【完】好多件令我好後悔嘅事 (20/4/2017修改): 19
佢出嚟嘅時候，著住件白色T恤，一條運動短褲，踢住對拖鞋。佢頭髮好濕，一邊抺個頭一邊行出嚟。
佢出嚟嘅時候突然同我講，「就算只係見到一面，都係緣份嚟嘅。」
原來佢接續緊啱啱嗰個話題，有太多只係見過一面嘅人，幾秒之後我先意會得到。而我扮到好似一直明白咁樣，無畀佢發現到。對於我有依種技能我頗感自豪。
「開始覺得有啲無謂。」我話。
「無謂？」
「嗯。」
「點解咁覺得？」
「唔知。」
話題一中斷，又諗唔到可以用啲咩嘢再接落去，於是我都無再出聲。佢拎咗個煙灰盅出嚟，拎到我面前。
「你想食煙可以隨時食，我無所謂。」佢話。
「你見到咩？」我諗，到底佢係幾時見到。
「啱啱走嗰陣呢，你等我嗰陣。嗰陣我仲喺好遠，」佢遞咗個煙灰盅畀我，「我見你呆咗咁，無嗌你啊。」
「唔洗喇。」我微微撥開佢手，「我好少食。」
佢好詑異咁「哦？」咗一聲，又拉長咗一聲「哦——」無再問落去。佢剩係同我講，「睇你唔似，你同我想象中真係好唔同。」
「又咪人一個。」我隨便咁答。
「你好特別。」
「特別樣衰？」我問佢，「定特別乞人憎？」「哈哈。」我笑一笑。
佢打開雪櫃，佢問我飲唔飲嘢。我見到嘅，係佢將毛巾掛喺頸上面，烏低身拎嘢飲嘅背影，佢臀部嘅下半邊。佢轉身，向我伸出手，遞咗枝水畀我。
「唔該。」
「唔洗。」
我問佢，「你得你一個住？」
佢話「依家係。」
嗰個煙灰盅嘅存在令我好在意。我話，「你都唔似有食煙啊。」
佢沉默不語。
「你似打網多啲，打網球唔會食煙。」我繼續講。
佢聽到就跟住笑，「你嗡乜嘢啊你！」佢笑住咁同我講，「我無打網球啊，講嘢九唔搭八嘅你。」
我陪佢笑。
「我無食煙。」佢靜落嚟，收起笑容，呼咗口氣，佢慢慢咁答我，「我Ex先有食。」
佢喺客廳一張凌亂嘅枱上面拎起一個風筒，開制，風筒類似「嗚嗚」聲轉動嘅聲音好嘈。我坐喺佢隔離，睇住佢吹頭。佢側住頭，頭髮向下垂，一隻手捉住風筒一隻手不斷咁撥佢嘅頭髮。
「之前我同佢一齊住。」佢同我講。明明話題可以完全避開佢嘅男友隻字不提，但佢好似刻意想讓我知道依件事先至同我講咁，「散咗之後佢就搬走。」
屋嘅天花有補過嘅痕跡，白色天花，角落處嘅白色比其他地方更白。客廳天花嘅正中間處係一把藍色扇葉嘅風扇，外面罩住個一條條鐵枝組成嘅鐵罩，中間有塊金色圓形板嘅嗰種。
屋企人呢？
本來想問，但後來覺得唔應該咁問，於是無問。
「一個人住幾舒服吖。」我話。
「算係嘅。」佢答，「只係有時會好悶。」
我諗佢悶嘅意思係寂寞。
「悶悶吓就唔悶嫁啦。」我話，「我諗。」
「希望啦。」佢微笑，佢仲問我，「咁你會唔會有一刻，突然覺得周圍嘅事都好悶？」
「唔會『有一刻』，唔會『突然』。日子一直都係咁過，慢慢就唔覺得有悶同唔悶嘅分別。」而我竟然認真咁答。
「一直都係咁？」佢認真咁問。
「每日嘅願望係我可以活過嗰一日。」
佢望望錶，「啱啱先過咗十二點，」佢同我講，「咁你今日咪仲有好耐要捱？」
