第一百二十七話(下):《1107

 
      「首先,本公司之前做既Störungen臨床試驗,不過係少量參與者,實驗結果唔Generalizable。呢個非常Risky,無法確保Störungen實戰效果。本公司必須進行一次具廣泛性測試,方可確保毒氣對大部份人具感染性及殺傷力。正因Störungen針對城市,本公司希望係真實城市舉行一次活人測試,目標為測試城市環境下既人被迫接觸毒氣之下,殺傷力及感染速度如何,行為如何,以及有冇尚未發現既種類既人對Störungen有全面或局部抗體。」

      「想請問實驗選址打算係?」Raymond內心充斥無數質疑。

      「香港九龍市區既一棟單棟住宅大廈──」

      「Sorry! Are you fucking madness?」Raymond激動的站起,脫下黑超,椅子往後推了半米,「啪」一聲撞到褪色的牆邊。Raymond耗費數秒才逐漸鎮靜,大口大口的喘息。





      「我瞭解閣下想法,我起初聽王生提出時都覺得不甚合理,不過你聽埋我講先,Please。」Q一臉懇切的請求,瞇起眼。

      「你繼續……」Raymond喘著氣,把黑超擱在椅子上。

      「我相信閣下最大既Concern分別係可行性太低,同埋選址唔應該係一個保安嚴密既國際城市。」

      「Exactly,You get the point。」Raymond重新坐下,竭力調整思緒。

      「本公司瞭解貴府假想敵為先進國家,擁有不少人口300萬以上之大城市,城市大廈密集、人口密度高。香港正屬貴府假想敵典型城市既同一種類密集城市,而且人口血型百分比分佈與假想敵國民人口血型百分比分佈不謀而合,若果係香港進行呢場實驗,再從中汲取經驗,必然大幅增加貴府使用Störungen既實戰效果。」





      Raymond不聲不吭,事實的確如Q所述。

      「可行性方面,本公司經過長期反覆商討、研究,認為係一棟大廈進行活人測試絕對可行。首先,成個實驗打算進行72小時──」

      「細節不必,make it brief。」

      「實驗開始將安排係凌晨。係實驗前一段時間,大概兩個月前,機構會係選中既大廈四周安裝會噴出濃霧既裝置,係實驗開始時,裝置釋放既濃霧會隔絕大廈窗戶及外面視線。同時,裝置運作期間發出既噪音會隔絕大廈外既雜音,實驗人員都會透過各種方式,令住客想辦法接觸Störungen。」

      「等等先,你肯定濃霧足以阻隔視線?」





      「M7492型白色煙霧燃燒機,小妹知悉貴府軍隊最近兩年有廣泛使用,去年更加增添咗三十部作軍事演習用途。」

      「Okay……Continue。」Raymond驚訝Q做足資料搜集。

      「該棟被選中既大廈……以下我簡稱『大廈』。大廈有一部電梯、一條連接天台及各層既後樓梯同埋垃圾處理管道後門,全棟單棟樓唔計算底層23層。公司將安排於凌晨時分,係大廈對面馬路部署好既實驗人員,帶同Störungen氣桶闖入大廈,封鎖大堂、後門及連接天台及後樓梯既門,令住客無路可逃。」

      「如果住客跳窗呢?」

      「跳窗逃生係冇可能。因為大廈已經安置咗煙霧燃燒機,就算佢地跳窗,都會墮入燃燒機範圍,熱力下化成燒焦屍體。就算佢地有辦法跳到好遠,脫離煙霧燃燒機既範圍,佢地都會墮樓喪生。低層不需多講,係冇可能,因為就算掠過燃燒機都會因高溫燒死。」

      「實驗如何進行?」Raymond拭抹著額頭的冷汗。

      「係後樓梯底層放置Störungen濃縮氣桶,將毒氣曠散至整個後樓梯,效果可維持超過72小時,即使實驗後期氣體濃度驟減,都足以造成感染。實驗人員會透過各種方法吸引被封鎖係大廈既住客到後樓梯,包括停電、停水、用干擾器癱瘓大廈連接網絡及大氣電波,迫使住客與世隔絕,落樓接觸Störungen。」





