《搵唔到Exit既23層大廈》－驚嚇！香港都市詭異紀錄: 第一百三十話（下）：《扯線木偶與扯線人》

      陳允強，34歲，夜班消防員。

      8月12日，21:11。

      「油麻地消防局！」

      「咩事？」





      陳允強把重型消防車在油麻地街道上疾駛著，拐了個彎來到了寶寧大廈對開的彌敦道。這時，對講機傳來消防局肥黃那厭煩的聲調。

      「總部叫你撤回！立即！違抗命令會被革職！」

      「撤回？」陳允強輕笑，充滿氣魄的道，「我去意已決，就算你革我職都義無反顧。」

      旁邊的消防員同事幫他在句尾補上一句頗具侮辱性的髒話。

      「老陳，聽我講，就算比你去到奶路臣街，警方都唔會批你入去。」





      「我要知道原因，」陳允強繼續駕車在彌敦道飛馳著，車頂發出消防車警報聲，「奶路臣街懷疑出現火頭啊，點解唔去救火？果班恐怖份子係度欺壓我地香港人，唔通袖手旁觀？點解消防署上頭會禁止救火？人命嚟架！」

      「老陳，我只係奉命行事，你想呈英雄都唔係呢個時候。」

      「點解。」消防車掠過富運商業中心，理應人來人往的行人路上渺無人煙，平時座無虛席的N記剩下一個櫃位在運作。

      「因為恐怖份子向外公佈，若果有任何武裝部隊、閑雜人等、車輛、直升機接近奶路臣街，佢地會即時引爆炸彈。」

      「哇屌，咁未我地都死埋？」旁邊的林叔畏首畏尾，「班恐怖份子好搞唔搞搞香港，都唔知得撚罪咗佢地D乜。」





      肥陳的話讓充滿正義感的陳允強墮入矛盾思量中。的確，救人要緊，而且從電視直播也發現，整棟全華大廈附近濃煙密佈，很可能出現了嚴重火災，若不及時滅火，必然造成上百人罹難的災厄。

      然而，若果接近奶路臣街刺激到恐怖份子引爆炸藥──他們宣稱大廈裏已經安置了殉國者炸藥，在之前的柏林恐襲中，陳允強經已見識過那微型炸藥的可怕摧毀力，若果於奶路臣街引爆，相信會導致數條街的石屎森林成為火海，連朗豪坊也可能殃及。

      消防車已經駛到雅蘭中心前，雅蘭中心近乎沒有半個人影。旺角，平均每平方公里13萬人，此際卻化作死城。

      陳允強魂不守舍的，把車向左拐駛入山東街。

      恐怖份子竟可研發出那麼駭人的炸藥……這次旺角恐怖襲擊的最壞結果，絕不輕於美國911襲擊。

      「而且，恐怖份子宣稱係大廈周邊散播咗阿杜木卡病毒，為此警方已經封鎖咗附近既旺角街道。警方係冇可能容許你入去。」

      陳允強無言以對，因為他也清楚港人對於阿杜木卡病毒的畏懼。





      那於東非肆虐的病毒，是殺傷力遠超沙士的可怕新型病毒，而且傳染性極高，而且傳染源未知，若不封鎖隔離散播了病毒的全華大廈，一個不小心便會將這世紀病毒曠散開去，保守估計也將造成至少數萬人死亡。

