[魔法/武俠]《窮撚被女飛 之 鳩闖魔法世界》: 第七十五章 - 你愛我我愛她她愛我和他......媽呀！感情事真係好煩呀！
回到客棧，第一時間就是將楊兄找出來。
「呀南你去咗邊呀? 小瑩好擔心你呀，你拉我上屋頂做乜? 」
「楊兄，我要你同我特訓，我一定要攞到五行術大賽冠軍！」
「嗯? 做咩突然咁有鬥志? 唔似你喎。」
我將我和紫月和張焌鴻的事說出來，他聽後平靜道﹕「呀南，你有無諗過我哋點解會嚟咗呢個世界呀? 」
「吓? 無...無呀......呢啲嘢邊有得解釋㗎......」
「我覺得，可能係神比機會我哋去搵返屬於自己嘅嘢。」
「神? 楊兄你信神? 」估唔到楊兄係耶撚。
「以前唔信，而家都唔信。」他頓了頓，道﹕「佢哋或者可以叫做神，但我唔需要信佢哋，信咗都無用。」
佢哋? 邊個佢哋?
楊兄續道﹕「我要搵嘅，就係Cherry。而你，可能係紫月，可能唔係，我唔知，但你最重要係知道自己想做啲咩，然後去做。」
「我知呀！我而家呢刻就係想打贏張焌鴻條PK，攞埋個冠軍然後娶紫月！」
楊兄瞄了我一眼，道﹕「反正我哋本來嘅目標就係攞冠軍，咁同你而家要做嘅都無抵觸，所以你要攞冠軍，我一定幫你。咁你仲諗唔諗住返香港? 」
「香港......其實我覺得已經無乜所謂。」我有紫月作為目標，所以能否回去已經不重要，若果能與紫月一起，留在這個世界又何妨。
「咁雖然粒玻璃球對你已經唔重要，但我都想你幫我攞到，因為粒波對我仲有用。」
「哦? 有咩用? 」
楊兄笑道﹕「集齊七粒可以call神龍出嚟許願囉！」
「玩嘢呀！」
楊兄正色道﹕「到真係搵齊我就嚟搵你啦，你到時可能會想返香港呢。」
講到咁長遠，攞到校長嗰粒再講啦。
「既然係咁，睇嚟我真係要混入去書院同你特訓，不過我唔諗住用老師身份。」
「咁你用咩身份? 」
「我自然有辦法，總之我入到去會聯絡你。」
楊兄走後，我繼續留在屋頂上運功療傷，當我完成了幾個小周天循環後，我聽到一些動靜。
我張開眼，眼角瞥見一個黑影。
「搵我咩事呀? Lucy。」
「喂你條撚樣唔駛理小瑩㗎? 」
小瑩? 頭先發脾四鬧咗佢，我都唔記得咗。
「呃......佢無咩嘛? 」
「屌！人哋有無嘢關你撚事咩? 唔提你你都唔記得，你而家先問有撚用咩！」
「咁你想我點呀大姐? 」
「真係唔好話我唔點醒你，紫月擺明就係貪慕虛榮死港女，小瑩就係賢良淑德好老婆，你咁都唔識揀? 」
紫月佢邊度港女? 係佢老豆老母貪慕虛榮咋嘛！唔好話你妒忌人哋身材好過你所以你抵毀人?
「係佢老豆老母貪張焌鴻有財有勢咋嘛，關紫月咩事? 」
「點都好啦，總之我一陣會將小瑩帶去花園，你自己同佢道歉啦。」牠說完就想離開。
我徒然想起一件事﹕「喂Lucy咪走住，問你一樣嘢。」
「乜撚? 」
「楊兄點解要龍師姐陪佢搵Cherry? 」
「我有問過大哥，佢話既然龍卓翎同Cherry姐姐一樣樣，咁佢同Cherry姐姐一定有關係，最簡單嘅就係佢哋係孖生姊妹，所以應該會喺佢身上搵到線索。」
原來係咁，唔通真係孖生姊妹咁簡單?