      「居民可以搭電梯──」

      「唔可以。電梯控制位於大堂管理處,封鎖大堂既實驗人員將停止電梯正常運作,用作計算生還人數,實驗人員會係電梯閉路電視隔離安置一個體溫檢測器,加上閉路電視,電梯去到每一層打開,都可以點算該層接近電梯既生還人數,順便觀察感染者行為。實驗人員會透過響警鐘,吸引住客注意電梯。」

      「若果住客入咗電梯唔肯離開呢?或者……破壞閉路電視?」

      「正常住客行為係唔會有能力破壞電梯運作,只要閉路電視同埋體溫檢測器可以照常運作就冇問題。如果住客真係嘗試破壞閉路電視或體溫監測器,實驗人員會控制電梯將少數反抗分子送往大堂,即時處決。」

      「嗯……但係就算係咁,D住客唔接近電梯,躲藏係單位,都係無法點算準確人數,Right?」

      「Right,所以人數點算不過為約略估算。實驗焦點在於觀察感染者係真實城市環境既不正常舉止同埋觀察有冇人對Störungen有自然抗體。本公司會搜集所有被困大廈者既血型、身體狀況等資料,實驗人員會一路追蹤佢地。」

      「如何做到?」

      「大廈總共69戶,公司人員會偽裝成鐘錶零售商,以低價售賣名牌手錶比大廈住客,手錶係實驗人員精心研發,外表及表面功能同埋名牌手錶一模一樣。手錶可顯示身體機能、位置等資料,資訊會即時傳送到外面既秘密實驗中心,當然前提係佩戴者係實驗期間有佩戴特製手錶。」





      「如何迫佢地戴……」

      「唔需要迫,只要有一半住客上釣,我地已經有充足實驗Sample。」

      「咁個實驗完結時,你地點?」

      「實驗人員會係電梯安置一個破壞力極強既炸彈,係實驗啟動72小時後引爆,因為感染者血液非常易燃,因此將引發大型火災,將大廈內一切證據毀屍滅跡。」

      「咁實驗人員呢……點逃走?」

      Q的嘴角驀然揚起:「好遺憾。」

      「貴公司……打算殺人滅口?」Raymond吞下一口口水,臉色略顯蒼白。





      「本公司有辦法搵到既人員全部都係犯咗嚴重刑罰既窮人,例如死刑、終身監禁等等,我地會透過私下手段將佢地引渡。若果佢地願意犧牲,接受訓練進行實驗,我地會為佢地既家屬提供終身生活資助,數額頗為豐厚。」

      「香港……香港係法治社會……邊度可以帶到呢D犯人出嚟。」

      「冇人話過係香港搵犯人,」Q微笑,「世界好大。」

      「你所講既計劃太瘋狂……雖然我提出既質疑你都一一解答……」Raymond忖度著,「不過有一點,我完全無法接受。」

      「願聞其詳。」Q刻意的抬高雙腳,令得Raymond睜大雙眼,美人計似乎得逞。

      「本人不追究波及無辜市民既道德問題……成個計劃,係香港市區,封鎖一棟大廈進行活人實驗……封鎖大堂可行,因為大堂管理員根本無力反抗……不過,你話實驗維持72小時?」