      警方封鎖隔離大廈附近範圍，也不失為顧全大局之舉。

      「掉頭喇，阿陳，肥黃奉命行事姐……」林叔開始臨陣退縮，「反正去到奶路臣街，警方都唔會比消防車入去，我地都冇政府批准。」

      陳允強繼續倔強的駕駛著，消防車掠過整棟關閉、死氣沉沉的朗豪坊商場。

      山東街道路上沒有其他車輛，因為前面的路段被堵塞了。陳允強目睹遠方道路架起的三重鐵馬，一班忙碌消毒的人員，還有……一輛正駛來的警察電單車。

      前方，就是警方封鎖區。

      「停低！」警察電單車駛到了陳允強車門旁，那是一個戴著防毒面具的男性警員，敲打著玻璃窗。陳允強沒好氣的開啓玻璃窗，斜視著警員。

      「消防局唔係得到通知嚴禁接近封鎖區喇咩？」





      陳允強答不出來，抬頭凝視著前方灰濛濛之中散漫天際的霧。

      那想必是全華大廈傳來的煙霧，然而怎麼會是灰白色的……而且已經波及好幾條街的天空……難道那就是阿杜木卡毒氣？

      灰白的霧散滿天空，如雲朵。

      或許這是陳允強看過畢生最離譜的畫面之一──山東道旺角路段除了停泊了的十數輛警方車輛及救援車輛外，竟然一輛正常車輛也沒有。

      「你地唔入得嚟，請回頭。」警察交低了數句威嚴的說話，便回到了封鎖的鐵馬之後，繼續指揮著街道消毒的工作。

      香港人的沙士陰影回來了……

      陳允強在正面車窗眺望遠方……海富苑及柏景灣在盡頭……整條街道，也被重重封鎖。事實上，整個警方封鎖區非常廣大，牽涉數條主要幹道，然而最可怕是近乎一點聲音也沒有，如死城。





      現在，儼如戰爭狀況。

      陳允強駕駛著的消防車發出了警報聲，成為街道唯一的韻律，響徹虛幻的旺角。

      「你地班恐怖份子，一定會得到懲罰。」富正義感的陳允強終於認命，把那消防車在廣闊的山東道掉頭，向著油麻地消防署折返。

      有些扯線木偶，只顧追逐牆壁的影子，忽略了影子的主人。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

      杜家敏，13歲，中一女學生，就讀元朗地區名校。

      今天，她如常不捨的從那吃人的蒼白自修室返回家中，準備飯後開展新一輪搏鬥。

      「媽媽，我翻嚟喇。」小敏把裝滿石頭的背包擱下，聽說背包越重，成就越高，未來越光明。





      「煮好飯喇，拿拿臨食，睇半個鐘新聞就好溫書喇。」

      「溫咩書？」

      「溫三個禮拜後既數學Quiz，Side Angle Side果課啊。」

      「下，三個禮拜後先Quiz Side Angle Side wo……」

      「敏敏，呢個社會就係一個弱肉強食既鬥獸場，若果唔努力提升自己既話就會──」

      「比社會淘汰，一世抬唔起頭啊嘛。」小敏苦笑著，「我意思係，兩個禮拜後有份Assignment要交，好似要做咗果個先。」

      「咁啊，你睇十五分鐘新聞好喇。」

      母親回到了廚房，收拾著碗碟。

      「媽媽，點解出面發生恐襲，你好似唔理咁既。」

      「咩唔理？我好膽心架，我有份係Facebook比Like要求政府繼續封鎖現場架，如果病毒曠散出香港各區咁點算，我地住邊？同埋啊，爸爸翻工搭開架紅Van，因為西九龍走廊封咗，今朝行條改道好塞車啊，搞到遲咗5分鐘啊，真係麻鬼煩！」

