煙都冇食過一啖呀……
「係噃﹗大獲﹗」紅鈴都望住我︰「咁點算﹖」
「咩事先﹖」我好奇怪望住佢兩個。
銀茹話︰「我地Ｄ煙食左既鬼會有法力，有左法力就可以用我地既法寶……」
我問︰「咩法寶咁巴閉先﹖」
紅鈴話︰「你做咩話俾佢知呀﹖」
銀茹即刻嗌出黎︰「仆街喇﹗」
我話︰「你有咩法寶呀﹖唔講我跟紅鈴走。」
銀茹苦笑︰「咪頭先個逢打必勝外掛囉……」
「仲有呢﹖」我話晒未死果陣係做SALES既，講價Ｒ贈品﹖我驚都未過啦……
「仲有逢賭必勝外掛……」
我即刻話︰「好似跟你落地獄著數Ｄ噃﹗」
紅玲即刻話︰「好叻咩﹖我除左時光倒流，我俾埋個催眠外掛你，你講野人地好難會拒絕架……」
我諗左一諗，反正時光倒流，不如玩大Ｄ啦……
「不過唔係噃……而家咁樣，算唔算違反天意架﹖」
「唔算﹗」佢兩個咁齊，我就知我更加有機會更著數。
「丫……其實你兩位算唔算係神呢﹖」我摸摸下巴，先醒起鬼係冇下巴既。「唔知如果我要投訴我無辜枉死，應該搵邊個部門呢﹖」
「陳生，有事慢慢講，唔好咁勞嘈……」紅玲俾我嚇一嚇，即刻耍晒手，「係咪條件方面有咩問題呢﹖」
反而銀茹就淡淡定︰「陳生，你要投訴呢……其實唔係問題既，不過要跟正做，時光倒流就冇架喇……」
「哦……問清楚先，萬一俾人發現就唔好啦……」我對住佢笑笑︰「你知啦，我呢Ｄ小鬼，大不了投唔到胎。你地又唔同呀，你地神黎架嘛……雖然就細
Ｄ……」
紅玲即刻爆左句︰「咩細呀﹖我地假假地都叫做係個神，要玩你話咁易架﹗」
「乜你有聽過俾人玩完會去幫襯架咩﹖」呢個紅玲蠢蠢地，就由佢入手︰「不過咁……有冇保養先﹖」
銀茹問︰「你想點保養法丫﹖」
「拿……好簡單，」我係時侯講出我既諗法喇﹗「我要返返去十二歲﹗而你地要係我身邊一路幫我，我保證，我會做好多單大野，到時你地先再去爭個貴價靈魂。點睇先﹖」
睇個樣，紅玲已經想應承。反而銀茹仲有Ｄ保留，佢問︰「你想做Ｄ咩大事先﹖」
「我要彌補我以前既遺憾﹗」我忍唔住講，「然後，我會利用你地Ｄ乜乜外掛，將而家社會困局改變。」
銀茹同紅玲商量左一陣，飛返過黎指住我講︰「俾我知道你係呃我地，你會有好嚴重後果﹗」
紅玲問︰「你知唔知如果你一有咩行差踏錯，歷史會改變架﹗」
「如果歷史唔改變……」我笑一笑問返佢︰「你地使乜幫我時光倒流，咪由我蝕左七十年命囉……」
紅玲驚我投訴佢，唔敢再出聲，無助咁望望銀茹。
「當然啦，之後既日子，邊個幫到我，我個靈魂咪歸邊個囉……」