自殺以後，進入了RPG的世界: #蜘蛛

原來依家既我同白兔係位於魔界入面。
經過呢半年時間，我LV升到去60。
我同白兔以聯盟背叛者既身份，係魔界入面活動。
當然唔係真係背叛左聯盟啦，只不過係為左方便活動先至咁樣自稱姐。
睇黎魔界既制度好鬆，就算我地係人類，都比我地自由活動。
甚至去佢地既冒險者協會到接任務都得。

本來，我同白兔只係諗住升下LV就算。
點知，我地見到一個好特別既任務。
任務有分難度，由S去到A、B、C。




一般黎講，B級既任務已經係非常之難做。
A級任務係要一大班等級高既冒險者去一齊行動，先至有機會成功。
然後，呢個係S級任務。
「狩獵蝴蝶女王」

蝴蝶女王。
呢個蝴蝶女王係之前果一個？
唔知，但係呢個係我地依家唯一既線索。
所以，無論點都好，都要去狩獵呢隻女王。





問題係，佢壓倒性既STATUS。
8萬幾血，十幾萬MP既怪物。
不過，就算佢點勁法都好，我地都要去搵佢。
有咩事都好，搵到佢先講。

我地同白兔、其他冒險者，一共十六個人前往狩獵蝴蝶女王。
平均LV係60左右，已經算高。
雖然話蝴蝶女王既實力勁到非常之誇張，但係我地十六個人去應該都無問題掛。

我望住白兔，佢咩都無講，行係前面。




究竟白兔一直以黎諗緊咩呢？

黎到森林。
只係一個普通既森林。

哦，係地精。
一開始見到既怪物係地精。
六隻地精，平均LV係20。
好弱。
白兔衝左上去，幾刀就斬死一隻。
然後係……逃走？
吓？
怪物都會逃走？

呢到係一個森林。




係蝴蝶女王既巢穴。
所以……

「哦？今日又有一大堆人黎送死拿？」

係蝴蝶女王！
佢坐左係一棟樹上面！
個名同之前既蝴蝶女王一樣，無錯，係之前果整到火龍王發癲既蝴蝶女王！

「蝴蝶女王！你究竟係咩人！」
白兔走上前問。

蝴蝶女王笑一笑，然後講:
「同你地打無意思，交比佢啦。」
然後，蝴蝶女王消失左。





交比佢？
然後，天上面飛出黎既係，係一隻獅鷹獸！
雖然比蝴蝶女王弱好多，但係都非常之強！

「全部人戒備！」
白兔指揮。

點知，地上面出現左蜘蛛絲，將獅鷹獸扯左落黎。

【女王】 蜘蛛女王 LV85

HP:97513
MP:164862





力量:3597  敏捷:4328
防禦:3457  魔力:5298

然後，又有新既敵人出現。
係一個金髮灰色皮膚既女人，下半身唔係腳，而係一隻蜘蛛。
毫無疑問，比起蝴蝶女王，依隻生物更加可怕。
比蝴蝶女王，更加強。
見到佢既第一眼開始，我既直覺話比我知，如果我地同蝴蝶女王打既話，或多或少都有勝算。
然後，同佢打，係無可能贏。

一個獸人戰士拎住斧頭衝左上去。
蜘蛛女王舉起手，開左技能！
係暗影長槍！
「暗影無效」
我即刻開技保護戰士。




呢招可以中和一次暗影傷害。
呢一槍，可以直接秒殺一個人條命。

係一場苦戰。
唔係，係我地單方面比佢虐殺，佢並無出盡全力。
好快，佢就玩厭左。

白兔企係我面前，想要保護我。
「走！」
白兔同我講。
但係我雙腳麻木哂，企左係到。

白兔:「我地太大意，估唔到有咁樣既生物係到出現。」
我:「我唔走。」
「得你一個都好，逃走啦。」
「一齊走啦。」
「事到如今仲講D咩呀！明知無可能走到，但係你仲有機會走，我去拖延時間，你快D走呀！」
「唔得呀……點可以……」
「拜託你啦，幫我搵埋其他既學生。」
「咦？」
「搞左廿幾年，都只係搵到你一個，對唔住，我呢個做老師既真係失敗。」
「咩意思……？」
「你呀，雖然扮哂女神既款，實際上都係一個好女仔黎架，所以，拜託啦，幫我睇住其他既學生啦。」

白兔卷左一個黑色既光球入面，爆炸。
係我面前血肉橫飛。

而我，呆左咁企係到。
Miss Chan？

下一秒，蜘蛛女王已經企到我面前。
Miss Chan？
果個係Miss Chan？
Miss Chan係白兔？
Miss Chan死左？

呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀呀！

好想大叫，但係喉嚨發唔到聲。
好想喊，但係眼淚流唔到落黎。
我既瞳孔入面，得番眼前既蜘蛛。

似曾相識既感覺。
唔會有錯，呢隻係之前殺我全家既果隻蟲。
佢舉起手。
要殺埋我？
是但啦。
一切都無所謂啦。
因為我既錯，搞到Miss Chan……
唔係，係因為呢條蟲！
一而再，再而三咁殺哂我身邊既人！
我好憎呢條蟲。

治療魔法？
佢對我用治療魔法？

「獅鷹獸。帶佢走，帶佢飛番去城市到。」

蜘蛛再一次放過左我。