自殺以後，進入了RPG的世界: 瓦解邪教組織

就係咁，我繼續踏上自己既旅程。
當然，果個死人頭女神仲係到跟住我。
越過高山越過谷，行下行下又唔知自己行左去邊。

相信，我地行左入去個城鎮入面。
佛羅里達城。
普通既一個城鎮，無咩特別咁。
好似屬於獸人族既一個州份。
呢個時候，我先發覺不死族既勢力係幾咁細。
不死族係講緊得一個小城，而獸人呀、哥布林果D閒閒地都有幾個大州。




好廢，不死族……

城鎮係一個森林入面，比好多巨型既樹包圍。
大大小小既木屋圍住個巨型沼澤而設。
沼澤之上又有棚屋，又有唔同既橋樑連接。
好有自然既氣息。

呢個城鎮都幾大下。
單係中間既沼澤都已經有成……唔識計。
不過起碼，個沼澤都大過維園兩倍。





我同天照就搵左間客棧落腳。
通常都唔知有咩好事發生。
硬係感覺個天花板會無啦啦比條火龍燒爛。
又或者會有邪教徒召喚D奇奇怪怪既神出黎毀滅世界。
硬係凝住呢一種感覺。
好不安。

天照好樂觀咁係到飲茶。
「啊，好飲啊。」




所謂既錢，係呢位女神大人變出黎。
我當然就係無錢架啦，呢位女神就可以無限變D錢出黎用，真係方便。
不愧係女神，連呢D事都做到。

不過，就算發生咩奇怪既事，都會有呢個女神大人解決架啦。
雖然佢本人好……
算啦，都係唔好講佢咁多壞話。
總之就算有咩事都好，女神都會解決。
唔洗煩，我只係繼續去旅下行就算。
自暴自棄中……

「有無聽過冒險者協會？」天照問。
「無喎。」
「申請做會員，就可以去接委託黎做架啦，好方便架，就好似你以前個世界打機接任咁。」
「哦。」




「去做啦。」
「我拒絕。」
「腹痛」天照指住我講。

呀呀呀。
對唔住……對唔住囉……我做啦啦我做啦……
可惡，懢有女神權力，逼人聽佢講野。

就係咁，登記左做會員。
會員有咩做啊……
好煩……

天照拉左我去塊報告板到。
上面有好多唔同既任務可以做。





「喂喂，呢個呀，狩獵地龍，獎勵好豐富喎。」天照講。
地龍呀呀姐，你以為龍好易打呀？
「一係呢個啦，護送任務，穿過火龍既山就得。」
你講到易過食生菜咁。
以我依家黎講，同龍打真係未必有勝算。
不了不了。

「喂啊，你樣樣都SAY NO，想點啊？」
天照就好似個大唔透既細路。
不過啊，你可唔可以比個容易少少既任務我做啊？
睇過……
我拎起上面既一張羊皮紙黎睇。

瓦解佛羅里達城的邪教組織。
難度:B+




報酬:3金幣、聖職者手套、聖職者項鍊

簡單易懂既委託。
就有鬼。
咩叫邪教組織啊？
蜘蛛教？
定係點啊？
咁點樣瓦解啊？
講多少少詳情得唔得？

但係呢個時候，天照已經搶左我張野去填FORM，仲要交埋，接左個任了。

「……」我望住佢。
「咩啊？你唔係想做呢個任咩？」天照笑住扮左個鬼臉。
明明可以讀我心。




唉算啦，好過要搵命搏去屠龍既……
(上面屠龍既任務難度都係S+)