~表妹走左之後,一軍繼續留喺醫院度陪我。

聽講依間私人病房呢,係阿成比錢架,
所以一軍可以喺度留幾耐都得。

依度啲飯餸呢,係自已點架,
鍾意食咩就食咩,唔洗再食冬瓜瘦肉啦。
 我同一軍㨂完之後,打個電話...唔洗廿分鐘,
就有人送飯入離架啦。



 「…一軍...你連續幾晚都喺度牙?」食緊飯果陣,我坐左喺張床度問一軍。

 「...嗯...係呀,做咩呀...小欣?」一軍一邊爬飯一邊講,仲食到成面都係飯添。

 「...慢慢食啦,食到污糟哂啦。」我用紙巾幫一軍抺緊咀。

 「...嘻嘻...因為小欣你醒返我開心吖嘛,啲胃口返哂離呀....,
之前呢...真係咩都食唔落架....日日望住小欣你....,
希望你一訓醒就可以見得到我,但係可惜最後都唔係吖....,
不過只要係小欣你醒返,就咩都冇所謂啦。」一軍講。



 「…對..唔住呀...一軍,要你擔心我。」我挨左個頭落一軍個心口度。

 「...唔緊要啦,但係小欣你要應承我,以後都唔可以再做傻事,
無論發生咩事都好,我地都唔會分開。」一軍將塊面貼左埋離我度講,
我地而家額頭貼額頭咁。

 「...嗯...。」我答。

 「…係呢,你點解會知我喺後樓梯嘅?」我問一軍。



 「…er...果晚我好擔心小欣你呀,我跑離跑去到搵唔到小欣你喎,
咪打比你囉,點知你一聽電話就話要同我來生再見喎...嚇死我呀...,
因為我聽到你果邊好大回音,所以...博一博囉。

好彩真係比我博到,我跑到上後樓梯果陣,小欣你已經訓左喺度,
嘔哂白泡咁...我即刻用手機報警,再即刻咩住你跑落去馬路囉。」
一軍好認真咁講,講吓講吓又好似想喊咁。

 「…..。」我唔敢出聲,繼續聽。

 「…好彩...咁啱樓下就有部救護車喺度,聽講有人個小朋友發燒所以叫救護車喎,
雖然我平時好憎人濫用救護車,但係當時直頭想咀佢地一啖囉。

救護員見我地情況咁緊急,即刻送你去醫院洗胃呀.....,


雖然清走哂你胃入面嘅安眠藥,但係你就係昏迷不醒,
連醫生都話唔知你幾時會醒,之後阿成就幫你轉左離依間私家醫院啦。」一軍憶述完畢。

 「...多謝你呀,一軍。」我講。

 「...小欣...。」

 食完飯之後,我就沖涼啦,因為幾日冇沖過涼嘅關係,
所以覺得自己真係幾污糟吓,間房入面已經有私人浴室真係好呀,
雖然冇浴缸,但係啲設備都算好新淨。

沖完涼之後都冇咩特別,我繼續訓上病床訓覺,
而一軍就訓喺旁邊嘅床度陪我傾計,聽一軍講呢,
原來琴日籃球精英賽已經開打左啦,而且因為冇左我嘅關係所以輸左第一場,
不過只係分組賽應該影響唔大嘅....,只要離緊嘅五場贏到四場都應該可以次名出線。



