Ch3. 

        我抱住雷米,跑離大空地,寧風長年累月居住喺森林的經驗,令我喺林木間嘅穿插非常之順利。
 
        千夜顯然野外經驗同體力都冇咁充足,但憑住意志勉強咁跟上。
 
        「雷米,Good Job。」我對雷米豎起手指公。
 
        「嘻嘻,宜家我地去邊?」
 




        「返去啱啱果度。」我講依句嘅同時望一望千夜,佢輕輕點頭。
 
        一鼓作氣跑咗五、六百米,我地返返去啱先雷米瞓覺嘅地方。
 
        雷米點著咗營火,我同千夜終於望清楚對方。
 
        千夜個樣仲係好年輕,應該同寧風差唔多年紀,但係就矮寧風少少,不過佢雙臂好明顯係有keep住操,咁既年紀已經有啲老鼠仔,再操多兩年就不得了。而且岩岩佢戰鬥左咁耐仲跟得上我速度,體質真係比一般魔法使好,更加符合坦克既推測。
 
        千夜有一副粗眉,個樣戇居居咁,我又唔會話佢毒撚樣嘅,擔屎唔貪食果啲正直樣。
 




        我唔知同佢互相打量左幾耐,最後,係千夜忍唔住講野先。
 
        「啱先…唔該。」佢講野好似有啲淆底咁。
 
        「唔使客氣,係喎,我諗你都係廿幾lv左右,點解會自己一個入黎緣風林?」
 
        「我有啲緊要事…要由天臻城趕路去天藍城…所以…」
 
        「原來係咁。」
 




        天藍城同天臻城,係最近緣風林嘅兩個城市,分別喺緣風林嘅南面同北面,但兩個城之間嘅官道並唔係直路,而係要繞過樹林,所以係一條大過90度嘅大彎路,所以如果直接穿過緣風林,可以慳返最少三分一路程。
 
        「唔,對唔住,時間緊迫,我要繼續趕路。」千夜諗左一諗,繼續講:「如果要搵我嘅話…去天藍城城主府,我會好好報答你地。」
 
        然後轉身,踏出腳步,「但宜家我必須要走。」
 
        之前佢講野疾下疾下,又淆淆地咁,係唯獨依句非常堅定。
 
        「嗯,寧風,我叫寧風。」我知道冇可能留得住佢,交低個名就算數。
 
        「嗯…再見。」千夜慢慢消失喺一片樹木之中。
 
        「依個人真係好搏命,岩岩戰鬥完,仲要加埋星夜時分,都仲要趕路,仲要揀條危險嘅路。」雷米讚嘆千夜。
 
        「佢一定有好重要嘅事要做,比佢嘅生命更加重要。」我望住前方嘅森林,千夜嘅身影彷彿仍然喺我眼前。




 
        「嗯。」雷米同意,「um,咁,到底啲灰狼走黎依片區域做乜,佢地好似本身屬於天藍城果邊果幾個山頭。」
 
        「依層,我有啲諗法,但唔知事實係咪我諗咁樣。」
 
        「嗯?」
 
        「魔風狼本身嘅棲息範圍就係廢棄礦洞一帶,一直受到我地削弱,加埋之前魔風狼王死左,附近既魔獸可能會趁機過黎分地盤。」
 
        「睇灰狼群移動嘅方向,係由東南去西北,符合我地個廢棄礦洞既方向。而千夜,由天臻城果邊去天藍城,的確有機會經過果邊個空地。」


(以上為示意圖,距離未必符合比例。)

        「唔,咁姐係話,其實某程度上都關我地事…」雷米有啲sad,可能係唔想見到咁多魔獸死去嘅畫面。




 
        我答:「又唔係嘅,族群興衰依啲野,可以隨時有人一把火燒晒成個緣風林,或者『閣下』突然得閒冇野做出黎屠下魔風狼咁,好難講係誰對誰錯。戰爭從來就係成王敗寇,敵人係唔會理你點解會衰落左,但你一衰落,佢就唔理三七廿一打贏左你先算。所以如果你想保護一啲野,你就先要有相應嘅實力。」
 
        雷米聽完,沉澱左係思考之中。
 
        我摸一摸雷米頭頂,安慰佢:「帽事既,唔洗諗太多。」
 
        「嗯…我冇事。」

        ……
 
天藍城
所  在:天藍城
所  屬:天藍城
等級限制:1




進入限制:1級限制(註1)
 
