【完】好多件令我好後悔嘅事 (20/4/2017修改): 39
西牛佢拍下我膊頭，一手就箍住我，佢問我「你師妹咁可愛，做咩你唔介紹我識！」
然後張文靜聽到西牛話佢可愛，佢就好開心，「唉啊你咁講嘢嘅。」
深呼吸。佢兩個都無為意我。
「哈哈哈」，西牛傻傻下咁撓下頭，「咁係吖嘛，哈哈哈。」
「信你先奇啊！」張文靜鬧西牛。
係傾得好開心嘅兩個人。
西牛舉起手，作掌嘴狀，一手輕輕打向佢自己，一邊「掌嘴、掌嘴」咁樣叫，「我邊得講嘢咁Flirty嘅呢？邊得咁嘅呢？」
「你做咩嘢啫！」張文靜掩住嘴，望住西牛，「你唔好咁白痴啦！」雖然係鬧佢白痴，但又不斷咁笑。
我連搞笑都輸畀西牛。
西牛又指住自己把口又再傻傻更更咁笑，「我平時見到女仔就口疾疾疾疾嫁喇...」
「無你咁好氣啊！」張文靜撥一下頭髮，避開佢嘅視線。
「有咩唔識你仲可以搵我問嫁！」西牛瞇起眼，溫柔咁望住張文靜，西牛竟然會做到依種眼神，覺得佢好厲害，又對佢越加痛恨。
我打斷西牛嘅說話，「唔洗咁麻煩啦，有咩我再問你都得。」講完，走向張文靜，微微揚起手，輕輕擋住西牛，對佢微笑一下，多謝佢嘅好意。
西牛撓下頭，好似好不志在咁，「唔緊要啦，」放慢語速，「咪當多個人幫下你囉，又唔麻煩嘅。」
「唔洗客氣啦。」我搶住答。
最後，張文靜都係應承咗佢，「好啊。」
「唔洗咁麻煩喎真係！」我反駁，但已經諗唔到其他說話。
「唉吖，你咁盲塞嘅！」西牛提高聲調，身體半縮向後，佢扮熊仔頭真係扮得好似。「下下佢又搵你，你再搵我，我搵返你又搵返佢咁樣...咁咪仲麻煩！」佢扮咩都好，都會扮得好似。「你話係唔係先，係唔係先？」佢問。
「你好似熊仔頭啊！」
「係啊，哈哈，好多人都咁講。」然後西牛佢隨手拎嚟一枝玩具槍，係之前宿舍活動嘅道具，佢揸上手，另一隻手拓住開槍，Fire. 西牛大嗌：「I am ready! I am ready!」
張文靜見到咁更加笑唔停口，「好似啊真係！」佢坐喺張床到，掩住個肚，踢晒腳咁笑。
西牛佢話，「緊係啦，毒撚扮兵好難唔似。」
張文靜叫西牛「收皮啦，」佢話西牛，「你都唔似兵！邊毒啫！」
西牛話，「得你一個會咁樣講嫁咋！」
笑到張文靜耷低頭，完全無視周圍發現嘅事。西牛佢就睥實我，拉起嘴角，佢用口型同我講，你唔好多事。
「阿靜，走喇。」我叫佢。
依個時候佢先醒起佢要返去，「吖，係喎。」佢執好個袋，確定所有嘢都放晒入去無嘢漏低，之後佢就著返件褸，攬返條頸巾。
佢同西牛講咗句「拜拜。」
「拜拜~」西牛對佢揮手，瞇起眼，「記住啊，有咩唔識可以問我嫁。」
***
離開宿舍，行到去火車站之間，條路好長，經過好多幢矮矮嘅豪宅、沿路種滿樹，側邊係馬路。張文靜行喺我前面。行行下我哋就行到一條橋上面。條橋橫跨過窩打老道，橋下車來車往，夜晚車頭燈一點點咁喺橋底穿過。
張文靜佢問我，「你個朋友呢，平時係咪都係咁好笑？」