      「嗯，我意思係……D人質可能會死架wo……」

      「人總有一死，日日都有人死，唔好係我地死就得喇。」母親從廚房走出來，輕吻小敏的臉蛋一口，「旺角既人死姐，我地元朗架嘛。」

      「唔係啊──」

      「咩唔係姐，唔通個個死我都要關心默哀啊？宜家開善堂啊？」

      「我意思係……件事好似好嚴重……好似好關鍵……」

      母親睜大眼一愣，接著靈機一觸，「啊！都係小敏聰明！媽媽應該錄低個直播畫面先，可能常識科會考……唔係，係一定會考！乖女！要準備定喇！今晚比你睇足半個鐘新聞喇。」

      「嗯，多謝媽媽。」小敏樂不可支，設想著自己考進醫學院後的燦爛人生。

      有些扯線木偶，以為自己是扯線者。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

      張思欣，23歲，新入職電視台採訪記者。

      「我宜家就係警方封鎖區既現場喇，睇到呢度山東街泊曬警車，警方封鎖區一片寧靜，警方暫時並未採取任何行動，情況維持僵持狀態。宜家交翻比新聞部。」

      「Cut。」拍攝記者Michael把沉重的攝影器材擱下，拭抹額頭的汗水，「我地休息幾分鐘先。」

      張思欣與Michael坐在封鎖區鐵馬外允許記者直播採訪及逗留的山東街行人路邊緣，封鎖區外甚至連記者車輛也不可以駛進。

      「成條街冇曬人，好少見。」思欣作為電視台的新聞部花，隨便的數句話已足以迷倒任何的未婚男性。

      或許，已婚男性也一樣。

      「放心，有我係度。」血氣方剛的Michael向思欣遞來了一支冰涼的Cold水。

      她輕輕接過，扭開樽蓋大口喝著：「裏面D人質好無辜。」

      「其實我地呢D局外人，到宜家都唔知道未來神信徒恐怖份子點對待大廈人質。」

      「冇錯，到宜家組織都冇發佈任何人質既相片或者影片，其實佢地可能已經被殺，只不過係群眾恐慌殉國者炸藥同埋阿杜木卡病毒，先群情洶湧要求政府封鎖隔離呢個區域姐。」思欣低下頭皺起眉頭，狀甚疑惑。

      「你會唔會質疑？」Michael盯著一臉熱誠的美女，心裏泛起一陣悸動。

      「當然會喇，於我而言，呢單唔似係一單恐襲咁單純。」

      「你係極少數會懷疑恐襲性質既新聞從業員。除咗你之外，好多資深傳媒人都上電視、今朝既都市論壇話呢次係一個天價既威脅，因為未來神信徒發佈咗公開消息話，若果過咗72小時都唔釋放係中國被捕既兩位組織精神領袖，就會引爆全華大廈既殉國者炸藥……」

      「我係唔明，點解要係香港搞。」

      「報復之前中國反恐行動──」

      「如果向中國報復，點解會選擇香港呢？選擇一個警力咁強既地方？仲要係鬧市？」思欣睜大眼睛，語氣堅定。

      「咁你問恐怖分子喇。」Michael攤開雙手苦笑。

      「Michael啊，你唔好咁求其啦，你唔質疑事件內幕咩？」思欣皺起眉頭。

      Michael低下頭，瞄著Cold水包裝上的廣告：「喂，有夏日大抽獎優惠wo──」

      「Michael。」思欣一臉不忿的注視著男人。

      Michelle凝視著女生的花容，嘆息一聲，骯髒的汗手輕輕揉著眼眸：「就算唔係恐怖襲擊又點？」

      「既然你覺得唔係恐襲，點解唔去探尋真相？真相唔重要咩？」思欣欲步步進逼。

      「真相重要，不過真相唔係發掘既，係編造既。」Michael苦笑著。

      女子愕然：「咁仲邊係真相啊……」

      「小欣啊，媒體都係照樣報導架姐，我地話真相係恐襲未恐襲，D大眾都係會信架姐。就算有人懷疑，任何事件都有呢D獨特見解者，大眾只會視都市都市傳說自娛下，唔會當真。」

      「就係因為咁，我地作為第四權，我有道德責任追尋呢件事情背後既原因，給予最準確既資訊市民啊。」

      Michael盯著眼前神緒純碎的漂亮臉孔，那種入世未深的赤子之心，堅定的雙眸，那麼的熟悉……

      Michael不聲不吭，數秒後才開口：「直覺話我知，你會置身險境。」

      「點解？」

      「即使唔係恐怖襲擊，背後有其他原因，一定有D勢力唔想你去發掘，而果個勢力必定輕易玩謝你。何況，上司都唔會比你報導度加上懷疑真相既內容。」攝影師神色凝重，「小欣，係社會生存，要學會妥協架。」