Lucy走後，我來到花園等候，一會兒後，我聽到小瑩的聲音。
「路飛...路飛你拉我出來幹甚麽? 你是肚子餓了還是口渴了? 」
「小瑩！」
「啊！是南大哥。」
Lucy功成身退已經逃得無影無蹤，花園只剩下我和小瑩兩人。
「南...南大哥...這麽晚還沒去睡嗎? 」
「小瑩，呃......係咁嘅...其實呢...我頭先唔係有心咁大聲鬧你嘅...所以......」
「啊！南大哥你別介意，剛才是我多管閒事了。」
「唔係唔係，唔關你事，係我心情唔好發你脾氣啫。」
「那...南大哥你跟紫月姑娘她......其實南大哥你不用擔心啊，你又溫柔體貼，又風趣幽默，如果是我一定會選你的......啊啊啊！我意思是紫月姑娘一定會選你的......」小瑩因為說甩了嘴而滿臉通紅，低下了頭不敢望我。
唉...人非草木，孰能無情? 我當然知道小瑩對我嘅心意，但我既然做得外貌協會會員，我當然要遵守會規......okok，你哋話我仆街又好，賤格又好，總之小瑩而家呢個樣我就真係哽唔落喇！佢係有可能變返靚，但係「可能」，即係表示「可能唔得」啦！咁我無理由為咗一個「可能」而放棄出面一大片森林嘛！而且你哋一個二個話要睇內在美，到咗自己要揀嗰陣咪又係揀樣靚身材正? 而家得我一個係咁咩?
所以為了讓小瑩對我死心，我唯有道﹕「小瑩，多謝你咁關心我。」
小瑩有點害羞﹕「南...南大哥你太客氣了......」
我抓住小瑩的雙肩，直視她雙眼﹕「唔係呢，我要好好多謝你，雖然我哋無血緣關係，但係你同呀牛係我嚟到呢個地方第一個關心我嘅人，所以呀牛永遠都係我好兄弟，而小瑩你永遠都係我好細妹！你以後有人蝦你嘅話，你同我呢個呀哥講就得喇，我一定唔會比人蝦我個妹！」
係係，我知我咁講係好hurt佢，但我又有乜計呢? 呢個已經係我諗到傷害性最低最低，用嚟拒絕佢嘅方法。除咗咁講，我真係諗唔到點樣拒絕佢之餘又可以維持返原有嘅關係。
小瑩愣了愣﹕「南...南大哥......你...你說我是你妹...妹妹......? 」
「係呀！你係我好妹妹呀！呀牛就係我好兄弟！」
小瑩眼紅紅，晶瑩的淚水漸漸填滿了眼眶，她的聲音有點哽咽﹕「好...妹...妹......」
我狠下心腸道﹕「小瑩你做咩喊呀? 係咩突然覺得有咗我呢個呀哥開心到喊呢！哈哈！」
小瑩伸手抹著眼淚，破涕為笑﹕「對...對啊......對不起大哥...我太高興了...我...我.......」
我輕撫她的頭﹕「傻瓜，咁開心又駛乜喊喎。好喇，抹乾啲眼淚就好去瞓喇，乖。」
「嗯...嗯......知道了大哥......」
望著小瑩一邊偷偷抽泣一邊慢慢回到房間裏，我心中難過得很，但我又有甚麽辦法呢?
翌日，我們一起到紫月家會合了紫月和張焌鴻就打算離開了。
伯母在叮囑著紫月的同時，世伯也在跟張焌鴻閒聊。
「焌鴻，那麽就有勞你照顧一下我家紫月了。」
「放心吧世伯，這是我應該做的。」
屌你呢兩條友真係當我死喎！
我衝上前跟世伯道﹕「世伯放心啦，紫月就交比我照顧啦！」
因為我聲若哄鐘，所以所有人的注意力都集中在我身上。
世伯顯然被我嚇到了，他愣了愣，然後強顏歡笑道﹕「哦，是浩南賢侄，這個......有焌鴻在，你就不用費心了。」
反正到了這個地步，我索性豁出去了，我續道﹕「世伯，其實就咁嘅，我呢，就同紫月兩情相悅，本來就想同你提親嘅，但係小子我自知自己無財無勢，實在係有啲配唔起紫月，所以我打算贏到今年個五行術大賽冠軍，用嚟作為求婚，唔知世伯你覺得點呢? 」
此言一出，眾人嘩然，紫月固然是滿臉紅暈，而世伯也料不到我有此一著，他瞧瞧張焌鴻，又瞧瞧紫月，再瞧瞧我，完全不知道如何接下去。
「這......這............」
張焌鴻微微一笑﹕「南兄果真有大志，不過別忘記了，今年的大賽冠軍，我是志在必得的。」
世伯聽到張焌鴻也會參加，馬上舒了一口氣，他笑道﹕「好！好！既然浩南賢侄你這麽有志氣，我就應允你了！若你能拿到今年的五行術大賽冠軍，我就將紫月許配給你！」
我拱手道﹕「多謝世伯成全！」
見家長之旅到此算是結束了，經此之後，我、紫月和張焌鴻之間存在著一種很微妙的關係。紫月跟我和張焌鴻都保持一定的距離，沒有太遠，也沒有太近，看來她想在我們決戰之前保持中立。而小瑩被我間接拒絕後顯得有點憔悴，但又強顏歡笑的跟我聊天，我當然知道她心裏想些甚麽，但卻不能做些甚麽，唯有以兄長的身份對她關懷一點。