自殺以後，進入了RPG的世界: 離開地下城

離開地下城。
明明係女神，但係唔同轉移，居然我一齊由第八層走返上去地面。
無錯。
佢同我一齊行。
話係反正自己都無野做，所以就跟住我一齊行。

無魔物黎襲擊我。
大概係之前見到我殺左火龍，就唔夠膽再挑戰我。
話說，我應該可以直接做第七層……甚至係第八層既BOSS啦。
最起碼頭八層內無一隻魔物可以打得贏我。




第九層係地龍王，唔會夠打啦，應該就連佢手下任一隻地龍都可以輕鬆抽贏我。

之但係，做BOSS好似好悶咁。
如果話本身打機，做副本既王黎等冒險者大駕光臨應該會好有趣。
之不過呢個地下城就唔同講法。
就連身為大賢者既約翰，都只可以去到第三層，守係第八層既我究竟有咩可以做。
根本無可能有冒險者落到去第八層。

如果留係第三層，以我既力量黎計又好似違反哂成個地下城既平衡。
無理由有隻咁強既魔物守係到架，係咪先？




單係果隻蜈蚣已經好撚難打，仲要打埋我呢個不死族魔王，蠍子女王。
可以話係無可能。

上到黎地面。
天朗氣清……就怪。
落雪。
原來不經不覺已經黎到冬天，我轉生黎呢個世界既時候係咩季節呢？
唔知。
身為魔物既我，其實唔係幾感覺到天氣既轉變。
就連時間既流逝，我都唔係太感覺得到。




可能我已經唔再係人類，同本身人類既感知唔同啦。

落雪。
正確黎講係暴雪。
起碼我知道依家正直嚴寒。

「好凍……」
天照抱住自己係到抽搐。
「女神都會怕凍架咩？」
「我依家……落黎陪你玩……唔會用權……限……我依家只係個……普通人……」

呃，雖然唔知佢搞乜，但係睇佢個款真係好凍咁。
「吶，我……手……手……手手手指結左冰。」
睇黎呢一個女神就死咁。
有無真係咁凍呀。




堂堂女神……
不過佢衣著又真係有少少單薄既。

不過話結冰又真係吹大左。
雖然話就話係落雪，落大雪，但都唔會結到冰掛。
佢手指都無結冰，佢只係單純覺得凍姐。
睇黎佢真係好怕凍。
堂堂女神，唉。

「係咩人？」
面前出現左幾個人。

聯盟既劍聖，身後仲有一紅一白兩個魔法師，仲有一個白衣既神官。

「係魔物？係天蠍……唔係，係蠍子女王？」




佢地即刻警戒住我。

我望住天照。
天照一副我自身難保，自己搞掂個樣。
唉，熱下身先。
以我既實力黎講，直接殺哂佢地都唔成問題。
但係，我就試下唔殺，單統去剝奪佢地既戰鬥能力。

好快。
明明係人類！

劍聖拎劍一下子衝到埋黎。
我本能地正想後退，呢個時候發現雙腳比對面白色既果一位法師開技冰封左我雙腳。

「淨化之劍」




[淨化之劍:對單體造成大量物理傷害。同時對目標造成等同其魔力的傷害(最大傷害不超過10000)]

嗚。
好痛。
明明只係人類，但係呢一擊真係唔講得笑。

我即刻用手夾硬捉住佢把劍……捉唔到。
佢移動得好快，而我就比白法師控緊場郁得好慢。
唔緊要，雙鉗。
死亡之鉗。
一隻去攻擊白法師，一隻去擋住劍聖。

劍聖用劍勉強招架住。
而白法師一直逃走。





「火球術」
紅法師開技幫白法師擋左呢下。

睇黎真係要認真少少……
劍聖又衝到埋黎，一劍由下而上斬到我就跌低。