「喂喂!等等我呀!」才走出沒多遠,就有一把聲音叫住我們。

「小白? 你跟埋嚟做咩? 你留喺城入面幫我睇住濘沁同星凌啦。」

「星凌那用我照顧,而且濘沁姐有卓大哥和星凌照顧就可以了。」小白喚出一根冰槍在把玩。

「小兄弟你係聖獸白虎? 你知唔知聖獸有無咩弱點? 」

我插嘴﹕「你估用藥有無用,我自己隨身都帶咗啲迷藥毒藥同瀉藥。」



「弱點? 我不知道啊,不過人類的藥物對我們來說是沒有效的。」

咁即係要同佢哋打真軍? 楊兄都唔夠揪喎!

「睇嚟要同佢哋硬碰硬......一陣如果再遇見青龍同朱雀,你同卓翎就纏住朱雀,而我就拖住青龍,小白你負責其他嘍囉,記住我哋一陣係去救返三千騎兵入城,所以拖延住佢哋就得,唔好搏命。」

若果以我和龍師姐的能力,兩人一起拖住朱雀應該沒有問題,問題只在於沒有了天神附體的楊兄能否撐住青龍的攻擊。

我從懷裏掏出了幾個瓷瓶拋給眾人﹕「我自己煉嘅藥,可以加強能力,各位食咗佢先啦。」無錯,就係好耐無出場嘅隻揪套裝。
 




我們開始見到有士兵出現在地平線上,亦隱約聽到廝殺聲。

前方數哩之外有一團金影在快速移動,應該就是光靈族的騎兵了,只見他們整齊有序的前進,看來並未被菲普斯軍偷襲。

我們加速前進,沒多久終於追上了前軍。

楊兄跟那領軍接洽﹕「狄米可,我哋要即刻撤退回城。」



狄米可是一個短髮的光靈族年青人,年紀看起來跟我差不多,他悶哼一聲﹕「是楊先生? 我奉王子殿下之命追擊敵軍,而且現在我軍形勢大好,為何要撤退? 」

「呢個係菲普斯嘅陷阱!佢根本未死,佢只係引誘我哋出擊打平原戰!無咗城牆保護,我哋就要逼住同佢肉搏,咁樣對人數少對方幾倍嘅我哋非常不利!」

「哼!楊先生來的時候沒有看到沿途死去的是那方的士兵嗎? 憑菲普斯那群烏合之眾,縱然多我們於數倍又如何? 你們說是不是? 」他最後一句大聲向身旁的士兵發問,士兵們都很大聲的和應。

楊兄皺起眉頭﹕「殿下而家就係派我嚟救你哋返去。」

狄米可仰天大笑﹕「救? 我們形勢大好救甚麽? 再者,你說奉殿下之命,那令牌呢? 」

「時間緊逼,頭先無問殿下攞,但係殿下應該講過佢唔喺度嘅話要聽我號令。」

「嘿!沒有令牌的話,誰知道你說的是殿下吩咐還是你自己的意思? 何況將在外,軍命有所不從......」就在此時,有一個小兵向狄米可稟報﹕「報告將軍,前方一哩發現零星敵軍,他們正在慌忙撤退。」

狄米可大笑﹕「楊先生,聽到沒有? 敵軍就如待宰羔羊,我們將到嘴的肥羊放走可是會遭天遣的。」他轉向士兵道﹕「傳令下去,全軍馬上追擊!」



狄米可一夾馬腹就領著他的人馬離去,現場只留下我和楊兄面面相覷。

「大佬,人哋唔聽你枝笛喎,而家我哋點算先? 」

楊兄在地上以藤蔓和土丘將地形展示給我看﹕「過咗呢段草地前面會越嚟越窄,到咗盡頭係一個被森林三面環繞嘅谷哋,如果要設埋伏,嗰度係最適合嘅地方。」

「咁......我哋而家應該點做? ......」雖然預測到敵人的佈置,但我這個戰場新丁完全不知道要做些甚麽。

「你無玩過三國誌咩? 我以為你都係打機大咋。」

「有係有,但......而家真係打仗喎,同打機應該好唔同啩? .........」

「咁的確係有唔同,你見到敵人真係要拎把刀隊佢囉。」



楊兄還是將殺人說得若無其事......

楊兄看見我的表情,大概猜到我在想甚麽,他瞪了我一眼﹕「做咩? 你仲未敢殺人? 你唔係一直俾人追殺咩? 你唔殺人點走得甩? 」

我苦笑,人,我當然殺得不少,殺的那刻沒想過多少,但我心底裏還是很抗拒殺人......

「呀南,殺人只係一種手段,你試吓將自己以一個第三者角度去睇,咁你會好過啲。」

「第三者角度? 」

「即係好似打機咁,你望住個芒見到你軍隊啲士兵越嚟越少,你唔會有任何感覺,因為你覺得一切都係虛擬。你將呢個觀感放落真實戰場,其實所有人都係虛擬,你就唔會有任何猶豫;只要你打仗時唔放任何情感,就可以好冷靜咁作出正確判斷,要做長勝將軍,其實唔難。」

「楊兄你可以做到? 」

他苦笑一下﹕「當然唔得,但我會盡量。」他笑了笑﹕「如果係Lucy遇到危險我諗我都係冷靜唔到,但如果換咗係你嘅話我應該可以。」



「咁如果係龍師姐呢? 」

「屌!講呢啲!」
 


楊兄迴避過後,我們又回到眼前的問題上。

我冷靜分析現時形勢,若我是對方的話,我會引誘狄米可追入林中,然後先在其退路兩旁佈下伏兵,待敵軍入林後藉著樹林的掩護以弓箭手偷襲,可以的話配合火攻,屆時狄米可的騎兵定然大亂,只要待其慌忙撤退時以伏兵擊之,三面圍攻之下狄米可定必全軍覆沒。

那我方軍隊該如何應對才是? ............

