媾女啫....唔洗咁呀: 歸家....

佢講得非常之啱！難得個天比一次咁既機會我返黎呢個時候！咁點解我唔好好去做我想做既事、去追尋我想要既野呢？我一返到屋企、依舊係一個人都無。
我一返到屋企咩都唔諗咁走左入一間我熟悉既房！嘩！原來我真係好耐無黎過，諗返起呢度、一幅落地大玻璃窗直接咁望到街下面既公園、足球場、對面住既人。一張全木制床連埋衣櫃同埋仲未比我破壞既電腦枱。張電腦枱依舊好整齊咁放左好多書同埋一個好高音質既喇叭仲有一部電腦入面仲用緊比歷史遺棄既windows Xp。
係個時單親家庭長大既我，好細個就已經要一個人去照顧自己既起居飲食、我仲好記得爸爸係我三年級既時候帶左個女人返屋企、個姐姐對我都唔差架成日買玩具比我玩、又成日帶我出街但係開心既時間好短,唔知係我唔知足定係真係過得咁快...係暑假既時候！佢一句話我唔聽話就將我所有既野掟哂出門口、個刻我都未知發生咩事既時候，我只係識得喊、但係其實喊又可以做到啲咩呢。
我喊住咁打比我呀媽，同呀媽講
「呀爸話唔要我、我可以去邊呀？我仲可以去邊？」
「你打比你呀姨喇，我好忙呀唔同你講住！」
只得8-9歲既我竟然可以咁快經歷比人踢出門口既滋味、真係唔知可以點做。
六神無主既我拎住自己沈重既心情同埋兩大袋我根本拎唔到既日常用品走出呢個唔知屬唔屬於我屋企既地方去搵我呀姨。
當時我拎住咁大袋野出街𠴱個途人只係用驚訝既眼神去望我，但係都無一個人敢行埋黎幫我，好無助既我只能夠慢慢咁拖住呢啲包袱上的士、去一個完全唔熟悉既地方重新生活，嗰個地方就係住小西灣既呀姨屋企。
個時已經係深夜既‪1點15分‬、已經乾旱既眼睛同被深深打碎既心、聽到呀姨把聲嗰一刻、我原本流乾淚水既眼睛再一次黃河泛濫咁一發不可收拾、只不過再不停流出既唔係淚水、流出黎既眼淚全部轉化成仇恨、失望、傷心。




以經空洞既心係呢一刻真係好希望有人可以幫助一個被屋企遺棄既我、唔知係咪因為淚水既關係，呀姨毫不猶豫咁收留左我。
係呢一個月我轉左學校轉左生活既地方開始過我短暫既快樂時光、個年係我人生過得最有家庭感覺一年、有新既朋友、屋企、家人、生活。當年我無意中聽到一句令我刻骨銘心既說話、令我覺得機會一定係自己既爭取、無論你生活過得幾唔好、人對你幾差都只不過係天比你一個磨練

孟子曰：「天將降大任於斯人也，必先苦其心志，勞其筋骨，餓其體膚，空乏其身，行拂亂其所為，所以動心忍性，增益其所不能！」

就係因為呢句說令到我覺得凡事不能靠天、亦不可怪天唔幫你、只夠靠自已一雙手握成拳頭咁捱落去、但係往往人生不如意事 十常八九、點會咁盡如人意。
係學期尾既時侯，因為呀姨佢有個仔只不過一直都住係婆婆到、所以呀姨屋企先多出間房比我暫住．
有日佢屎忽痕，佢話想返黎跟返呀媽住，係無得揀既情況底下我唯有再次哀求我爸爸同佢講我會乖、以後會聽話唔再頂嘴會比心機讀書架喇！
係多番努力既遊說底下我爸爸終於再一次比我重新返一個唔知屬唔屬於我屋企既屋企！
當時小五既我要再面對多一次重返同一間小學既壓力！最後個間小學都再次收錄我！細個既時候熱愛足球、係個時我以經係足球校隊入面佔一個好重要既位置、放學經常要練波、比賽、所以有時會晏小小返屋企（5-7點到）！




係小五上學期尾最後一個星期我既惡夢又開始發生！一返到屋企我爸爸以經幫我執哂所有野再一次掉出門口！
我望住爸爸，心只能充滿無奈、眼見到一袋一袋以經準備好杉褲鞋襪，我就知道我又要離開呢個根本唔屬於我既屋企。
而我走個年係2003沙士，我呀媽廢事我周圍走會染上沙士、就比我搬去同佢一齊住、去到元朗一個講都冇人識既地方！
過左無耐沙士完左我既假期都完結了！我地搬屋搬左去西貢、但係都係返同一間小學、小學係官塘、試問一個小五既學生要由西貢自己一個返官塘既小學、係一件幾艱鉅既一件事。
小五11歲既我就以經可以周圍去、好多人見到你咁個個都會話你就好喇咁自由，屋企人又唔理你、但係我既世界入面、呢啲我行我素話去邊就去邊既唔係叫自由、呢啲叫孤寂！而並唔係大家所認同既自由，就係因為孤獨所以寂寞、因為寂寞先會孤獨！我個時成日會諗真正既自由究竟仲存唔存在係呢個世界上呢！？咁樣既生活持續咗2年直至到中二！柒頭杰係我生命中出現令我擁有我想要既快樂、我再唔孤獨再唔寂寞因為我搵到我生存既目標就要令我身邊既人開心！