我同一軍之間已經完全冇哂秘密,比起以前更加多野傾...,
我地差唔多傾到零辰都仲係唔捨得訓。

 「…好夜啦...豬豬,乖乖地訓覺啦,
要休息多啲先會快啲好返架嘛。」一軍訓喺側邊同我講。

 「...咁...快....。」我有啲唔捨得咁講。

 「...傻妹...聽朝訓醒可以再傾過架嘛,
我永遠都喺你身邊架。」一軍溫柔地講。

 「…嘻嘻...。」我傻笑。

 「...好啦...訓啦。」一軍摸一摸我個頭。



 「…嗯...早抖。」我講。

 之後我地就熄床頭燈訓覺啦。

 可能因為我身體仲係比較虚弱嘅關係啦,好快就已經訓著左,
而今晚呢...真係訓得好舒服,我冇再發果啲奇怪嘅夢,
一覺就已經訓到大天光啦。

 訓醒果陣,一軍依然喺我身邊,
喺依一刻我覺得我係全世界最幸福嘅人呀。

護士姐姐入左離幫我做檢查,檢查完之後,
我同一軍就叫左個早餐食啦。



 「...一軍你到底請左幾耐假架?」食緊果陣我問一軍。

 「…吓...er...我冇請過假架,我本來諗住一直都喺度照顧你,
都冇諗過要幾耐嘅,學校果邊係kimmy幫我搞架咋。」一軍諗一諗之後答我。

 「…傻佬...,快啲返學啦,成績唔好點上大學喎,
你第時...仲要養我...架嘛。」我越講越慢...真係好尷尬添。

 「…放心啦...小欣,我應承你一定會上到大學,
第時要搵份好工,照顧小欣你。」一軍好認真咁望住我講,
比一軍電一電真係想講咩都唔記得哂啦。

 「…嘻嘻....嗯..。」我好開心咁點一點頭。

 食完早餐之後我同一軍繼續傾計,
到咁上下醫生入左離再為我做一個詳細嘅檢查。

 「…嗯....周小姐你已經完全康服架啦,
一陣晏小小就可以出院。」醫生檢查完之後講。

 「...真嘅?」我好多開心咁問。

 「...嗯...不過呢,要記住依時返離覆診,以後唔好再做依啲無謂野啦,
知唔知呀...你身邊好多人愛錫你架。」醫生說教緊我。

 「…嘻嘻...係嘅係嘅...嗯...嗯。」我烚熟狗頭咁...hea答醫生。

 醫生走左之後,我繼續同一軍盡訴心中情,好快又到食晏時間啦,
我同一軍享用埋我地喺依度嘅最後一餐,食完之後一軍話出去買小小野喎,
到下午就有護士入左離話我可以出院啦...yeah。

但係一軍仲未返離喎...點算呢?

 打比佢先。

 ~嘟嘟......嘟嘟~....。

咦.....唔通嘅?

 ~嘟嘟......~嘟嘟~.....。

都係唔通喎? 

我開始擔心啦,好驚一軍會離開我,
又好驚一軍唔知會有啲咩意外。

一分體之後,我打左超個十次電話比一軍,我直頭係停唔到咁,
不斷打不斷打,越打就越驚...,因為電話依然唔通...,我就離崩潰啦.....。
 「...嗚....嗚...,一軍呀...你去左邊呀。」我又忍唔住喊左出離,依家坐左喺床邊。

 ~嚓~  開門聲。

 「...小欣...做咩事呀?」係一軍呀,
而家喺門邊攝左個頭入離,唔知發生咩事咁。

 「…嗚嗚....。」我即刻衝左落床,撲左埋去攬住左佢。

 「...發生咩事姐...?」一軍繼續好疑惑咁問我。

 「...嗚嗚...我好驚呀...點解你電話唔通架...嗚嗚。」我攬住一軍喪喊。

 「…吓...幾時呀?」一軍問。

 「...嗚....啱啱囉。」我答。

 「…會唔會喺我搭緊𨋢收唔到呀?」一軍講。

 「…嗚....。」係喎...又真係有可能喎,點解我頭先諗唔到嘅。

 「...傻妹...,唔洗驚喎,我而家咪喺度囉....。」一軍好溫柔咁講。

 「…對唔住呀...要小欣你擔心添。」一軍再講。

 「...拿...小欣,送比你架。」一軍單手隊左紮紅玫瑰比我,原來一軍去左買花呀。

 「...你...就係去買花?」我望一望紮玫瑰又望一望一軍。

 「...係呀...我諗住出院要有花先得架嘛,咪去買囉。」一軍講。

「又係十一枝?」我講。

「嘻嘻....係呀!!...花店個姐姐話十一枝代表一生一世吖嘛。」一軍面紅紅咁講。

 「...多謝你呀...一軍。」我接過紮玫瑰。

 「...好啦,出院啦。」一軍講。

 「...嗯...。」我點一點頭,
之後一軍就幫我拎左啲野出院啦。

落到樓下一軍就截左部的士,
之後我地就一齊搭的士返我屋企啦。

 的士好快就去到我屋企樓下,
一軍扶住我,慢慢咁行入去。

終於都返到屋企啦,好掛住依度添...明明只係幾日,
但係就好似冇返離成年咁。

 「…嚓....。」我開左度門比一軍行入去先,
但係一軍企左喺度唔郁喎。

 「…仲唔入去。」企喺後面嘅我推一推一軍講。

 「...嘅....你家姐喺度喎。」一軍口窒窒咁講。

 「…吓...。」我推開左一軍攝左前去,咦....真係堂姐喎,
而家堂姐企左喺度望住我同一軍,好似想喊咁嘅樣。