「嗯。」
「有時你想身邊有一個人，有時你就唔想？」佢問我，「你有無依種感覺？」
佢吹完頭，垂低一手拎住風筒嘅手，放低風筒，呆咗咁望住我，嗰一刻我哋四目交投。佢嘅白色T恤衣領開得好大，衣領間見到佢嘅心口，佢心口好白，兩邊乳房嘅中間，應該近右邊，有小小嘅一點癦。胸部隆起，脹起咗佢嘅白色T恤一樣。
我行上去，攬住咗佢。
「喂——」佢喺我我耳邊，輕聲而溫柔咁問我，佢問我，「你想做咩啊？」好似一個幼稚園老師問一個小朋友咁。佢兩手抱住我腰。佢咁樣我反而反應唔到過嚟。
「無嘢想做。」我話。
佢無答我。
「我想瞓覺。」我喺佢耳邊，我同佢講。
***
SY攬住我瞓，佢手圈到我耳邊、圈到我後頸。我聽住佢嘅氣息，頭埋喺我胸懷之中。嗰間房，好似仲有人住而好耐無人入過嚟咁——衣櫃櫃門關上，櫃門底偶然攝出一兩件衫；床邊貼住窗簾嘅位置放咗一個相架，幾隻公仔；相架上面係SY同一個男人嘅合照。嗰個男人梳咗個All-back頭，一邊耳仔戴住隻耳環，佢一手攬住SY，佢高SY成個頭。SY佢笑對住鏡頭笑得好甜。
「你唔好諗衰嘢啊。」床上面嘅佢同我講。
「哦。」我話。
被窩裏面我哋相擁住瞓。佢著住條短褲瞓覺，我順住佢背後掃落去，掃到佢臀部，運動短褲近絲嘅質感，去到佢對腳，佢對腳好凍。佢捉住我隻手，拉返我隻手上去佢背後。
「你啊——」SY佢細細聲咁講。
我輕輕撥開佢手，手又順住落去。然後佢攬得我更實。
佢話我「你咁咸濕嘅你...」
「都幾，」我答，「依個應該算係我缺點。」
「咩叫『應該算係』...直頭係啦！」佢攬實我，將下身更貼向我。
我話「我好鍾意你。」
「唔信你啊。」
「我講真。」
「唔信。」佢問我，「你同過幾多個女人咁講？」
我話，「我無同人咁講過，得你一個。」
「算吧啦你。」
我吻向佢嘴唇，佢合起眼，我哋又吻，接連幾次。我手向上，走向佢T恤裏面，去到佢胸圍邊，我用手指輕輕掃一下佢。佢又鍚咗我一下。
佢話我，「你咁樣同女仔講，真係有女仔會信。」
「你都係女仔啊。」
「我唔會信你吖嘛。」
我問佢「點解唔信？」
佢問返我，「信錯點算？」
明明做愛係人生僅餘下來徝得興奮嘅事，但一諗起阿怡又徒添傷感。我拼命抺去一切關於阿怡嘅記憶，但越想忘記，佢講過嘅每一句話就越加清𥇦，佢對過我笑⋯⋯竟然有人會覺得我係個善良嘅人，咁樣嘅一句說話有如詛咒。
「因為我真係鍾意你嫁。」佢喺我耳邊同我講，「就算...嗰種鍾意未必係男女朋友嗰一種...分分鐘可能只係有時會同朋友講句『我好鍾意羊格』嗰種，但我真係好鍾意你。」佢講得好慢、好慢......「所以，唔好求其咁同我講『我鍾意你』得唔得？」
我騎到佢身上，吻向佢雙唇，兩隻手抱住佢條腰，向上推，褪開佢嘅上衣。我瞓喺佢胸部上面，手兜到佢背後，除開佢嘅胸圍。
我試圖喺回憶中殺死阿怡，喺SY面前。
「做我女朋友。」我問SY：「可唔可以？」
同時間我許下咗一個必然違背嘅承諾，為咗更順利咁進入佢身體裏面。