        經過咗三日路程,我同雷米黎到天藍城。
 
        天藍城城牆上掛住一支帝國旗幟,圖案同千夜果件魔法袍一樣。
 
        城門有兩名守衛守備,不過由於依邊城門係同個森林連接,平日應該冇咩人會由依個位入城。
 
        所以依兩條友遠遠睇落已經非常hea,正挨係牆邊坐低。
 
        見到我同雷米行近城門,兩條友先至收起果副庸庸懶懶既臉孔。
 
        「咩人?」兩名守衛之中生得高啲果個開口問。
 
        「我地係由緣風林趕路過黎既,有要事要辦,請比我地入城。」我答。




 
        「啊?咁有冇身分證明?」矮果個咁問。
 
        呀屌,乜依個年代有啲咁既野架咩,我以前睇人地穿越果啲故同動漫,啲主角明明就大搖大擺咁入城,因乜解究係得我穿得黎仲要咁q麻煩。
 
        冇計,借住千夜個名吹下水先。「前兩日呀城主府個千夜少爺咪趕左返黎既,我地係佢同學,有緊要事通知佢。」
 
        「哦,原來係咁…咁都有學生證掛?如果唔係一陣發生左咩事,我地好難同上面交代。」矮果個聽到我係魔法學院啲學生,睇黎怕我一陣係啲咩權貴,會得罪我,但另一方面又怕上頭屌。
 
        咁就等我加啲壓力,「哦,咁你姐係話,我入城係黎搞事架姐?一陣你耽誤左件緊要事,隻鑊係咪你揹先?」
 
        「唔係,唔係,我地絕對冇咁既意思。」高果個即刻否認。

        「拿你又諗下,你都唔肯定佢會咁趕返黎喇,如果唔係佢熟人,我又點會知佢行蹤先?你懷疑我既話,就姐係唔信千夜少爺。」
 
        「er,er,依層。」兩個士兵仔比我質一質,唔敢出聲。
 
        OK,跟住我再黎一招軟硬兼施,比返個下台階佢地。「拿,姐係咁,因為我地出發得比較趕,證就冇喇,不過,路費就仲有少少剩,依啲就拎去分比咁多位手足。」
 
        我對雷米打左個眼色,雷米行上前將兩枚金幣分別交到兩人手中。
 
        兩條友見到金幣,即刻雙眼閃閃發光。
 
        「咁…咁…咁唔係幾好既…」以我對貨幣既了解,1個金幣大約等於港幣一兩萬,應該都有佢地成個月人工。
 
        「哦?兩位兵大哥,唔會唔夠呀可?」我用一種虛偽既語氣問。
 
        「唔係,唔係,夠喇夠喇,」高果個壓低聲音:「不過…」跟住做左個手指公磨擦食指中指既手勢。
 
        我又再同雷米打個眼色,兩名守衛手上即刻又多左個金幣。
 
        兩條友收到錢之後即刻轉哂口風,彎低90度恭迎我地:「少爺,小姐,請進城,天藍城永遠歡迎你地…」
 
        唔,我一邊行入城,一邊係到諗,睇黎無論去邊都好,首先,係要有個身份證明。
 
        係我度緊既同時,天藍城既街道映入眼簾,兩邊既街道都起滿兩三層高既建築物,唔同顏色既磚牆加上赤色圓錐型屋頂,充滿左歐陸既風格。天藍城依種細城市,好明顯將住宅區同商業區融合埋一齊,放眼過去一樓全部都係地舖,然後樓上再住人。