我沉吟一會後,以小石塊推演敵軍的佈置﹕「假設狄米可完全中計,佢應該會被火攻或弓箭逼出樹林,到時敵人趁亂喺兩邊用騎兵衝擊,就足以將狄米可三千人衝散,然後逐個擊破。唔好話敵軍人數多過我哋,就算係少過我哋都一樣可以大獲全勝。」



楊兄將屬於狄米可大軍的石塊退出林外﹕「無錯,所以第一步,就係要喺狄米可入林後,防止佢俾敵人偷襲,只要大軍無混亂,就算退返出林俾兩邊夾擊,以狄米可嘅能力絕對可以抵擋。」

「但係點樣令狄米可安然退出林外? 敵人用火攻嘅話......」我靈光一閃﹕「我哋跟佢都用火攻咪得囉!」

「Exactly!」楊兄用火點燃了代表森林的藤蔓,然後控制著風向﹕「我哋只要等起火之後,控制風向向返森林入面吹,咁被火攻嘅就會係敵人。當然,我哋唔排除敵人都有人會風系魔法,咁到時就要睇吓係佢勁定我哋勁喇。」他著人召來會風系魔法的士兵,結果就只有九個人。原來這裏跟中土一樣,會魔法的人,就如中土會五行術的人一樣少,而且據非正式統計(統計方法為楊兄遇見過的魔法師),風系的比例是最少的。

「得九個人,加埋你、我仲有卓翎都係十二個人......我諗對方識得風系魔法嘅人都唔會好多,始終識魔法嘅人都只係少數,而識風系嘅就更少。」

既然如此,就算對方埋伏的士兵比我們總兵數還多,會風系的人應該會比我們更少。

制定策略之後,我們一行十二人連同小白(小白係都要跟埋嚟)脫離大軍率先趕往前方的森林,而一千騎兵則交由副將統領。楊兄吩咐他於前軍一里之外待機,等待前往應援。
 


我們率先越過了前軍來到平原盡頭的森林之前,此時已近黃昏,林內光線漸暗,若果狄米可領軍入林的話,正是給予對方上佳的箭靶。

我們停在森林之前,我、楊兄和龍師姐交換一下眼色,然後同時將傳聲術的有效範圍施展到最遠,果然,我聽到了大量的呼吸聲。

師姐驚呼﹕「啊!真的有很多人在林內!應該有近百人!」

「Nonono,應該係幾百人!」我聽到的呼吸聲此起彼落,雖然無法計算人數,但少說也有數百人。

楊兄靜聽了一會兒後道﹕「你兩個都錯,係起碼過千!」

過千......若果狄米可真的領軍入林,就算對方不用火計,只用箭矢也足夠令他幾百人馬傷亡。

師姐將我的擔憂說了出來﹕「林中埋伏了過千人,就算對方不用火攻,也足以殺傷狄米可的軍隊近半,那還用打嗎? 」

小白仰躺在馬背上,懶洋洋道﹕「要阻止他們入林不就成了? 何不一把火將整片森林燒掉? 」

「無錯!先下手為強!呀南,你向左面,我向右面,一里之內盡量放火。」然後他向餘人道﹕「你哋分兩team人跟住我兩個,見到啲火開始蔓延就控制風向吹入林入面。」

商量完畢後我們分作兩組,分別向東西兩方而去。
 


我一邊跑一邊以火球亂射入林中,不消多久就點起多個火頭。由於今天天清氣朗,濕度也不是特別高,火很快就蔓延起來,跟著我的那組人馬上各自咏唱,一時之間林內風聲大作,令火勢紛紛向林內燒去。

沒過多久,我回到分別的地點和楊兄回合,這時眼前的森林已經火海一片,而藉由傳聲術我亦開始聽到林中的伏兵在大呼小叫。頃刻之後,最前方的火焰竟然往回燒過來,看來對方的風魔法師開始將風向逆轉。

楊兄向龍師姐道﹕「你指揮佢哋繼續施法,我同呀南會入去搞掂對方嘅魔法師,你見到啲火全部吹向入邊時,就可以帶佢哋撤退。」

師姐的語氣帶點猶豫﹕「你......小心點......」然後就領眾人離去。

楊兄一直盯著師姐消失的方向,直至完全看不見了,他才呼出一口氣。

我笑道﹕「點呀楊兄,唔捨得師姐? 」

「跟我入去搞掂啲魔法師啦,咁多嗲。」他白了我一眼後,閉上雙目吸收周圍的火元素,然後釋放出多塊烈焰盾包圍自己全身。

我吸收了火元素後,則結手印喚出烈焰鎧,然後跟隨楊兄進入烈焰沖天的森林。
已有 0 人追稿