呢度真係十足十係一個旺角行人專用區。

「轉左去戲院旁邊攞返D車馬費先啦。」句號初弒都行左出黎。

「句號!我…我真係一頭霧水,可唔可以幫吓我?」我緊張到捉住左佢隻手。

我從來未試過因為熟悉一躂地方而感到咁驚,呢次係第一次…

我腦部既訊息好矛盾,我明明響高登獵殺森林,但係而家…





竟然響我熟悉既旺角,更矛盾既係…

有一個擺明唔應該響正常世界出現既句號初弒響我身邊。

「解決性慾呢家野,我幫唔到你噃,或者你行前幾條街睇睇。」句號佢咁講。

「唔係呀,我…我真係好想知呢度究竟係邊?我…我熟悉到有D怕。」

「睇著你一幅嚇到就黎瀨既樣,我就首次認真答吓你啦,你唔使驚,呢度仲係高登獵殺森林,呢度係城市區,係由多個被複製出黎既香港地區夾雜而成既, 所以每段路每段路咁睇既話,呢度係同香港一模一樣,但係行過幾條街就已經係荃灣,你自己四圍行吓啦,揸住!呢度就係你既五十蚊車馬費,你可以加D錢將佢變成炮費。」





「我…我朋友佢地呢?」我仲有少少擔心百變怪佢地。

「佢地都好正常咁生活緊呱,我冇攪佢地,尋晚我只係用煙霧彈帶走左你。」

「咁…點解你一定要我做實驗呀?」

「咁點解你又一定要嫁禍俾我呀?」

「嫁禍你既係我朋友。」





「有句說話叫你朋友就是你。」

佢D廢話又黎,我真係頂唔順,所以寧願走去問其他擺明係AI既路人…

我諗住先返去森林區,或者到時候再用Call台約返班死仔。

「阿哥,請問森林區響邊?」我問左一個路人。

佢淨係搲左吓頭就走左,冇回應我,就好似當我傻既咁。

我重複又重複咁問唔同既途人…

但係佢地都只係不斷咁重複頭先條路人既動作。

「響香港呢個石屎森林問人森林區響邊,邊個會識得答你呀?」講野既係句號。





「你做乜跟住我呀?」

「我得鬼閒跟住你,係你問來問去都響呢度附近,而家仲行返埋黎我屋企門口。」

睇黎我真係驚得滯,而且我仲好似…

產生左一D恐懼反應,就好似細個果陣對陌生環境既恐懼。

「點呀?」

「你可唔可以幫我返番去呀?」我已經變得有D好似哀求句號佢咁。

「可以,盛惠四粒膠啦。」





「四…四粒膠!?」我摸一摸自己個身,發現D高登膠仲響我身。

「點解你之前唔襯我暈果陣攞走晒佢地呀?」我問句號。

「我要你甘心情願咁俾我囉。」

「咩意思呀?你係一早知我會有呢類奇怪既恐懼反應?」

「噏乜春呀?鬼得閒理你D生理反應咩。咁俾唔俾呀?」

「件事黎得太突然,我…我唔識…」我而家個心好矛盾,高登膠既價值雖然好高…

但係黎到D咁既情況,我真係覺得搵返百變怪佢地對我黎講更重要…

所以我…





「好!只要你幫我返到去我熟悉既地方,我會俾晒我D膠你!一言既出!」

「駟馬難追!」句號拍板接受左。

(你傻左呀?四萬億搵人帶路?) 當時我個腦咁問我。

但係我個心回應佢︰

「當你一條友唔好話去到非洲咁遠,你無端端去左伊拉克咋,我諗你都一樣會好想用全副身家換返一個你覺得安全既地方。」

句號佢之後帶左我去搭小巴…

一上到小巴,我就諗起女車神司機街口有落,仲諗到Call台大佬五十嵐裕美…





但係呢架車唔係女車神揸,更加冇收音機同對講機。

而我就仲係迷迷惘惘咁沈沒左響徬徨之中。

「對唔住呀,我諗我真係嚇得你好緊要,但係我真係只係想做實驗,見對你唔住,我就爆個秘密俾你聽丫…」句號突然咁同我講。

佢講到呢度,我既好奇竟然總算可以帶動徬徨中既我面向住佢。

「未計你果四粒,我一早就有十一粒膠喇,唔好話俾人知。」

「吓!?」

我當時既反應係呆左,因為真係好奇怪,唔係話有十粒就可以離開呢度咩?

點解會有人有十一粒膠都仲響森林裡面?唔通傳聞係假?

定係句號佢呃我呢?咁…佢居心又係咩呢?
已有 0 人追稿