        視線既盡頭有一幢比其他建築高少少既大樓,帝國旗就係圓尖頂上耀舞。

        唔,睇個勢,果度就係城主府。

        「哇,原來城市係咁架!主人,我可唔可以四圍睇下呀?」雷米又用捉住我手臂依招。

        不過對於知道佢真身係隻魔獸既我,依招係起唔到任何作用。

        「唔,都係搵個地方瞓重要啲,安頓左再慢慢睇。」入黑之後就未必咁易搵到地方,都係早啲睇下有冇客棧、旅館之類。

        四圍問左啲路人之後,終於打聽到一間平靚正既旅館。

        係外面睇,旅館既外牆係由石磚砌成。而入到入面,就見到牆壁油上左簡單樸實既米白色。
 
        櫃檯就係大門既正前方,掌櫃既係一名睇落去大概四十歲既男人,佢企左係櫃檯入面,就好似RPG啲NPC咁。
 
        而櫃檯外擺放既幾張枱都坐滿左客,食緊午餐。
 
        我同雷米行上前,發現其他客人都望住我地,感覺怪怪地。
 
        「老闆,唔該,我要一間雙人房。」行到櫃檯面前,我向掌櫃講。
 
        「細路,你廿歲未呀,行左成人禮未呀?學人黎開房!?」呀掌櫃好q大聲咁講,我非常之肯肯定成村人宜家都望緊我。
 
        唔,我擰轉望一望雷米,佢個少女look咁正,又著得咁單薄,又真係好易令人誤會既。
 
        但係依啲可以變人形既魔獸應該比較稀有,都係唔好咁大聲,求其話佢係我邊個邊個親戚就算。
 
        於是我話:「老闆,我諗你就有啲誤會,佢係…」
 
        但係又比掌櫃條老坑打斷我:「計我話,你依啲年紀,就應該好好學習,有錢就拎去報答老師同屋企人,幾時輪到你開房!」
 
        「係係係係係。」抵受唔住老闆既碎碎唸,我拉住雷米,急步逃離旅館。
 
        屌,乜依度啲中年老坑都係咁蠻不講理架咩?
 
        行出旅館,雷米傻呼呼咁問我:「主人,咁宜家係咪可以去遊覽喇?」
 
        「一定係,除非唔係。」
 
        我又諗一諗,冇計,唯有去左搵千夜先,睇下佢有咩計仔。
 
        我同雷米講:「走,去搵千夜。」

        ……

        唔,行去城主府既路上,我就一路係到諗,為何現實不是我想像中的那樣?
 
        點解人地穿越咁爽皮,我就一波三折。
 
        我仲記得以前睇過一篇故,個十幾歲既男主角帶住四條女去旅館都冇事,仲要係溫泉旅館,仲要係男女性得一板之隔果種。唔洗問,男主角就係隔住塊有窿既木板明望對面,四條女既身材一覽無遺,夜晚再揀人大戰依啲就不在話下。
 
        呀,人地又係去旅館,我又係去旅館,乜我依度嚴謹咁多?
 
        又要check證又未夠廿歲唔比帶女開房,你估宜家現實世界咩,依度rpg黎架咋dllm。
 
        唉,我心諗,宜家連瞓既地方都未有,呀你老尾個作者係咪搞鳩我。
 
        我唔會一陣要悲哀到學耶_咁瞓馬槽掛?
 