      「Michael，你要知道，做得新聞從業員必須持有抱負，唔可以因為受到壓力就放棄向大眾揭露真相。」美女主播露出純碎的微笑。

      Michael無言以對，只管含笑。美女口中的硬道理，根本沒有駁斥的餘地，那笑容更勾起男人入行的初心……

      只可惜，社會從來不談什麼道理不道理的。

      思欣才加入電視台半年，已經深得電視台的寵幸，新聞部更破例容許她穿短褲報導新聞，相信跟她的美貌與富觀眾緣有關。若非因為她天生麗質、聲線甜美，之前好幾次在Facebook的出位言論已足以讓她被革職十次了。

      或許，她還入世未深，不諳什麼謂生存之道，什麼謂被迫折服。

      她很快便會體會到的了，Michael無奈的苦笑。

      有些扯線木偶終於奮起反抗，終究落得四肢殘廢、遍體鱗傷的滿目瘡痍。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

      「事情進行得頗為順利，琴日凌晨先封鎖大廈，今日外面媒體、各國政府都一面倒出嚟譴責未來神信徒，今日既香港報紙頭版，全部都係關於恐襲。」Q笑著，坐在柔軟的沙發上，手中托著手提電腦。

      男人翻閱著今天的各份報紙：「港會時報……恐襲旺角，全球恐慌……星報……東非邪教，挾持全華……香島日報……恐怖黑夜，癱瘓旺角……哈哈。」

      「而主流香港市民似乎都相信真係恐怖襲擊，而且沉倫係阿杜木卡病毒既恐慌之中。旺角以往既繁忙街道，就算係彌敦道，都冇咩路人。」

      「根本就冇咩阿杜木卡病毒，不過Q you see？Truth is created，not discovered。」

      Q含笑，坐到男人旁沙發的位置。

      「似乎，隻可憐鷹係實驗裏面玩得幾開心，到宜家都出唔到嚟。」男人吸著瘀，呼出的污氣訴說著年輪。

      Q頭靠著男人的肩膀：「咁你預設佢地出唔到嚟嘛，安排輕功高手鄭思凌負責管理遊戲，又有邊個可以離開呢。」

      「凌，哼哼。」男人咳嗽著，「另一隻可憐既扯線木偶。」

      「之前我地比咗咁多MPHT藥丸比佢服用，身體機能一定出現嚴重變異，只要受傷，接觸埋Störungen化學氣體，佢既身體技能，不論係速度、耐力、靈活度、忍痛能力都會有大幅度既提升，到時候佢就好似撒旦一樣，無人能及。叫佢係入面負責守住大廈所有出口同埋折磨隻狗，實在係好好既Idea。」Q竄進男人的懷裏。

      「呢個做法其實好危險，我地都未試過真係Mix埋MPHT化學物質同埋Störungen化學氣體對身體既效果，只係預測過會大幅提升體魄，到底幅度多少仲未清楚。」

      「不過，有一樣野經過實驗肯定咗，感染Störungen病毒後服用舒緩藥，係可以保持基本理性，只不過係生理機能出現怪異轉變，有D副作用例如係頭部會抽搐同埋皮膚會冇曬痛楚感覺等等。」

