【少少重甜】《用甜筒打喪屍！！》（完）: 第51回 - 集合

我地一行人，加埋新同伴Angel，十足被選中既細路咁   。 

我同虧佬成日都會傾計，話好似發緊場夢咁，細個好想做英雄，而家終於有機會......就奇  ！我地係度著緊草咋！不過的確係一場著草既夢。 

係時間趁呢個機會介紹下我地呢一班著草中既生還者。 

Chris（我）：25歲 ，香港人，黎日本旅遊，準備走佬返香港之制，點知就遇到喪屍。識雞碎咁多武術，叫做打到幾下。 

Jonathan（虧佬）：25歲，Chris既中學同學，現時為一位醫生。同Chris一齊黎日本旅遊，一同遇到喪屍事件。因為體力較差，所以主力做支援同醫療工作。即刻補血師。 



詩音（女主角）：18歲。高中畢業就係家族食店度幫手既靚靚日本妹。可能因為係屋企鋪頭，社交圈子不大，所以無男朋友。對Chris一見鐘情，主動表白。識少少英文，所以同Chris溝通到。 

京香：詩音既母親，37歲美魔女。單親家庭，自己就係食店既老闆娘。雖然弱質纖纖，不過可以絲毫無損地ko一隻喪屍。 

旅館老闆：Chris同Jonathan住既旅館既老闆，配備日本刀。旅館位於上野二丁目。個女因為喪屍事件而失去左聯絡。 

師姐（Mandy）：好高大既女仔，20-23歲咁上下，一個人黎日本玩既香港人，識得綜合格鬥同泰拳，幾靚女。目測起碼有D Cup。 

田中一郎：Uber司機，坐駕係Benz。因為同Chris一班人經歷過喪屍戰，於是加入左逃亡大軍，至於車我地走黎走去會收幾多錢...仍然係未知之數。 



田中照子：田中太郎既老婆，雖然唔算靚女，不過係典型優雅既日本女士。唔識渣車，但都頂硬上渣駕車黎救我地。 

便利店職員夫婦Madan & Marisa：由上野二丁目逃出既生還者，日本工作的外勞，即係香港所叫既「呀叉」。識講英文，講得幾流利。 

結城：由上野二丁目逃出既生還者，係一個十二三歲既小朋友，貌似同父母失散左？還是見住自己父母變成喪屍？我唔多知，因為佢無出過聲。我硬係覺得佢有D危險，唔知點解。   

Angel Ho：唔洗多講，佢就係剛剛加入既靚女model   ！係去左日本讀書既香港人。不過個人無乜自信。好鐘意貓。 

我向Angel介紹哂我地咁多個人，Angel竟然笑起上黎。我由中學到而家，六年黎都無見過佢既笑容。「你地好西利。」 



然後佢用日文同咁多位介紹自己，唔知點解Angel一用日文傾計就好流利，好有自信。 

「我唔西利，我地呢隊人既leader其實係田中先生。」我話。 

田中聽到，即刻笑容滿面，日本人就係謙虛「哪裡哪裡..我只是一個司機。」 

真係難得，係喪屍圍城既時候仲能夠有講有笑，不過唔知笑得幾耐啦。