與忍蛋在按摩椅上享受肩背舒鬆之快期間,我無意地聽到對面坐在天王按摩椅上的兩位大叔對話,好像在那裡聽過…叫什麼鬼格鬥比賽。

「啊~老王,個暗黑地下格鬥比賽幾時開始話~?」微胖帶點和睦笑容的大叔問身旁的老朋友。

兩人閒談好像不怕被人偷聽到一樣,直直地說:「哦?今個月十號開始啊,依家仲係首輪入選揀緊人。」

「聽講今年有隻馬仔好勁喎…叫…叫……乜乜龍話?」

「哎~點勁都無用喇,最後肯定會輸俾百足半藏。」大叔嘆著氣說:「根本冇人打得贏過佢。」





「咁你仲去唔去睇啊~?」

「睇首輪入選比賽唔洗錢喎~緊係去睇,之後要俾錢個啲決賽、分組賽就唔睇啦~留番啲錢去「紅怡院」叫雞仲好!」

「又係嘅…睇住班男人肉掂肉咁打架,又爆哂血咁……都唔方開胃。」說著說著,二人就感噁地搖地,停止話題。

我點點頭:「暗黑地下格鬥比賽……」如果不是有事在身,我都想去觀摩一下。

「百足半藏…」忍蛋若有所思地仰頭、望高:「好似喺邊到聽過。」





待我們的背筋肌骨都放鬆之後,便精力沖沛地離開店子,想了一想,經過今次之後我盤川又少了一點,如果要在有限的金錢內找到赤兵隊的線索,我似乎還要額外賺點外快捱一下在九龍寨居住的日子。

「街口排到街尾未嘅…」忍蛋跟我離開時,望到街道上一條長長的隊龍也禁不住疑問:「開咗間韓式芝士拉雞店?」

但見排隊的人非壯即惡,絕無可能是忍蛋口中的答案,不過答案在我們走到街口時便呼之欲出了──「暗黑地下格鬥比賽」。

一間類似武館的地方,門外有人為排隊者登記著,入面則傳出拳腳的打鬥聲,聽起來正打得激烈。

「點啊?」站在門外的一位小哥似乎注意到正望場內入面的我和忍蛋,便說:「依到係西部嘅首輪入選比賽場地,想參賽就排隊!大把人等緊。」





「西部?」我問。

「九龍寨嘅東、南、西、北都有我哋嘅首輪登記場地,依到係西部啊!問問問…排隊啦!」一位正在排隊,身材瘦削的鼠輩之徒對我喝罵。

這大叔根本就瘦得一掌也給人打斷骨頭啊……

居然這麼有自信來參賽…

「睇落幾得意。」忍蛋望住場內,淺淡一笑:「不過貼喺牆上張「比賽規則」寫明……唔准攜帶武器,要赤手空拳對打…我太刀劍術再勁都無用武之地。」

「叮叮叮叮──」突然一噹鈴聲,一個男人從場內走出,把一張分組紙貼出來公佈板上。

「九龍寨西部,地區分組賽第四組勝出者名單!」該名男人貼好名單後,大聲宣佈:「西部第四組入圍者:進擊拳術協會──馬立文、圓方重拳流──方山、華山鐵掌派──元向柏、赤兵隊第八師團──海鯊、宅男愛好後援團──初音‧魂影!」

「赤…赤兵隊…?」我口中不自禁沉唸他剛才說出的入圍者。





海鯊…我略略記得這傢伙的名字,是在赤兵隊出了名的好戰傢伙!

「屌~」、「入面班仆街幾時打完呀!!我等咗好耐喇!!!」、「唉,又少咗個位…」、「幾時到我……」

公佈一出,排隊的人龍隨即傳出一陣抱怨的聲音,似乎為著自己可能不能夠參賽而苦惱著。

「班人又會咁鐘意打架~」忍蛋望住又要排住隊,又要抱住怨的一大群人。

「咁係因為,勝出者會贏到舉辦比賽一半嘅獎金,而最後入到決賽嘅參賽者都可以分別可以獲得一部份嘅獎金,所以係十分之吸引。」紮住額髮,認真地進行登記工作的一位中年男職員回答忍蛋的閒話。

「錢?嚟得九龍寨嘅人都應該有自己嘅賺財套路~洗唔洗靠依個比賽?」忍蛋反問。

「錯。除咗金錢之外,該武術門派仲可以喺地下世界揚名立萬,除咗得到暗道中人之間嘅聲譽…方便人脈交易之外,仲可以得到稀有嘅「黑幣」。」中年男職員繼續回應。





「黑幣…黑市獨有貨幣?」我搭嘴。

「嗯,只有少數掌有權力、財富、人脈,嘅人先擁有嘅一種貨幣。而且,黑幣喺黑道之中係擁有高度信譽嘅象徵,被視為有貢獻傑出表現嘅人先值得擁有,因為黑幣上面係用稀有金屬、矜貴物料、精緻手工去長時間製作,每一個都獨一無二……有錢都買唔起。」

簡單點來說……握住一塊名為「黑幣」的東西,就是可以橫行於大街小巷的黑道VIP吧?
已有 0 人追稿