      「2006年中國輕功武術大賽冠軍，竟然淪落到要係旺角街頭做拾荒者。好彩我派人接觸佢，佢同王大鷹有深仇大恨，咁岩又有特殊血病，適合服用MPHT藥丸。」

      「我地吩咐咗佢負責監察任何懷疑對Störungen有抗體既實驗品，一有任何更新資料就透過對講機同場外實驗人員報告，禁止任何人離開大廈同埋好好照顧隻鷹。」

      「頭兩個係廢話。實驗結果依靠實驗人員就可以收集大量資料，而且，以計劃既封鎖措施，根本足以杜絕任何實驗品逃離。同佢吩咐咁多野，不過係等佢以為佢係我地實驗佔重要地位，其實佢於我既利用價值不過係同王大鷹玩得開心D，哼哼。隻廢鷹係大廈同埋隻怪物困獸鬥，想必好刺激。叫佢向我地匯報最新實驗資料，不過係引誘佢戴上果個耳邊既微型對講機，個對講機其實係炸彈嚟，只要佢嘗試除咗個耳機，或者背叛實驗人員，炸彈就會將佢炸成碎片。扯線木偶，永遠都係扯線木偶。」

      「呢個我係實驗部聽講過。」Q含笑。

      「不過好可惜，我地聘請既世界級殺手入咗去遊戲。」男人輕輕一笑，似乎不甚介懷。

      「佢係實驗岩岩開始既時候，係實驗大廈旁邊既狙擊位置毫無徵兆咁跳咗入實驗大廈既窗口入面，呢個我真係預設唔到……係我信錯殺手……」

      「唔好為呢D雞毛蒜皮既事情自責，聘請殺手不過係為咗確保冇大廈外既人會阻止實驗人員闖入大堂，闖入過程既然順利，殺手背叛不成擔憂。」男人冷笑。

      「不過，小妹真係唔明白，點解佢會無故跳入去大廈。我係聘請殺手前，好清楚聘請殺手殺人既風險，所以只可以聘請一個高級殺手，而且係百發百中既專業精英，最後就搵到佢。享譽國際，暗殺過十個以上既中亞國家政要，擊殺率98%。」Q把桃木桌上的紅酒杯遞給男人。

      「點解唔係百分百？」男人接過酒杯戚眉。

      「佢聲稱有一次自己施以憐憫。」Q靦腆一笑，「我係聘請佢之前，我接觸過好幾個日本、馬來西亞、內蒙古既殿堂級殺手，佢地都坐地起價，而呢個人係話唔收我地一分一毫，只係要我地以後保護一個人。」

      「咩人？」

      「佢唔肯透露，話成事後會通知我地，可能害怕交易失敗會連累人。不過我翻查過佢既資料，都唔知道佢有同大廈有人任何聯繫，所以大惑不解。佢仲不斷質問，到底我地聘請佢背後既計劃係點樣，實驗人員唯有透露少部分可透露既片面資料，例如實驗時間長度、將會封鎖某區域、封鎖大堂等等，佢好想知事發地點，不過我地係實驗當晚先話比佢知，以防佢涉密。」

      「哼哼，」男人撻著手指，「唔需要理會，既然唔影響結果。」

      「不過佢係實驗最後數小時，用手榴彈摧毀咗電梯，閉路電視用唔到，電梯到達底層既時候，實驗人員只係見到一具屍體。」

      「唔緊要，實驗採集既資料已經好足夠，更何況，實驗Final Aim根本唔旨在收集數據，最終目的不過要玩謝隻鷹。」

      「唔好介意，小妹其實好奇，搞咁多野，正係為咗向一個微不足道既人復仇──」

      男人仰天苦笑：「呢個世界，係由仇恨拼湊。冤冤相報何時了，就係因為仇恨永遠延續，社會先可以無限進步。」

      「我有個假設性問題想問下你。」Q微笑，「如果真係出現某D無法預計既情況，有實驗品逃出並且生還，我地應該採取咩策略？係佢地入醫院前殺佢地？暗中係醫院落毒？」

      「唔好下下都殺，收買醫護人員，係佢地住院既時候入佢打支失憶針未算。」

      「我地藥廠的確有失憶針可以輕易令人局部失憶，不過唔知道會否存在微小既風險……如果──」

      「Q，記住，總有D人要成為絕望中既光芒，先至能夠令到扯線木偶感受到生活依然有可以喘息既一面。」

      Q一愣，靜默了數秒，卻恍然大悟的微笑。

      「係既王生。」

      扯線者。