《搵唔到Exit既23層大廈》－驚嚇！香港都市詭異紀錄: 第六十五話：《通往煉獄的窗－下》

 
「乜柒陰魂不散啊？」阿毛戚眉，「講就死老豆，唔講就死老母，講一半唔講一半死全家。」

「你叫我點揀姐……」我攤開雙手。

於是，Toby便把那場火災以及衍生的推論跟我以外的人娓娓道來，內容大致上跟我們昨晚討論的如出一轍。Ashley一直縮在一角，雙手掩著口，皺起眉頭。

我的思緒忽然衍生一個怪念，然而卻符合我對Ashley以往的觀感。





會否，Ashley就是該次火災中的罹難者，現在化成了亡魂，纏繞著我們？

想到這裏，凝視著眼前掩嘴的Ashley，我不禁打了數個寒顫。

這個推論，儘管表面粗疏，然而卻頗為能夠解釋這個女孩的表現。從一開始Ashley在窗外向我顯露人頭，此時已經跟鬼怪之談扯上關係。接下來，我曾經在後樓梯目睹Ashley血腥的臉孔，然後隨之又不見了，這個我不肯定是幻覺還是怎樣。而且，Ashley多次懷疑在電梯中謀殺我們，Kenneth在電梯中受傷，而我亦被捏頸子。儘管被捏頸一事被Mktor承認了責任，然而以上林林總總的怪異事情，亦能夠證明Ashley根本是如陰魂一般的存在。

我寒毛卓豎，甚至不敢繼續凝望這個詭祕的女孩。

「感謝讀者提供笑話。」阿毛裝著輕鬆的模樣，事實上從他猛抓頭髮的舉動已經顯出他的提心吊膽，「如果係鬼魂，我地點鳩算？搵捉鬼敢死隊？」





「我地根本完全唔識驅鬼既，就算……就算係真，我地都無從招架。」我無可奈克的乾笑著，凝視著Toby，她亦搖頭，表示自己亦不懂這些法術。

灰煙傳遍了整個客廳，Ashley在遠處喘息著，我們好奇的打量著她。

聽說，亡者化成鬼魂後最畏懼的是死亡的方式，例如跳海而死的人，最害怕的是水。難道，被煙霧所困，被火災所害的鬼魂，畏懼煙霧？

Ashley終忍受不了，打開了睡房的門，躲了進去，「呯」一聲使勁的合上了門。

「喵──」朗朗在鋪滿塵埃的飯桌上舔著左後腿，卻被Ashley關門嚇了一跳，竄入了桌底。





「佢……做乜鳩？」阿毛大惑不解的注視著我們，尋求回答。

「唔知，可能對煙霧敏感？」Toby的語氣輕描淡寫，「不過唔係重點，佢休息下應該Okay。回歸正傳，我就覺得如果係鬼魂論，我地就玩完──」

「小姐，唔係玩完，係玩撚猿，跟我讀一次，係玩撚猿。」阿毛開始肆無忌憚的胡言亂語。

警鐘聲不厭其煩的再度奏起。

「所以我地可以先從另一個可信性頗為高既理論落手，亦即係異界論。」Toby並沒有理會阿毛的猜測，繼續自圓其說，「如果阿騰講既果個夢……14樓……係真，咁或者呢個異界同埋現實世界可能存在一個多次元通道，例如係14樓電梯大堂既通風窗，咁跳出窗就唔會跌落街比火燒，而係透過一種……不知名方式，穿梭翻現實世界。」

「但係，點解可以幾秒就燒斷條繩……」我盯著被阿毛擱在地上的繩子。

「可能因為下面既火勢真係好大……」Toby鼓起臉蛋，「條繩被燒斷咗，個背囊跌咗火海之中。」

火海……





「世事都被你看透了，」阿毛咬起手指來，揭示著自己的緊張，「呢D全部都係猜測。」

問題油然而生，下一步我們應該採取什麼行動呢？尋找那看似並不存在的14樓？

火警鐘聲停止了喧嘩。

「會唔會，以前呢棟大廈係設有14樓呢一層，後來修改咗做其他樓層，例如15樓。」我靈機一動，Toby卻立時搖頭：「唔會啦，係呢個華人既社會起樓，又點會有個『4』字出現呢……」