        我一路諗下又行下,唔經唔覺就到左城主府。
 
        …… 

        「唔…城主府就係有氣派。」城主府都被圍上石牆,成個城堡咁樣。
 
        「小少爺吩咐我帶兩位入去,請跟我黎。」一名侍女由城主府行出黎,有禮貌地咁講。
 
        「有勞。」我同雷米跟住侍女入去,一入門,就彈左出地方既資訊,同埋見到果幢五層高既建築。
 
天藍城城主府
所  在:天藍城
所  屬:天藍城
等級限制:1
進入限制:3級限制
 
        「唔好意思,我想問下,前面依幢係咩黎。」我問侍女。
 
        「係城府,係各位大人辦公既地方。」侍女答。
 
        姐係話城府類似係市政廳或者市政大樓果類野,城主府就本身係城主同屋企人住既,但可能係天藍城依啲細城先至合埋一齊。
 
        城府既外牆鑲左好幾十顆魔晶,唔同屬性既魔晶散發出唔同顏色既光芒,青、藍、紅互相映照。除左魔晶之外,高牆既正中仲塗上左唔同顏料,畫左一個帝國既徽記。
 
        我同雷米都係第一次欣賞依類建築,對於魔晶用黎裝飾感到非常新奇。
 
        城府既兩旁都係一層高既客房,應該係比啲出差既人暫住。
 
        我地繞過正面既城府,發現中間有個庭院,而正對住庭院既有一幢三層高既建築,應該就係城主住既地方之類。
 
        依個明明係有少少似四合院既概念,但係混合歐式既磚頭建築,令成件事好特別。


 
        我地穿過庭院,由左邊小路行到去後庭。
 
        後面係幾幢兩層建築,唔係好清楚係用黎做咩。
 
        我地行埋去最近後門果間屋,侍女帶我地入去之後,就話:「依度就係喇,小少爺好快就會黎,請稍等。」
 
        「兩位需唔需要飲野?」
 
        我擰頭,「咁我先退下。」跟住行個禮就走左。
 
        我四周圍觀察下。
 
        依度樓底感覺冇城府咁高,地板感覺應該係用木造。
 
        牆上掛住幾幅壁畫,都係一啲建築物、風景圖之類的。
 
        火爐放置係大廳、長枱既盡頭處,宜家並冇點著。大廳有幾盞簡單既掛燈,亮起淡淡既光芒。
 
        「你地黎咗。」千夜既聲音從樓梯果邊傳黎,睇黎佢一直都係樓上。
 
        「嗯。」
 
        「坐。」主人家的千夜指示我地去長枱果邊坐低。
 
        我地坐係長枱既其中一邊,千夜就坐左係我對面。
 
        千夜既衣著同上次係緣風林見佢果陣一樣,而且臉色唔係幾好,好似冇乜精神咁,雙眼浮現幾根血絲。
 
        於是我就話:「唔,睇你個樣你返黎之後都應該幾忙,打擾到你真係唔好意思。」
 
        「唔會。」
 
        「唔,係咁既,我地想搵個地方住,但係比老闆趕左出黎。」我如實相告。
 
        千夜個樣有啲奇怪:「唔…冇學生證?」
 
        「唔,冇。」
 
        「冇就…比較麻煩,帝國法規定。」
 
        「咁呀,你可唔可以幫我地搵個地方住呀?」
 
        「嗯。」千夜微微點頭。
 
        跟住佢拎左張卡片出黎,卡片上印住國徽。
 
        我拎起黎睇,寫住出差證明。
 
        千夜講:「比老闆睇…就可以。」
 
        講完,千夜企起身,打算返上層。
 
        「等陣,我想問你,你果間係咩學校?」
 
        「你指…?」佢揚一揚自己件魔法袍。
 
        「係。」
 
        千夜冷笑左一聲,感覺係恥笑緊我。
 
        「你其實…係咪唔係大陸既人?」
 
        大陸,姐係聖日大陸,係Gladys入面既一小部分,姐係好似地球都有七大洲咁樣。
 
        「…」但我又唔知聖日大陸宜家有咩國家,又唔知係咪打緊仗,一陣認為我啲乜乜間諜就仲麻煩,所以我一時間都唔敢答任何野。
 
        唉屌,寧風,你當初多啲出城咪好囉,喱係個森林度做乜q。
 
        「依度…係天耀帝國,依間魔法學院…」佢又揚一揚件衫,「係大陸最頂尖。」佢一路講一路緩步咁向上行,到接近見唔到佢既時候,佢講左最後一句:「如果你要身分證明,你去搵永言既人,我可以幫你既只得咁多。」
 
