自殺以後，進入了RPG的世界: 火加山等於龍

一座建係山上面既城塞。
係一座好高既山，大約有成千幾米高、山上面充滿住紅色既一個個防禦建築。
高塔、城池、城堡全部都可以睇到。
好明顯，係一個軍事建築。
呢座城塞既主人係邊個？
精靈王？
係咁就好。
但係，好明顯唔係咁。

我偷偷咁潛入去。




山下面睇水既係一隻坐係高塔入面既哥布林，我無用幻像魔法，始終潛入去既話，蛛女既身型較難比人發現。
但係，令人感覺奇怪既係，哥布林睇水？姐係話呢到係魔界既勢力？
無可能，呢到係咩鬼野山脈，係，德魯伊山脈，應該係屬於聯盟既勢力範圍，魔界係呢到起左個城塞，似乎唔太可能。

再行入好幾步，要我爬山爬上去。
有幾條幾好行既山路，似乎係人為修出黎。
今次，我見到幾個矮人。
矮人？
唔係掛？
聯盟既人同魔界既人係埋同一個地方？




搞咩？

然後，行下行下，行到山腰，我見到一個巨大既關卡。
比紅色既鐵閘包密封住，完全睇唔到入面既野。
當然啦，咁既鐵閘係難我唔到。
作為一隻蟲，可以飛簷走壁係一件好正常既事。
我爬上個鐵閘。
係……宴會？

我見到一個紅色頭髮既男人同埋白雪、風騷係到食緊飯。




唔……
微妙既感覺。
感覺上唔似係壞人。
睇個果個男人係咩STATUS先。

【火焰之子】 人類-蠑螈 法師 LV99

HP:9157
MP:12421

力量:1069  敏捷:796
防禦:907  魔力:1365

幻像魔法，換番大賢者徒弟果樣先。
咦？




無左成幾千MP？
明明已經減半左，但係點解會用咁多MP？
唔係怒喎……一定又係天照玩鳩我，算，我忍！

然後，我靜靜去到男人既後面，然後問:
「你係咩人？」

男人嘛左一跳，然後彈開左。

「呀……唔好意思，我既朋友係痴痴地線。」白雪道歉咁講。

「原來係你地既朋友呀……幸會。大賢者既徒弟，唔怪得咁易入到黎呢到。」
佢伸手過黎？握手？定點？
睇佢個樣，成個貴族LOOK咁。





「自我介紹先。我係呢到既領主，我係蠑螈公爵。當然啦，公爵呢個名都係隨口講架姐，當然無實際名份，只不過其他人都係咁叫我。呢到都係一個祕密既城塞，火焰山，不過希望你唔好同你師父講，我唔想打搞呢到既安寧。」

……

「你入黎都應該見到啦，呢到係和平之地，兩邊既人都可以係到和平相處，我實在唔想打搞呢到既安寧。唔好同所羅門王講，真係唔好。」

……

「你都係勇者既同伴？咁我同埋你講啦。你應該知大陸中間既火山啦，果到就黎爆發，火焰將會撕裂呢片大陸。無錯，係咁，火焰既神，請你地去安撫佢，唔好令佢發癲，但係唔好殺左佢。」

蠑螈佢跪左係到求白雪幫手。

「等等先，請你起身……」

「咁姐係話你地接受我既委託？」





「我明白啦。你地有無意見？風騷、痴線蜘蛛D蜘蛛絲癡住枝樹枝先生？」白雪問我地。
「唔好意思……都要等我送左痴線蜘蛛D蜘蛛絲癡住枝樹枝去精靈國先，跟著我會去幫你手架。」
「唔緊要，我等埋你。」

「真係非常之感謝你地，你地可以維持呢片世界既和平，在下真係無言感激。」

「我有個問題？點解你唔親自去安撫佢？」
我突然之間開口問。

「因為我實力唔夠……以我既能力，係無可能接近到火焰之神。但係勇者你唔同，你唔單止係用水既系統，而且你仲係可以創造奇蹟既勇者，所以……」

「如果你都做唔到？白雪佢有咩可能做到？如果你都做唔到既話，呢片大陸都無咩邊個都得到。」我行埋去扯住佢件衫講。

「痴線蜘蛛D蜘蛛絲癡住枝樹枝先生……係咁既人黎架咩？你唔係好少同人講野架咩？」白雪有D驚訝。





「係……係呀……係呀，但係，我係好少同人講野，人。」
我笑左一笑，然後，啪左一下手指。

魔法反制。
再睇佢既STATUS。

【火焰之子】 烈焰龍帝-蠑螈 LV80

HP:147536
MP:178543

力量:6864  敏捷:5269
防禦:4165  魔力:5464

比想像中強好多！
係火龍既進化版本？
而且超過左第8層既程度，雖然完全比唔上第9層既強度。
講笑咋下話……