「屌，我地出去15樓睇睇先啦，總好過係度鳩坐。」阿毛說罷步向大門口，這時候Ashley亦從房間中走出來，單手掩鼻。

我不欲望她多一眼，於是便跟隨著阿毛的步伐，走向那道木門。

「我地可以試埋另外兩個廁所既……唔同方向，可以有唔同結果……」Toby嘗試挽留臉色難看的阿毛。





「既然呢邊有火焰，另外三邊好難冇試wo。我地外面既世界可能根本就係一片火焰，我地只係火海之中倖存既一棟大廈。」儘管純屬盲目推測，阿毛提出的假設未必錯誤。

Toby口中呢喃著：「其實都係……若果我地身處異界，我地既世界外面係一片火海，都唔出奇。若果我地身處遊戲程式，遊戲管理員要設計一條程式，令到大廈呢個遊戲場所以外既一切都係火海，一D都唔出奇……願主保佑我地。」

老實說，儘管我並非基督徒，然而此刻卻有丁點兒祈求創世的神靈能夠對我們施以憐憫。

若果窗外是一個火焰肆虐的世界，那麼窗口根本就並非所謂的Possible Exit。

那是通往煉獄的窗。

「Toby……」

「嗯？」

「你覺得出面係咪已經末日……」





「……」

我盯著Toby心口的十字架，Toby的Tshirt已經濕透了大半，若非她穿著的是黑色的衣服……

「你係咪講緊……聖經裏面既末日論？」Toby拿起旁邊的毛巾，拭抹起身上的水，「啓示錄提及過，世界將會經歷一場火災……不過，實在好難係宗教角度分析呢件事情，神既旨意我無法領略……」

「但係……外面其實會唔會已經被火海所包圍……」我吞了一口口水，「外面既世界……已經崩壞咗……」

Toby默然不語，因為她也不懂如何啟齒。

若果外面的世界被火焰吞噬，那麼我的家……

「阿騰你住係邊？」Toby驀然一問，凝視著我。





「吓……我住沙田……沙田第一城……」

「嗯。」

我倆靜默了半餉，Toby又道：「可能出面既世界，已經被毀滅，而我地……」

「係倖存者？」

「我都唔知點解我地會係生存落嚟既人，」Toby鼓起臉蛋，「不過，或者真係咁。」

我一怔，儘管早已有這個心理準備，又Toby的口中說出，還是難以自禁心中驚愕。

外面的世界，可能已經崩壞了，一切的制度、建設、人與物，無一倖存。

為何會這樣？

「阿騰你掛唔掛住阿爸阿媽？」

「嗯？」

本來沈淪於對自己前路的茫茫，被Toby驀然一問，臉色一沉。

對，我的父親母親，到了哪裏？

他們……他們……還生存嗎？

我勉強的點頭，一臉恍然：「咁……Toby你呢？」

Toby不語，只是對我一笑，別過臉，凝視著窗外的謎團。

「哇屌。」

外面換來了阿毛的驚呼聲。

待我跨過紅色的地氈，離開了單位之時，立即注視著阿毛及Ashley兩人的舉動。

他倆身處8樓電梯大堂，兩人呆若木雞的待在電梯口，凝視著電梯發出的光芒。

我倒抽著涼氣。

對，夢魘再次降臨了。

然而，電梯已經向我們張開了好幾次，事實上，兩人應該沒有什麼好感到驚奇的。

「做咩？」我湊近他們，開始發覺事情有點兒不對路的地方。

他倆沒有回答，依舊愕然的凝視著電梯內的情況。

我徐徐接近他們，直到瞄到了電梯內的異樣，隨即愕住了。

電梯門上依舊有斷頭人遺下的噁心皮膚纖維以及乾固的血液，然而，天花板依舊寫著「Go Downstairs」的血腥字跡，然而那些也不是重點。

阿毛凝視著面前的電梯牆壁，目光恍然若失：「究竟……發生咩事？」