我一直行。「西牛佢啊...」之後就唔知點講落去。
「佢好好笑啊！」佢好興奮咁話，「大學好似真係好好玩，有啲咁正嘅人做Roommate.」
「嗯。」我隨口答，將要講嘅一切都收起。
「你哋平時仲會做啲咩？」佢問我。
「無咩特別嘅，都係打吓機嗰啲。」我將其他人嘅生活講出嚟，當係我嘅生活。已經好多次，有時會連我自己都呃埋，覺得自己生活正常。
「有無啲健康少少嫁！」佢鬧我，「你唔好成日打機啦。」
「有嘅，」我回答，「我諗。」
「平時仲會玩啲咩啊？」佢追問我。
走喺條橋上面，一步一步咁行。經過兩個夜晚行緊返宿舍嘅人。依道灰色嘅橋，一眨眼行咗四年，橋兩邊大概有四分三個人嘅高度，夜晚嘅車仲係行緊都行唔完咁，馬路直通向遠處，一轉彎應該會去到旺角啩？我諗。因為唔識揸車，平時搭巴士又掛住發夢，所以我永遠都認唔到路。認唔到路就會覺得迷惘，唔知點算好，好多時都係咁。好廢啊，好似個白痴。
「唔好痴住西牛。」
張文靜聽到嘅時候，靜咗落嚟。佢問我「點解？」
「總之唔好痴住佢。」我叫佢，「聽我講吖。」
「點解啊？」佢問。
「佢唔係好人嚟。」我答。
「係咩...」但係佢唔信，「我見佢對人好好啊，又肯教我。」
「聽我講，」除此以外，我唔知點樣可以解釋到畀佢聽，「唔好再理佢喇，唔理佢對你幾好都好。」
「啱啱我見你哋都無嘢格？」佢問我，「你哋仲笑笑口咁嘅...」突如奇來被人叫自己疏遠一個人，一定係一件好奇怪嘅事，如果聽到嘅係我，我都會好想知道咩事。「你哋鬧交嚟？」佢天真咁問。
「我哋無鬧過交。」我企喺到，嚟到天橋嘅正中間，佢都跟住停低。剛才經過嘅人已經離開，好少人會喺夜晚再走依一條橋。
「咁做咩啫？」張文靜一臉茫然。
「佢唔係好人嚟，喺佢身邊下場一定會好可憐。」
「你呢？你同佢朋友嚟家嘛？」佢問。
「應該係，」我慢慢咁答，小心翼翼咁，「我同佢應該係朋友嚟嘅。」
「佢咁衰你又同佢做朋友咁奇怪嘅。」
「啊...又好似係啊可？」環顧四周，「好奇怪啊可？」
「嗯。」
畀佢咁問一問，我都覺得好奇怪。
「我又會同依種人做到朋友嫁可？」
「係囉？」佢反問。
所以，應該係我哋身上一定有啲相似之處，先至會做到朋友。我又再沉默落嚟，講唔到咩嘢，可能都無資格再講。
「你自己都唔好得去邊啦，仲好話人。」
當然知道佢喺到講笑，而為咗令佢覺得依個笑話有效，免得佢失望、傷感、或者尷尬，我依舊努力咁陪住佢笑。
「哈哈哈！你又無講錯！」我撐大對眼，盡可能用講笑嘅語氣去講一句真話，比平時普普通通咁講一句真語更加攰，「我真係唔係好人啊可？」
佢笑笑吓咁，又話我一句，「你好意思話自己好人咩？」
我同佢之間一切嘅回憶裏，我諗我都唔係一個好人。如果要我突然間做返好人，睇怕我都無咁嘅資格。我根本無資格對一個人好，咁樣未免太悔辱其他人，嗰啲一直都對緊其他人好嘅人。