        講完之後,千夜頭也不回,好霸氣咁向前行,係我既視線範圍慢慢消失。
 
        唔,我真係愈黎愈覺得千夜並唔係咩毒撚,只係個冇咁鍾意表達自己既人。
 
        佢都叫幫左我唔少,都總算係出門遇貴人,真係好彩果下有執到雞。
 
        不過宜家又多左野需要打聽,永言同千夜間魔法學院,我都好有興趣。
 
        好,不過宜家都係搞掂左個旅館老闆先講。
 
        ……
 
        離開城主府之後,我同雷米再次去到旅館。
 
        老闆原本仲想教訓我,不過見到千夜比我張卡之後就即刻搭哂膊頭。「呀屌,細路,你出差就早響呀嘛,呀叔我仲以為你搞未成年少女呀。」
 
        呀屌,明明你唔聽我解釋仲講到我錯咁,啲中年呀叔真係冇撚得輸。
 
        「哈哈,哈哈。」我陪下佢笑幾下咁,老闆就叫人帶左我地去雙人房。
 
        搞左輪終於有個地方落腳,跟住落黎就應該要去行下同打聽下消息。
 
        「好,雷米,即刻出發!」
 
        「耶~」終於有得行街,雷米都十分雀躍。

       ……
 
        我同雷米周圍行,又周圍睇下買下野,唔經唔覺已經將啲裝備修好,亦都補給好箭同藥水。
 
        將岩岩買既野塞入背包之後,我四圍望。
 
        呀你隻雷米,岩岩我要入黎買箭果陣就唔知自己竄左去邊,宜家又要我搵返你。
 
        雷米處於人類形態果陣,能力值會下降三至四成,不過就可以著主要部位既裝備,而係正常形態既時候就唔可以。
 
        而且一直著住果件素衣都唔係辦法,所以本身係諗住同佢買件魔法袍,但宜家又唔知去左邊。所以話,同女性行街你真係小心啲。
  
        各方面既小心。

        唉,冇計,依度又冇手提電話,唯有慢慢搵。
 
        ……
 
        「靚女,不如一齊行街?」天藍城某處後巷之中,雷米比幾個流氓圍住,全部都係啲十二、三歲既細路。
 
        「我先唔制!」雷米大聲呼嗌,但根本冇人會黎依度。
 
        「唔行街都得,一齊玩下囉,嘿嘿。」其中一個流氓用手捉住雷米既手臂。
 
        「放手!」雷米大嗌,用力揮開果個人既手。
 
        「再行過黎我唔會留情。」雷米舉起左手示意不准靠近,同時右手魔印開始運轉。
 
        班流氓就好奇怪,仲以為雷米會拎啲咩武器出黎,點知只係做下手勢姐,帽事既。
 
        依班流氓雖然知道依個世界有魔法既存在,而且天耀帝國仲係魔法人才輩出既國家,但係根本就冇見過魔法使施法,更加估唔到會有魔法使黎依啲小城市行街掃平貨。
 
        所以一個流氓冇諗太多,見雷米冇拎武器就行上前。
 
        不過佢只係踏出左一步,雷米就使出左魔法。
 
        雷系魔法係雷米面前好似鐵絲網咁展開,縱橫交錯,形成保護。
 
        果個流氓掂到電網,即刻食左個[麻痺](註2)debuff,想郁都郁唔到、撻低左係地下。
 
        「魔…魔法使!」見到魔法既一剎,所有流氓都即刻淆底,除左對魔法依種能力有未知既恐懼之外,仲因為魔法使大部分都係貴族子弟。
 
        眼前既人一個唔高興,成班兄弟可能就要葬身係依度。
 
        「走…走!」之前捉住雷米手臂果個流氓大叫,其他流氓即刻落荒而逃,剩係得返麻痺左果個同埋一個矮仔。
 
        「成班都仆街黎,咁樣既同伴值得你相信咩?」依個時候我終於趕到黎,講左句霸氣既開場白。
 
        果個矮仔隨手拎起一根木棍,身體一邊顫抖一邊咁講:「你…你…你地唔好以為係魔法使就…就為所欲為,我…我唔會比你地傷害我同伴!」
 
        我用9秒9既速度係背包拎左把匕首出黎,一揮,碌木棍一下就耐久耗盡、斷開左兩截。
 
        依個細路,幾有趣。「你同佢地唔同,話比我聽,點解你會做古惑仔?」
 
        「古,古惑仔?」雷米對依個term有啲疑惑。
 
        「姐係流氓。」我解答。
 
        矮仔仍然全身顫抖:「我…我…我都係搵啖飯食姐…」
 
        佢似乎想試圖蒙混過去。
 
        「岩岩頭也不回果啲就真係搵啖飯食喇,但你唔單止係咁,講真話。」
 
        佢聽到我講依句,又望望我同雷米認真既神情,佢深呼一口氣,調順返自己既呼吸,跟住講:「我雙親都已經年紀老邁,我依種得果10歲11歲,又冇咁易搵到工做,冇辦法之下只可以跟隨黑大哥。」
 
        我問:「黑大哥?邊個黑大哥?」冇人識佢喎。
 
        「就係我地一班細路既大佬,佢明明唔係大我地好多,但已經比我犀利好多好多,所以我好佩服佢,亦好尊敬佢。」矮仔答,眼神閃耀住仰慕。
 
        啊?童黨大佬?我好有興趣。「哦?咁佢宜家係邊?你地有冇咩巢穴?」
 
        「我…我唔可以講,我唔可以出賣佢。」矮仔擰頭。
 
        我用匕首指住佢喉嚨,佢仍然係一語不發。
 
        「哈…哈哈…哈哈…你真係好有趣…哈…哈哈哈哈…」我笑緊既唔止係佢,而係依個世界。
 
        試問係現實世界,你到底有幾多機會,做剝削人地果個?
 
        我眼珠一紅,望住個矮仔,浮現左佢個名。
 
亦寒
人類
血  量:2612/2612
魔  力:???/???
等  級:???
物  攻:???
魔  攻:???
物  防:???
魔  防:???
天  賦:???
 
        我決定用返依句似曾相識既對白。

        「亦寒呀可?你宜家有兩條路揀,一、帶我去你地個黑大哥度;二、死,唔係你死,係佢死。」我捉住攤左係地下果個流氓既手踭,一野向後拗。
 
        「啊!」個流氓叫春咁大嗌,貫徹全條後巷。
 
───────────────────────────
備註:
 
1)進入限制:
 
無限制:任意進入
1級限制:所有居民、商人、他國旅客,只要能證明其身分,皆能通行。
2級張制:只限持有該國籍身份證明的人士可以進入。
3級限制:官、軍職人員、士兵及得到許可的人士可以進入。
4級限制:得到許可的人士及其所屬小隊可以進入。
5級限制:除了得到許可的指定人士,所有人不准進入。
 
2)
狀態:麻痺
說明:作用期間移動困難,無法攻擊、使用物品或技能(特定藥水和技能除外)。
已有 0 人追稿