      「冇錯。」

      「冇可能!香港治安屬亞洲頂級,若果發生咁嚴重既封鎖大廈事件,仲要係旺角發生,特種部隊不消半小時必定趕到,迅速攻陷大廈!實驗一定行唔通!」





      「因此,實驗需要貴府鼎力相助。」

      Raymond一聲不吭,靜待Q把話說下去。

      「希望貴府可以協調一下東非組織未來神信徒,公開承認是次封鎖大廈事件為組織策動既恐怖襲擊。」

      「未來神信徒……未來神信徒係全世界各國嗤之以鼻既恐怖組織,本政府係唔會狼狽為奸。貴公司如果要同恐怖份子合作,大可以私下聯絡佢地談判──」

      「表現上當然係咁。」Q輕輕一笑,「不過心水清者都知道,小妹此際正正同未來神信徒代表商談緊。」

      「你……」Raymond目瞪口呆,Q口中的卻是鐵一般的骯髒事實。

      「操控恐怖組織,以煙幕換取第三世界石油資源、經濟利益,早已司空見慣,只係廣大市民永遠唔會知道姐,小妹絕對理解貴府需要。」

      Raymond臉色一沉,儘管事實理應早被不少外國政府最高層知悉,作為富可敵國的藥劑廠代表,瞭解此污穢真相並不值得稱奇。全球財力最豐厚的恐怖組織未來神信徒,實質只是己國背後創建及操控的棋子,透過植根東非,襲擊西方國家煽動國民反第三世界仇恨,繼續支持政府揮兵中亞及東非。一切,其實不過是自編自導的煙幕而已……

      「本公司計劃將封鎖大廈事件對外包裝為震驚全球既恐襲。最近,反西方組織未來神信徒,有兩名骨幹成員比中美聯合反恐行動擊殺,令未來神信徒同中國關係極度惡劣。未來神信徒一向心狠手辣,以血腥襲擊報復敵國,例如柏林爆炸案、三藩市機場爆炸案。因此,呢個時候襲擊香港鬧市,製造恐慌報復中國符合組織作風。成件事情,只需包裝為未來神信徒挾持大廈,封鎖一切出入口,以炸彈威脅政府,並宣稱係大廈散播阿杜木卡。」

      「阿杜木卡……」Raymond不禁一愣,「最近係東非殺死數萬人既撒旦病毒?」

      「冇錯,不過『撒旦病毒』只不過係俗稱。阿杜木卡病毒可怕殺傷力及傳染性極高,而未來神信徒過往一直宣稱成功研製阿杜木卡病毒既生化霧氣,呢個完全fit曬是次實驗環境。近月阿杜木卡導致全球海嘯般既恐慌,各國恐懼病毒會傳播到己國境內,87個國家對病毒肆虐既蘇丹、埃塞俄比亞及肯亞發出黑色旅遊警示、禁止東非航班前往。若果未來神信徒宣稱,只需聲稱燃燒機製造、用作阻隔視線既煙霧含阿杜木卡病毒,必然引致全城恐慌氾濫。」

      「阿杜木卡病毒極可能肆虐全城,癱瘓社經運作,造成股市暴瀉,樓價狂跌……」Raymond恍然大悟,無法想像Q會提出如斯誇張的計劃。

      「正正捉緊呢一點,若果未來神信徒宣稱係大廈散播阿杜木卡病毒,全城必然有洶湧既壓力,迫使政府撤離並且封鎖附近既旺角區域,防止阿杜木卡病係市區散播。係封鎖隔離、無人衝擊情況下,呢個實驗絕對可以維持72小時,然後由實驗人員親手引爆炸彈結束一切。」

      Raymond一聲不響,半分鐘後才吐出一句話:「This is madness。」

      或許就是因為藥劑公司知悉己國政府背後操縱未來神信徒,才願意促成這實驗計劃……若果沒有恐襲煙幕,實驗根本無法於都市進行。

      「另外,本公司希望貴府同香港警隊某位高官溝通一下,提醒警方唔好刻意衝擊呢棟大廈,隔離奶路臣街,實驗後都唔好搜集到任何關於實驗既證據公諸於世,咁就得。」

      「香港警隊某位高官?」

      「閣下絕對清楚小妹指邊位。本公司搜查過,某香港警隊負責官員係貴府係有一筆涉及千萬元美金既洗黑錢記錄,貴府一直知道但選擇隱瞞,如果執行法律,相信佢都要坐好耐監……」