「唔好意思啊。」我答。到底我係講緊我唔好意思，抑或我係向佢道歉，我一直都分唔清楚，落到記憶裏面變得更加模糊，我真實嘅諗法就更加無可能再挖返出嚟。「好唔好意思。」
「啊...」張文靜又再呆咗咁，可能佢都分唔到。佢同我講，「我講吓嫁咋...」
佢臉露驚惶，佢好怕自己又令我傷感，於是我即刻笑，「玩吓你咋！」我拍拍佢上臂，「點先！問你驚唔驚！」「哼！成日話鬼我吖嗱！？」我話佢。
「唓！」佢一擰轉頭，就繼續行，行喺我前面，無再理過我，一眼都無望返轉頭。
「喂，你應承我先啦。」我叫住佢。
佢繼續行。
我繼續嗌，「唔好同西牛有聯絡，好唔好啊？」
佢反問我，「就係因為佢係一個衰人？」
「嗯。」
「你無嘢要講喇？」
我搖搖頭，「無其他喇。」
「唔應承你。」佢一口拒絕我。
「求你。」
「唔得喎。」
我追住佢嘅背影急步行。火車站面前，一過閘機就係火車月台。夜晚依種時候，等車嘅人唔多。喺閘機面前，佢轉身，望住我。齊陰嘅女仔好可愛，每次望住佢都有依種感覺。
張文靜兩隻手擺喺身後，側住頭，拉高聲線咁同我講，「等你緊張下都好！」
「唔好玩啦。」我捉住佢手腕，「我講真嫁。」
「你都係衰人嚟之嘛，佢又係衰人，你哋又咪一樣。」佢甩開我，「我同你傾偈又得嘅？」
「唔同嫁...」
「有咩唔同啊？」
「我想對你好。」我好肯定咁同佢講。
佢即刻避開我，「肯定你成日都係咁同女仔講嫁啦，我先唔信你。」
「唔係嫁。」我否認，「真係唔係嫁。」
「信你都傻。」佢一路伸手入個袋到，喺個袋到開始搵返個銀包出嚟，一隻腳微微提起拓住個手袋，個頭都靠埋去，專注咁搵。「唔理你啊，等你對其他女仔咁衰吖嗱！」
「我唔會嫁喇...我以後都唔會嫁喇。」
「哈，」張文靜笑笑咁話，「你講到好似鍾意我咁嘅！」佢問我，「你仲鍾意我咩？」
悠長咁嘆一口氣，車就嚟到，「我唔知。」我答，「我諗應該唔係喇...」唔敢再話自己鍾意一個人，每一次都悲劇收場，「可能我唔會鍾意人。」
「哈，唔會鍾意人添啊？」佢慢慢就拎到個銀包出嚟，佢轉身。
「你應承我先。」我叫佢，「唔好理西牛。」
「哼！依家我就等你緊張下！」佢一步一步，越行越遠，路軌傳嚟火車行駛嘅聲，「代其他女仔嚟教訓你啊！睇你後唔後悔！」
「我後悔喇...得未啊！」我對佢嗌。
「好啊，咁你答我吖，」佢停低，擰返轉身，佢問我，「你係後悔啲咩吖？」
垂低手，目空一切，張文靜身後嘅景物慢慢慢慢咁變做一團白色。車要嚟到，人要走。我同張文靜隔住一部閘機嘅距離，一步一步，佢向後退、向後退。當時，我無答佢。
「哼。」佢鬧我，「你都唔知你後悔啲咩！就唔好答到咁口響啦！」
鬧完，佢就上咗車，部車就閂埋門，閂埋門就開走。開走咗，又見得返對面月台，連對面月台都已經無晒人。
可能，我根本唔係後悔緊某一件事，我係後悔緊好多件事。
***
改一兩個決定，已經改變唔到啲咩。
平安夜嗰一晚，我挨喺房門外面，聽住西牛同阿靜做愛。