自殺以後，進入了RPG的世界: 王
「所以呢？你會幫我地？」
呢幾日風騷都係咁追問我。
好煩。
好似係想要我幫佢地手，做佢地既宮庭魔法師。
雖然話人工高姐，但係始終都唔係幾想做。
一黎，呢班友鬼打鬼，關我鬼事咩。
二黎，外神D野點辦，雖然天照話唔使我操心姐。
三黎，查實我唔曉魔法。我唯一識用既魔法係暗影長槍，呀，仲有魔法反制囉，所以我點做呢個乜鬼野宮殿魔法師。
最麻煩既事黎啦，精靈王親自接見我，要我幫佢手。
「所以請你幫幫忙啦，為左呢個世界。」
為乜鬼。
關我鬼事咩。
「的而且確，我地依家係無可能同所羅門王抗衡。但係有你幫助既話，對我地黎講絕對係如虎添翼。所以，為左呢個世界，請幫幫忙。錢唔係問題……」
睇黎大賢者既徒弟呢個名可以呃下飯食。雖然大賢者其實都唔係好勁姐。
「你意下如何？」
都係咪啦，攞黎煩。
我企左係身，走人。
「等等先，無論如何都唔可以幫我地？」
我望住佢，但係唔比反應佢。
「所羅門王，唔係好人。你有無聽過邪教既事。傳說，有人見到所羅門王並唔係相信女神，而佢相信邪教。暗中，為邪神既復活進行準備。」
咩話？
有D咁既事？
「我極有可能相信，德魯伊山脈既事係佢地搞出黎。」
但係細心諗諗，明明大賢者佢地有份幫手打果班污染既怪物，點諗都唔關佢地事喎。
可能事情唔係咁簡單黎。
不過，就算真係咁，依家既我都做唔到D咩。
依家既我，去到外神面前，都只會比佢地一擊秒殺。
所以，走人。
「等等！」
我發覺聯盟呢邊真係好悶。
算啦，呢班人咁頹，唔怪得會係咁輸比魔界啦。
玩左咁耐都係時候啦。
係時候要去清算佢地。
清算果個假冒我既魔王。
但係，點解我有樣野好似唔記得左做。
是但啦，應該都唔係咩重要事。
空間魔法。
我撇低白雪同風騷，自己一個去左第二度。
魔王城。
幻像魔法又要改一改。
【巨人族領主】 巨人-名真係好難諗 法師 LV99
HP:9864
MP:10189
力量:971 敏捷:787
防禦:999 魔力:1318
唔。
就咁啦。
今次既設定係一個女性既巨人族。
巨人族領主。
咁係因為真正既巨人族領主仲留左係地下城第3層，所以先有利我冒充佢。
黎到魔王城門口。
無咩特別。
有幾個士兵指住我。
「你係咩人？」
「咩……咩人？我咪係，咪係巨人族領主。」
「你係巨人族領主？」
「係呀。稱號仲有假架咩？」
「但係，領主佢……」
「哦，上任果個死左。」
「死左……明白，咁通行令呢？」
「通行令？」
「令牌呀！新上任唔知令牌？」
……
有D咁既野架咩？
蠢左添。果然就咁兩梳蕉兩手空空咁走入去係好ON9。
「咩事？」突然間，後面有個人走左過黎。
好熟口面。
【不死族領主】 骷髏-歐西里斯 法師 LV99
HP:7296
MP:11984
力量:726 敏捷:828
防禦:788 魔力:1644
哦，係排骨。
「係咁既，呢個人自稱係領主，但係無通行令……」士兵說。
「哦，咁咋。咁大個稱號棟係到仲有假架咩！好心魔王佢就廢除左呢D麻煩野佢啦。咦？領主？巨人族？尤彌爾佢死左？」
尤彌爾？乜水？哦，好似係之前果個巨人族領主。
「好，好似係。」我咁樣回答。
「係呀。我明白啦。行啦，你新黎，我就係你前輩啦。行啦，跟住我。」排骨講。
「跟住你？」我問。
「開會呀！你唔係黎開會咩？」
咦？原來今日開會。我都係依家先知。
跟住，排骨佢就帶左我入去魔王城。
就係咁，我無啦啦比佢地捉左去開會。
一入到去某間會議室(?)，成班人坐哂係到望住我地。
「SOR呀！又遲到！原來佢係巨人族新領主，尤彌爾已經升左仙。」排骨好似係係到道歉。
成班人坐哂係到望住我地。
係一張長方型既長枱，左右兩邊各有三個位，然後枱既盡頭又有一個主席位。
我理所當然咁坐左係主席位到，然後成班人都睥住我。
「喂，果個係魔王個位黎……」
我知道。
然後，有個黑影衝左入黎，捉住左我心口。
「你，乜水？」黑影問。
睇真D，原來係之前果個……吸血鬼？
【人類的惡夢】吸血鬼-德古拉 戰士 LV98
HP:9756
MP:11066
力量:963 敏捷:972
防禦:952 魔力:999
「巨人族領主。」我笑住咁答。
「喂，唔好激嬲佢，佢就係魔王。SOR，有怪莫怪，細路仔唔識世界。」排骨拉開左我，然後帶我去自己個位上面。
魔王？原來就係佢。
「尤彌爾死左？原來係咁。睇黎巨人族領主個位要再換多次。」假魔王，德古拉抆劍指住我。
「我覺得魔王個位要換一換。呀，唔係喎，就算你死左，魔王都係無變架啦。」我笑住回答佢。
「魔王大人，原諒佢啦。」獸人領主睇見唔對路，喝止住假魔王。
哦，記得啦。龍人領主同獸人領主都應該知道魔王係一隻蟲，我第一日黎呢個世界既時候見過佢地。
「無錯，魔王大人。王唔應該係咁小器。」龍人領主抱住雙手。
六大領主。
左邊係獸人、龍人、惡魔。
右邊係巨人(我)、不死族、哥布林。
魔王望住我地，咩都無講，然後，坐番去自己個位上面。