      「完全明白。」

      「是次實驗,本公司願意包辦費用、人手,貴府只需聯絡未來神信徒公開承認恐襲責任就足夠,呢個就係交易條件。」

      「恐怖組織挾持大廈……有咩要脅條件?我意思係,表面上?」

      「釋放最近比中國政府監禁既兩位組織精神領袖──」

      「自編自導自演既一場戲……貴公司付出不菲,敢問真係值得?」Raymond不禁苦笑。

      「其實香港除咗係極度適合辦Störungen實況實驗既環境,王生仲有另外一個私人原因。」

      「嗯。」Raymond點頭,這屬意料之內。

      「王生年事已高,佢根本唔care金錢,只係希望完成一個心願。」

      「一個心願?就係進行活人實驗?」Raymond一臉茫然。

      「令一個人絕望既復仇。」

      「一個人……果個人住係呢棟大廈?」

      「冇錯,王生對佢恨之入骨。王生年輕時從事藥物買賣,生活艱難。當時,有一個黑社會首領既母親因為私人恩怨誣告王生從事販毒生意,背後偽造大量證據,弄虛作假,王生幾經艱苦先避過刑事責任。後來,果個十惡不赦既黑社會首領屢次派蒙面大漢騷擾王生家人,甚至……」Q低下頭,甚是難過。

      「係?」Raymond皺起眉。

      「二十九年前,有一班不知名蒙面人綁架王生妻子,當時王生正同妻子係街上,王生追唔上蒙面人,最終王太……」Q還沒有說下去,Raymond已經做出了「明白」的手勢。

      那單轟動的姦殺案,儘管事發數十年前,卻駭人聽聞,烙印於Raymond的心中。1987年,巴黎市中心,一名三十二歲亞洲籍女子被蒙面人士於小巷拐走,警方一星期後才於尼斯舊城區搜索到蛛絲馬跡,經過一番追查,於一棟空置已久的3層倉庫的頂層找到手腳被綁上的女子屍體,當時倉庫內空無一人。警方表示,女子口部被封,滿身瘀傷,下體受到嚴重創傷,地上沾滿血液,相信一星期以內不斷遭性侵,而且從女子骨瘦如柴身材顯示可能一星期內根本沒有進食,最終體力不繼,而且倉庫門口被鋼鎖鎖上,並無倉庫,懷疑饑餓及氧氣不足死亡。警方發現倉庫鐵門、牆壁有大量血手印,有合理理由相信受害人於兇徒離開現場後曾一度嘗試逃走,經長期掙扎卻發現無能為力,因倉庫位置隱蔽,外界絕對不會察覺有人受困。由於犯案證據太少,警方最後也無法追查兇徒下落,案件最終無疾而終……

      Raymond揪心起來:「因此,呢個實驗……到頭來……」

      「殺一個人易如反掌,不過就咁殺死佢未免太便宜佢。王生痛失妻子以來,相信背後策劃者為該人,苦苦追查卻搵唔到證據,因此一直渴望一個機會,製造一個密閉環境比呢個殺人狂魔,體會一下被封鎖、無法逃出既絕望痛苦。」

      「到底要幾憎恨一個人,先甘願耗費一切令佢受苦?」

      「一切?」Q抬頭,「對於王生嚟講,金銀如浮雲。復仇既快感,就係一切,而且呢個人罪有應得。」

      「嗯……」

      兩人又談論了關於各項交易的細節。最後,Raymond站了起身:「好多謝Q小姐──」

      「Q。」

      「多謝Q清晰表達咗貴公司意願。容許我總括一次,貴公司願意提供Störungen毒氣供應、實驗、製作方法,而希望本政府聯絡協調實驗。」

      「協調實驗……呢個term我鍾意。」Q調皮一笑,「其實本公司開出既條件非常合理,若果實驗不幸出現失誤,本公司一律按照國際不成文規定負責。剛才提及既活人實驗計劃書,小妹已經吩咐咗工作人員遞交比貴府相關部門。」

      「本人會再同上頭交代翻,係一個星期內會給予回覆。」

      「Raymond,若果得閒既,上機前隨時可以搵我。」Q把一張卡片遞給Raymond,意有所指一笑,Raymond興奮不已的盯著她迷人的臉頰,因為卡片上寫了某酒店的房號。

      待Q準備步出單位之際,Raymond卻忍不住叫停了她:「唔好意思……」

      Q回眸,皺起眉頭。

      「本人實在好奇,親愛既王生會對邊位如此深仇大恨。」

      「卑賤小人,不值一提,不過講咗都無傷大雅。」Q繼續步出單位,「姓王名大鷹。」